20°C , Mostly cloudy with thundershowers | Kigali-Rwanda

Volleyball: CAVB yasubitse imikino y’Afurika y’amakipe yabaye aya mbere iwayo

Yanditswe na Bugingo Fidèle

Ku ya 19-03-2020 saa 11:39:41
REG VC yagomba guserukira u Rwanda mu mikino y'Afurika y'amakipe yabaye ya mbere iwayo

Kubera icyorezo cya koronavirusi gikomeje kwibasira Isi ndetse n’ibikorwa bimwe by’imikino bikaba byarahagaritswe, impuzamashyirahamwe y’umukino wa Volleyball muri Afurika “CAVB” yamaze gutangaza ko imikino y’Afurika y’amakipe yabaye aya mbere iwayo “African Volleyball Clubs Championship 2020” yasubitswe.

Iyi mikino y’Afurika byari biteganyijwe ko izabera mu Misiri aho mu kiciro cy’abagore “Women’s African Volleyball Club Championship 2020” yagombaga gutangira tariki 31 Werurwe igasozwa 11 Mata 2020 mu gihe mu kiciro cy’abagabo “Men’s African Volleyball Club Championship 2020” yagombaga gutangira tariki 12 kugeza 23 Mata 2020.

CAVB ikaba yaramenyesheje amashyirahamwe yose y’umukino wa Volleyball muri Afurika ko iyi mikino isubitswe ariko bakaba bataratangaje igihe yakongera kubera. CAVB ifatanyije n’ishyirahamwe ry’umukino wa Volleyball mu Misiri ndetse n’ikipe ya Al Ahly izakira imikino bemeje ko bazakomeza gukurikirana iby’iki cyorezo hanyuma bagatangaza igihe irushanwa rizabera.

Iki gihugu cya Misiri kiri mu bihugu muri Afurika byagaragayemo iki cyorezo ku gipimo cyo hejuru kuko kugeza ubu habarirwa abantu basaga 150 banduye koronavirusi.

Uretse iyi mikino, CAVB yanasubitse n’indi mikino mpuzamahanga yagombaga kuba harimo imikino ya Volleyball ikinirwa ku mucanga “Beach Volleuball” yo gushaka itike y’imikino Olempike 2020 harimo n’iyagombaga kubera mu Rwanda mu kiciro cy’abagore.

REG VC na UTB VC ni zo zagombaga guserukira u Rwanda

Ikipe ya REG VC yegukanye igikombe cya shampiyona ya 2019 ni yo yagombaga guserukira u Rwanda muri iyi mikino y’Afurika bikaba ari n’ubwa mbere yari igiye kwitabira.

Umwaka ushize wa 2019, ikipe ya Gisagara VC ni yo yari yitabiriye iyi mikino y’Afurika aho n’ubundi yari yabereye i Cairo mu Misiri. Gisagara VC yari yitabiriye ku nshuro ya mbere yasoreje ku mwanya 10 mu makipe 22 yitabiriye mu gihe ikipe ya Al Ahly yegukanye iki gikombe cyari icya 14 itsinze Smouha VC nayo yo mu Misiri amaseti 3-0 (25-17, 25-23 na 25-19).

Muri iyi mikino ikipe y’u Rwanda yitwaye neza mu mateka ni UNR VC yegukanye umwanya wa 4 muri 2011 ubwo iyi mikino yaberaga i Cairo mu Misiri.

Mu kiciro cy’abagore, umwaka ushize wa 2019, ikipe ya RRA VC ni yo yaserukiye u Rwanda aho yari mu makipe 17 yitabiriye irushanwa igasoreza ku mwanya wa 10 mu gihe ikipe ya Al Ahly VC yegukanye igikombe itsinze CF de Carthage yo muri Tunizia amaseti 3-1 (21-25, 25-15, 25-11 na 25-19).

Iyi kipe ya RRA VC muri 2016 yari yitwaye neza yegukana umwanya wa 4 ubwo imikino y’Afurika yari yabereye i Carthage muri Tunizia

Umwanditsi:

Bugingo Fidèle

Tanga Igitekerezo

Email yanyu ntigaragazwa ku rubuga. Amazina na Email ni ngombwa.