Volleyball: Bouchra Hajij yatorewe kuyobora CAVB

Yanditswe na BUGINGO FIDELE

Ku ya 26-10-2020 saa 13:22:04
Perezida mushya w'impuzamashyirahamwe y’umukino wa Volleyball muri Afurika “CAVB” , Bouchra Hajij

Bouchra Hajij ukomoka muri Maroc ni we watorewe kuyobora impuzamashyirahamwe y’umukino wa Volleyball muri Afurika “CAVB” mugihe k’imyaka 4 asimbuye kuri uyu mwanya Dr. Amr Elwani ukomoka mu Misiri wari umaze imyaka 19 kuri uyu mwanya.

Bouchra Hajij wabaye umukinnyi w’ikipe y’igihugu ya Maroc (1984-2002) akaba yari Perezida w’ishyirahamwe ry’uyu mukino muri Maroc yatowe ku majwi 42 mu gihe    Dr Amr Elwani wari usanzwe kuri uyu mwanya yagize 12.

Iyi nama y’inteko rusange ya CAVB yabereyemo amatora yabaye tariki 24 kugeza 26 Ukwakira 2020 ku buryo bw’ikoranabuhanga  kubera icyorezo cya COVID-19, amatora akaba  yaramaze amasaha 18.

Bouchra Hajij ni we mugore wa mbere utorewe uyu mwanya akaba abaye Perezida wa CAVB wa 5 inyuma ya Dr. Amr Elwani (Misiri), Louhry Gui Gui (Cote D’Ivoire),Nacef Salim (Misiri) na Chazly Zouiten (Tunisia).

Ubusanzwe hatorwa na ba Visi Perezida baturuka muri buri Zone. Muri Zone I hatowe Adnan Bakbak (Libya),  Zone 2  hatorwa Rodrigues Antonio Carlos (Cap vert), Zone 3 hatorwa Casimir Sawadogo (Burkina Faso), Zone 4 hatowe Idriss Dokony (Chad), Zone 5 hatorwa Waithaka Kioni (Kenya), Zone 6 hatorwa  Fredreck Ndlovu (Zimbabwe).

Muri iyi nama hatowe kandi abagomba guhagararira CAVB mu nama y’ubuyobozi y’ishyirahamwe ry’umukino wa Volleyball ku Isi “FIVB Board of Administration ” ari bo  Habu Gumel (Nigeria), Sanga Issouf Kone (Cote d’Ivoire) na Daniel Koboa Molaodi  (Botswana). 

Ku mwanya ujyanye no kubahiriza ihame ry’uburinganire hatowe  Agnes Kakoma (Zambia)   na Mpho Palime (Lesotho) 

Ruterana yotorewe kuyobora Zone 5

Visi Perezida w’ishyirahamwe ry’umukino wa Volleyball mu Rwanda “FRVB”, Ruterana Fernand yatorewe kuyobora Zone 5 akaba yahigitse Nkurunziza Gustave wabaye Perezida wa FRVB akaba yari asanzwe  kuri uyu mwanya.

Mu bindi bice naho hagiyeho abayobozi,  Zone 1 hatowe Mustapha Lemouchi (Algeria), Zone 2 hatorwa Bai Dodou Jallow (Gambia), Zone 3 hatowe Paul Atchoe (Ghana), Zone 4 hatorwa Christian Matata Shwiti (Congo Brazzaville), Zone 6 hatowe Khalid Cassam (Mozambique) naho Zone 7 hatorwa Kayseeven Teeroovengadum (Mauritius).

Ruterana Fernand watorewe kuyobora Zone 5

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.