18°C , Intermittent clouds | Kigali-Rwanda

Volleyball:  Ikipe y’u Rwanda  y’abakobwa U-20  yagiye muri Mexique  mu gikombe k’Isi 

Yanditswe na BUGINGO FIDELE

Ku ya Jul 8, 2019 saa 11:36

Tariki 12-07-2019

Rwanda-Japan

Tariki 13-07-2019

Rwanda- Dominican Republic

Tariki 14-07-2019

Rwanda-Brazil

Ikipe y’u Rwanda y’abakobwa batarengeje imyaka 20 mu mukino wa Volleyball   iri muri  Mexique   aho yitabiriye imikino ya nyuma y’igikombe k’Isi  “The FIVB Volleyball Women’s U-20 World Championship 2019”.

Iyi mikino y’igikombe k’Isi biteganyijwe ko izatangira tariki 12 isozwe 21 Nyakanga 2019. Itsinda rigizwe n’abakinnyi 12 ndetse n’ababaherekeje bahagurutse mu Rwanda tariki 06 Nyakanga 2019.

Mbereyo kwerekeza muri Mexique, kapiteni w’ikipe y’u Rwanda, Munezero Valentine yatangaje ko bagiye mu irushanwa rikomeye ariko nta bwoba bafite kuko abo bazakina nabo bari mu kigero kimwe. Ati: “Twaritoje kandi tugiye dufite ubushake kandi tuzagerageza kwitwara neza.”

Umutoza mukuru w’ikipe y’igihugu, Mudahinyuka Christophe yavuze ko ikipe ajyanye ari ikipe nziza kandi yizera ko izitwara neza. Yavuze ko intego  bafite ari uguhatana bakazagerageza gusohoka mu itsinda kandi ibyo bikaba bisaba ko batsinda byibura imikino ibiri.

Iyi  mikino y’igikombe k’Isi  izitabirwa n’amakipe 16 aturutse ku migabane 5 y’Isi aho yagabanyijwe mu matsinda 4. Itsinda A ririmo Mexico, USA, u Butaliyani na Cuba. Itsinda B ririmo u Bushinwa, Pologne, Misiri na Peru. Itsinda C ririmo u Burusiya, Turukiya, Argentine na Serbia naho itsinda D rikabamo u Buyapani, Brazil, Dominican Republic n’u Rwanda.

Ikipe y’u Rwanda na Misiri ni zo zizahagarira Afurika muri iyi mikino nyuma y’uko zitwaye neza zikagera ku mukino wa nyuma mu mikino y’Afurika “African Women’s U-20 Championship 2018” yabereye i Nairobi muri Kenya  kuva tariki 26 Kanama kugeza 02 Nzeri 2018.

Abakinnyi 12 baserukiye u Rwanda

Kayitesi Clementine, Uzamukunda Fiellette, Mushimiyimana Charlotte, Ndagijimana Iris, Uwiringiyimana Albertine, Musabyemariya Donathe, Musabyimana Penelope, Yankurije Francoise, Munezero Valentine, Nzamukosha Olive, Teta Zulfat na Umutoni Kellia.

Iyi kipe yajyanye n’umutoza mukuru Mudahinyuka Christophe wungirijwe na Nkuranga Alexis. Umuganga ni  Umulisa Henriette,  Kubwimana Gertrude akaba ari we ushinzwe ubuzima bwa buri munsi bw’ikipe “Team Manager”  naho Kansiime Kagarama Julius akaba ari we wagiye ayoboye ikipe muri rusange.

Ubwo iri rushanwa riheruka muri 2017 “FIVB Volleyball Women’s U-20 World Championship 2017” nabwo ryabereye Mexico tariki 14 kugeza 31 Nyakanga 2017. Ikipe y’igihugu y’u Bushinwa ni yo yegukanye  igikombe  itsinze u Burusiya amaseti 3-0 (25-22,25-22 na 25-16).

Muri iyi mikino, ikipe ya Misiri ni yo yari yaserukiye Afurika  aho yari mu itsinda A hamwe na Mexico, u Burusiya na Bulgaria. Ikipe yasoje ari iya nyuma mu itsinda. Mu guhatanira imyanya   hagati ya 13 na 15, Misiri yatsinzwe na Peru ndetse na Cuba bituma isoreza ku mwanya wa nyuma wa 16.

Abakinnyi b’ikipe y’igihugu ubwo bari bamaze guhabwa ubutumwa n’abayobozi mbere yo kwerekeza muri Mexique