22°C , Partly sunny | Kigali-Rwanda

Volleyball: Ikipe ya APR VC mu bagore yitabiriye irushanwa  muri Tanzania

Yanditswe na Bugingo Fidèle

Ku ya 10-10-2019 saa 13:13:04
Ikipe ya APR VC ubwo yari ihagurutse mu Rwanda yerekeje muri Tanzania

Ikipe ya APR VC mu bagore iri mu mujyi wa Arusha muri Tanzania aho  yitabiriye irushanwa ryitiriwe uwari Perezida wa Tanzania “Mwalimu Julius Nyerere”.

Iri rushanwa Mwalimu Nyerere Memorial Volleyball Cup 2019 biteganyijwe ko ritangira kuri uyu wa Kane tariki 10  rikazasozwa  ku wa Mbere tariki 14 Ukwakira 2019.

Umutoza mukuru wa APR VC, Umutesi Josée yatangaje ko biteguye neza iri rushanwa kandi biteguye kwitwara neza. Ati: “Imyitozo  yagenze neza, abakinnyi bose bameze neza  nta mvune kandi twiteguye guhagararira neza ubuyobozi bw’ikipe yacu n’igihugu muri rusange tukegukana igikombe.”

Kapiteni w’iyi kipe nawe, Bayija Yvone agaragaza ko bagiye bafite ikizere cyo kwitwara neza ndetse no kongera kwegukana iki gikombe kuko ubwo baheruka bakegukanye. Yagize ati:N’ubu rero tugiye twiteguye kongera guhangana tukegukana igikombe kandi ikipe turi kumwe iratanga ikizere.”

Abakinnyi ikipe ya APR VC izifashisha muri iri rushanwa

Abakinnyi iyi kipe izifashisha barimo  Niyigena Grace, Dusabe Flavian, Uwera Lea, Uwicyeza Delphine, Uyisenga Josiane, Bayija Yvone, Munganyika Flora, Hakizimana Judith, Muhoza, Yvette Igihozo, Musanabageni Claudine na Mukantambara Seraphine Baby.

Umutoza mukuru w’ikipe ni Umutesi Josée  akaba yungirijwe na Kamasa Peter na Uwibambe Angelique.

Ikipe ya APR VC yaherukaga kwitabira iri rushanwa muri 2017 aho yanaryegukanye mu gihe umwaka ushize wa 2018 itabashije kwitabira.

Umwanditsi:

Bugingo Fidèle

Tanga Igitekerezo

Email yanyu ntigaragazwa ku rubuga. Amazina na Email ni ngombwa.