22°C , Mostly cloudy | Kigali-Rwanda
Abakinnyi b'ikipe ya Gisagara VC bamaze gushyikirizwa igikombe k'irushanwa ryo kwibuka (Foto Gisubizo G)

Volleyball: Gisagara VC na Nkumba ni zo zegukanye irushanwa ryo kwibuka

Yanditswe na BUGINGO FIDELE

Ku ya 11-06-2018 saa 08:53:04

Ikipe ya Gisagara VC mu bagabo n’ikipe ya Nkumba University mu bagore ni zo zegukanye irushanwa ryo kwibuka abari abakinnyi, abatoza, abayobozi ndetse n’abandi bakunzi ba Volleyball bazize Jenoside yakorewe Abatutsi mu 1994 “Volleyball Genocide Memorial Tournament 2018”.

Abakinnyi b’ikipe ya Gisagara VC bamaze gushyikirizwa igikombe k’irushanwa ryo kwibuka (Foto Gisubizo G)

Iri rushanwa ryatangiye tariki 09 rigasozwa tariki 10 Kamena 2018, ikipe ya Gisagara VC yagarukiye  muri  ¼ umwaka ushize yegukanye igikombe itsinze REG VC amaseti 3-0 (25-23,25-19 na 27-25).

Iyi kipe ya Gisagara VC yageze ku mukino wa nyuma  isezereye ikipe ya APR VC  ku maseti  3-0 (25-17,25-18 na 25-15). Ikipe ya REG VC yageze ku mukino wa nyuma itsinze UTB VC amaseti 3-0 (25-19,25-18 na 26-24).

Ikipe ya REG VC yegukanye umwanya wa kabiri

Iyi kipe ya Gisagara VC  iri mu makipe yahabwaga amahirwe yo kwegukana iki gikombe dore koifite abakinnyi bakomeye banakinira ikipe y’igihugu kandi bakaba bafite ubunararibonye, aba barimo Mukunzi, Sibomana Placide Madison, Dusabimana Vincent ndetse na Hyango Theodore.

Nyuma yo kwegukana iki gikombe, Nyirimana Fidele yavuze ko   bari bafitiye ideni Akarere ka Gisagara ko kwegukana iki gikombe kuko abakinnyi benshi bibukwa bakomokaga i Gisagara.

Umutoza wa REG VC, Mana Jean Paul wari utsindiwe ku mukino wa nyuma ku nshuro ya kabiri kuko n’umwaka ushize wa 2017 yatsinzwe na APR VC amaseti 3-2 yatangaje ko  ikipe ya Gisagara VC  nta kintu kinini yabarushije uretse amahirwe make bagize.

Yakomeje avuga ko hari uburyo yashatse gukina ngo abashe gutsinda ariko bikanga gusa avuga ko biriya bibaho mu mukino. Mu guhatanira umwanya wa 3, ikipe ya UTB yatsinze APR VC amaseti 3-0.

UTB VC yegukanye umwanya wa 3 itsinze APR VC yari ifite iki gikombe

Mu bagore ikipe zo Rwanda  zaviriyemo muri ½

Umwaka ushize wa 2017, ikipe ya APR VC ni yo yegukanye igikombe itsinze RRA VC amaseti 3-2  izi kipe zombi zo mu Rwanda nta bwo zabashije kongera kugera ku mukino wa nyuma.

Ikipe ya APR VC yasezerewe na KBC  yo muri Kenya   amaseti 3-0 ( 25-23,25-18 na 25-12) naho RRA VC isezererwa na Nkumba yo muri Uganda  ku maseti 3-2 (19-25, 29-27,29-27,22-25 na 15-10).

Ikipe ya Nkumba University imaze guhabwa igikombe

Ikipe ya Nkumba yageze ku mukino wa nyuma  ihura na KCB yo muri Kenya iyitsinda amaseti 3-1 (23-25,25-15,25-22 na 25-19).

KCB yo muri Kenya ni yo yegukanye umwanya wa kabiri

Mu guhatanira umwanya wa 3, ikipe ya RRA VC yatsinze APR VC amaseti 3-1.

Kapiteni w’ikipe ya RRA VC, Nzayisenga Charlotte ashyikirizwa igihembo nk’ikipe yegukanye umwanya wa 3

Ikipe ya mbere mu bagabo n’abagore  yahawe igikombe na miliyoni 1 y’amafaranga y’u Rwanda ikipe ya kabiri yahawe ibihumbi 600 naho iya 3 ihabwa ibihumbi 400.

Umuyobozi wa FRVB, Karekezi ageza ubutumwa ku bari baje kureba imikino ya nyuma

Iri rushanwa ryateguwe n’ishyirahamwe ry’umukino wa Volleyball mu Rwanda «FRVB» ifatanyije na Minisiteri y’Umuco na Siporo «MINISPOC» na Komite Olempike y’u Rwanda ku nkunga y’ Urwego rw’igihugu rushinzwe imiyoborere (RGB), Ikigo igishinzwe gukwirakwiza umurimo w’amashanyarazi (EUCL) ndetse n’Ikigega kihariye k’ingoboka (SGF).

Abakunzi b’umukino wa Volleyball bari bitabiriye ku bwinshi

 

 

 

TANGA IGITEKEREZO

Leave a Reply

Be the First to Comment!

avatar