17°C , Partly sunny | Kigali-Rwanda
Gisagara VC iratangira ikina na REG VC mu rugamba rwo kwisubiza igikombe cya shampiyona

Volleyball: Gisagara irakira REG mu mukino wa nyuma ubanza muri “Playoffs 2018”

Yanditswe na NKOMEJE GUILLAUME

Ku ya 26-05-2018 saa 11:55:44

Uyu munsi

Gisagara VC-REG VC (Gisagara-15h00)

APR VC-UTB VC (Amahoro-16h00)

Mu bagore

KVC-RRA VC (Amahoro-14h00)

Ruhango VC-APR VC (Ruhango-15h00)

Uyu munsi tariki 26 Gicurasi 2018, Gisagara VC irakira REG VC mu mukino wa nyuma ubanza w’irushanwa rya kamarampaka “Playoffs 2018” rihuza amakipe yabaye ane ya mbere muri shampiyona ya 2018, ubere mu nzu y’imikino y’Akarere ka Gisagara (15h00).

Gisagara VC iratangira ikina na REG VC mu rugamba rwo kwisubiza igikombe cya shampiyona

Ni umukino ugiye guhuza aya makipe yombi yitwaye neza asezerera abo bari bahanganye muri ½ k’irangiza. Gisagara VC iza kuba yakiriye uyu mukino, yasezereye APR VC iyitsinze imikino 2-1 naho REG VC itozwa na Mana Jean Paul yageze ku mukino wa nyuma wa Playoffs 2018  isezereye UTB VC iyitsinze imikino 2-0.

Imihigo ni yose, buri kipe irifuza kwitwara neza muri uyu mukino kugira ngo izabashe kwegukana igikombe cya shampiyona ya Volleyball y’uyu mwaka wa  2018.

Hagati ya Gisagara VC na REG VC, kugira ngo hamenyekane uzegukana iki gikombe, buri kipe irasabwa gutsinda imikino ibiri.

Muri iki kiciro cy’abagabo kandi, haraba n’umukino wo guhatanira umwanya wa 3 ukaza guhuza APR VC yakira UTB VC, ubere kuri Sitade Amahoro i Remera saa kumi z’umugoroba (16h00).

Mu bagore, na bo barakina imikino y’umunsi wa kabiri  ya « Playoffs 2018».  KVC irakira RRA VC  kuri Sitade Amahoro i Remera saa munani z’amanywa (14h00) naho Ruhango VC yakire APR VC  mu Ruhango saa kenda (15h00).

RRA VC na APR VC  zari zitwaye neza mu mikino ibanza, nizitsinda iyi mikino zirakatisha itike yo gukina umukino wa nyuma. Ikipe ya   KVC na Ruhango VC  ziramutse zitsinze iyi mikino habaho umukino wa 3, ukaba wazakinwa  ejo tariki 27 Gicurasi 2018.

Shampiyona y’umwaka ushize wa 2017, yatwawe n’ikipe ya Gisagara VC mu bagabo naho ikipe ya RRA VC igitwara mu kiciro cy’abagore.

 

TANGA IGITEKEREZO

Leave a Reply

Your email address will not be published. Required fields are marked *