24°C , Partly sunny | Kigali-Rwanda
Hyango Theodore (ibumoso) na Dusabimana Vincent bombi bakinira ikipe ya Gisagara VC

Volleyball: Hyango Theodore yamaze kongera amasezerano muri Gisagara VC

Yanditswe na NKOMEJE GUILLAUME

Ku ya 11-09-2018 saa 07:44:55

Mu ikipe ya Gisagara VC baratangaza ko bamaze kumvikana n’umukinnyi, Hyango Theodore akaba yarongereye amasezero yo kubakinira mu gihe k’imyaka ibiri, iri imbere.

Hyango Theodore (ibumoso) na Dusabimana Vincent bombi bakinira ikipe ya Gisagara VC

Hyango Theodore, wakiniye APR VC n’ikipe y’u Rwanda yari yashyize umukono ku masezerano y’umwaka umwe ubwo yageraga mu ikipe ya Gisagara VC mu mwaka ushize wa 2017.

Aganira n’Imvaho Nshya, Dusabimana Vincent, kapiteni wa Gisagara VC wanagize uruhare kugira ngo yongere aya masezerano yatangaje ko bishimiye kugumana uyu mukinnyi cyane ko yifuzwaga n’andi makipe akomeye yo mu Rwanda arimo REG VC.

Avuga ko Hyango Theodore ari umukinnyi mwiza, ufite ubushobozi bwo gukina ku myanya itandukanye bityo babona ko azabafasha muri byinshi. Yagize ati Ni umukinnyi w’ingirakamaro, afite ubushobozi bwinshi bwo kuba yakina ku myanya itandukanye mu kibuga, nko kuzibira “block” ndetse no mu busatirizi.”

Hyango Theodore wamaze kongera amaserano muri Gisagara VC, yiyongereye ku bandi bakinnyi bashya bayijemo barimo Akumuntu Kavalo Patrick wayigarutsemo avuye muri UTB VC akaba yarasinye imyaka 3 ndetse na Dusengimana Wickliff wasinye imyaka ibiri avuye muri APR VC ndetse n’umutoza mushya, Ntawangundi Dominique wasinye imyaka ibiri, avuye muri Kirehe VC.

Mu bavuye muri Gisagara VC barimo uwari umutoza wayo Nyirimana Fidele wasinye amasezerano y’imyaka itatu muri UTB VC ndetse na  Murangwa Nelson werekeje muri Komotini yo mu Bugereki.

Muri uyu mwaka wa 2018, Hyango Theodore yatwaranye na Gisagara ibikombe 4 birimo shampiyona, ik’irushanwa ry’Intwari “National Heroes Tournament 2018”, icyo kwibuka “GMT 2018”, ndetse n’igikombe k’irushanwa risoza umwaka w’imikino wa 2018 “Carre d’As 2018.”

 

 

TANGA IGITEKEREZO

Leave a Reply

Be the First to Comment!

avatar