18°C , Intermittent clouds | Kigali-Rwanda

Volleyball: Amakipe 35 ni yo yemeje ko azitabira irushanwa ryo kwibuka Rutsindura

Yanditswe na BUGINGO FIDELE

Ku ya Jun 19, 2019 saa 5:10

Ishuri rya Seminari Nto Virgo Fidelis Karubanda  ku bufatanye  n’abize muri iryo shuri bibumbiye mu ishyirahamwe “ASEVIF” bateguye irushanwa ngarukamwaka rya Volleyball ryitiriwe  Rutsindura Alphonse “Tournoi Memorial Rutsindura 2019”.

Iri rushanwa rigiye kuba ku nshuro ya 17 rigamije kwibuka Rutsindura Alphonse wahoze ari umwarimu akaba n’umutoza wa Volleyball  wazize Jenoside yakorewe Abatutsi mu 1994. Biteganyijwe  ko  iri rushanwa rizaba tariki  22 na 23 Kamena 2019 ribere muri iki kigo mu Karere ka Huye.

Tariki 18 Kamena 2019 ni bwo abagize ASEVIF bategura iri rushanwa bagiranye ikiganiro n’abanyamakuru batangaza  aho imyiteguro igeze.

Visi Perezida wa mbere wa ASEVIF, Mbaraga Alexis yatangaje ko iri ari irushanwa rinini mu Rwanda kuko ryitabirwa mu ngeri nyinshi.

Uyu mwaka wa 2019, amakipe 35 ni yo amaze kwemeza ko azitabira akaba ari mu byiciro 7.

Mu kiciro cy’abagabo bakina shampiyona hari amakipe 7 ari yo REG VC , Gisagara VC, UTB VC, IPRC Ngoma VC, APR VC, IPRC Karongi VC na UR-Huye. Mu bagore hari amakipe 5 ari yo UTB VC, RRA VC, APR WVC, KVC na WASAC VC.

Ikiciro cya 3 ni amakipe y’amashuri  yisumbuye  ahazitabira 6 arimo  Petit Seminaire Virgo Fidelis, GSO Butare, GS St Joseph Kabgayi, GS Marie Merci Kibeho, Polytechnique Gatsibo na College Immaculée Conception.

Mu kiciro cy’amashuri ari mu kiciro rusange “U-17” hazitabira amakipe 6 ari yo  Petit Seminaire Virgo Fidelis, GSO Butare, GS St Philippe Neri Gisagara, PS St Jean Paul Gikongoro na GS Sovu.

Ikiciro cya 5 ni icy’amakipe y’amashuri abanza aho amakipe 5 yemeje ko azitabira aya akaba ari EP Matyazo, EP Ngoma, EP Butare Catholique, EP Simbi na GS APACOPE (Kigali).

Ibindi byiciro bibiri bisigaye ni abakanyujijeho  ahazitabira amakipe 7 arimo KUDUM, Umucyo, Tout Age, Foudre Fort, Droujba, Relax na  ASEVIF naho ikindi kiciro ni  Volleyball ikinirwa ku mucanga  “Beach Volleyball” ahemerewe abakinnyi bakanyujijeho aho igiteranyo k’imyaka  ya bombi kigomba kuba 70.

Mbaraga Alexis yatangaje ko ubusanzwe imikino yajyaga ibera ahantu hatandukanye ariko uyu mwaka yose izabera muri PSVF kuko batunganyije ibibuga bihagije.

Nshimiyimana Innocent usanzwe ari umusifuzi mpuzamahanga muri Volleyball  akaba ari we ushinzwe ibijyanye na Tenikine muri iri rushanwa yatangaje ko ibibuga byatunganyijwe bigera ku 8 ndetse n’ikibuga kimwe cya Beach Voleyball abona bihagije kugira ngo irushanwa ribe kandi rigende neza.

IRUSHANWA RIFITE ABATERANKUNGA BATANDUKANYE

Abaterankunga b’iri rushanwa ni  ASEVIF, SORAS-SAHAM, MINISPOC, Komite Olempike, CNLG, FRVB, Cogebanque, WASAC,  2 Shots Club, UTB, Magasin Sport Class, REG, Akarere ka Huye, Isango Star, Hotel Galileo, Polyclinique Salus, Polyclinique La Medicale, RIM Microfinance, Motel Mere du Verbe, Motel Sapientia na Motel Emmaus.

Ngarambe Raphael, Visi Perezida wa kabiri wa ASEVIF akaba ari we ushinzwe ibijyanye n’abaterankunga yatangaje ko bashimira abemeye kubafasha. Yanavuze ko bagishaka n’abandi kandi bizeye ko irushanwa rizagenda neza.

Uwari uhagarariye  abari bahagariye SORAS-SAHAM, Ngoga Alain yatangaje ko bishimira gufatanya  na ASEVIF  itegura  iri rushanwa aho avuga ko atari ubwa mbere bifuza kuzakomeza gufatanya  kuko ari no mu rwego rwo kuzamura umukino wa Volleyball.

AMWE MU MATEKA YA RUTSINDURA

Rutsindura Alphonse yavutse mu 1958 avukira i Ndora (Cyamukuza) mu Karere ka  Gisagara. Yize amashuri yisumbuye mu i Seminari nto ya Butare, yiga muri IPN (Institut Pédagogique National) i Butare. Yashakanye na Mukarubayiza Vérène  babyarana  abana bane ari bo Ikirezi Alaine, Iliza Alain,  Izere Arsene na  Icyeza Alida, Rutsindura we n’umugore n’abana 3 bishwe muri Jenoside yakorewe Abatutsi mu 1994 harokoka Ikirezi Alaine ubu uba muri Canada.

Nyakwigendera Rutsindura yabaye umusifuzi ku rwego rw’igihugu, aba   umutoza w’ikipe ya Volleyball ya PSVF kuva 1983-1994. Yabaye kandi  umutoza mukuru w’ikipe y’igihugu y’abagore ya Volleyball (1988-1990), aba  Visi Peresida w’ishyirahamwe ry’umukino wa Volleyball mu Rwanda “FRVB” anatoza ikipe ya Rayon Sports VC mu 1990.

Visi Perezida wa mbere wa ASEVIF, Mbaraga (uwa kabiri iburyo), Nshimiyimana Innocent (ubanza iburyo), Ngarambe (uwa kabiri ibumoso) n’uwari uhagarariye SORAS-SAHAM, Ngoga mu kiganiro n’abanyamakuru