26°C , Partly sunny | Kigali-Rwanda

Uwiga TTC azajya yishyura 50% indi 50% yishyurwe na MINEDUC

Yanditswe na Mugisha Benigne

Ku ya 29-04-2019 saa 17:47:11
Umunyamabanga wa Leta muri MINEDUC, ushinzwe amashuri y'inshuke, abanza n'ayisumbuye

Minisiteri y’Uburezi (MINEDUC) ifite intego yo gukuraho imbogamizi zatuma umunyeshuri atiga muri rusange, ariko ku banyeshuri biga mu mashuri nderabarezi (TTC) bo haziyongeraho ko umunyeshuri azajya yishyura 50% andi 50% yishyurwe na Minisiteri y’Uburezi.

Ibi bizakorwa mu rwego rwo guteza imbere ireme ry’uburezi no kongerera amashuri nderabarezi ubushobozi bushingiye ku bikorwa remezo n’ibikoresho bigezweho, nk’uko bisobanurwa na Dr. Isaac Munyakazi, Umunyabamabanga wa Leta muri Minisiteri y’Uburezi, ushinzwe amashuri y’inshuke, abanza n’ayisumbuye.

Minisiteri y’Uburezi kandi ifite intego ikomeye ku mashuri nderabarezi mu rwego rwo kuyafasha guteza imbere ireme ry’uburezi, yiteguye kuyaha abarimu bafite uburambe n’ubunararibonye muri uyu mwuga w’uburezi.

Integanyanyigisho ya TTC kandi yaravuguruwe mu rwego rwo kwigisha abitegura kuba abarezi ibizabafasha gutanga ubumenyi mu buryo bwiza kandi bufasha umunyeshuri kumva ibyo yiga, nk’uko byagarutsweho na Dr. Munyakazi.

Amashuri y’imenyerezamwuga na yo agiye kuvugururwa no gushyirwamo ibikoresho byose bikenewe kugira ngo abazajya bajya kwimenyereza umwuga w’uburezi bage babona ubumenyi bushoboka bwose bifashishije ibikoresho bya ngombwa, ibikorwa remezo n’abarimu babishoboye.

Minisiteri y’Uburezi kandi igiye kujya iha abarezi uburyo bwo gukomeza mu bindi byiciro by’amashuri makuru mu gihe bumva babikeneye kandi bishyurirwe 100% amafaranga y’ishuri banahabwe abatunga, nk’uko bisobanurwa na Dr. Munyakazi.

Yagize ati “Mu guteza imbere umwuga w’ubwarimu, uzajya arangiza muri TTC, akigisha imyaka itatu mu mashuri abanza azajya yemererwa, igihe abishatse, buruse n’amafaranga amutunga bitishyurwa yo gukomeza mu kiciro cya kabiri cya Kaminuza.”

Ni kimwe n’uzajya arangiza muri Kaminuza mu Ishami ry’Uburezi akigisha imyaka itanu mu mashuri yisumbuye, azajya yemererwa buruse yo gukomeza mu kiciro cya gatatu cya Kaminuza mu burezi, ahabwe n’amutunga, byose nta bwishyu bwayo azasabwa.

Kuri uyu wa Kabiri, Minisiteri y’Uburezi iratangiza ibiganiro mu gihugu cyose ku bufatanye n’uturere mu rwego rwo gusobanura amahirwe afitwe n’abazahitamo kwiga amashuri nderabarezi.

Umunyamabanga wa Leta muri MINEDUC, ushinzwe amashuri y’inshuke, abanza n’ayisumbuye

Umwanditsi:

Mugisha Benigne

10 Comments on “Uwiga TTC azajya yishyura 50% indi 50% yishyurwe na MINEDUC”

  1. Iki Gitekerezo Nicyiza Pe. Ariko Muzatekereze, No Kubarangije Mbere, Basanzwe Bigisha Kandi Iyo Experience Y’imyaka Itatu 3Bayirengeje Bigisha Abana B’urwanda? Numvise Ntacyo Mubavugaho?

  2. Nibyiza pe ariko nabarangije mbere bafite imyaka 3 mukazi babatekerezeho kuko nabo bashaka gukomeza kwiga. Murakoze

  3. Murakoze cyane!
    Education yibutswe kandi izi ngamba ni ingenzi cyane.
    Motivation yo kwishyurirwa 50% ni akarusho. Ikibazo kizasigara ari “Ese ko amafaranga ya Leta akunze kwishyurwa igikorwa cyarashaje, aha ho hazaba umwihariko ku buryo azajya aboneka ku gihe agatunga abanyeahuri?”

    Gutanga buruse itazishyurwa na byo ni igikorwa gikomeye mu gufasha umwarimu kuzamura ubushobozi mu kazi.

    Ibi bizafasha kugabanya ikibazo gisanzweho cyo kuba benshi mu banyeshuri biga muri TTCs baba batahishimiye.
    Gusa hasigaye ikubazo kimwe bataraha umurongo : politiki y’imishahara.

    Kugera ubu nta buryo buzwi Leta yari yaha izamuka ry’umushahara wa mwarimu kuko n’iyo bongereye x% biba nk’ibitunguranye.
    Ikirenzeho kandi abarimu ntibishimira kuba ikintu Leta ibakoreye cyaba gito cyangwa kinini gihamagarizwa itangazamakuru. Abandi bakozi ba Leta bongererwa umushahara, bagahabwa imodoka bazishyura nta musoro ndetse bakongererwa ramsam, ntibivugwa.

    Ibi nabyo bikwiye gukosorwa kuko umwana aziga muri TTC ahakunze, ariko azakora akazi atakishimiye nk’uko biri ubu.

    Muarakoze!

  4. Iki gitekerezo nikiza cyane
    bityo REB Izibuke gufasha nabasanzwe mukazi baba nabarengeje imyaka itatu.
    iyo ni positive Reinforcement ifite ingufu, izakurura nutakundaga kuzaba umwalimu. Murakoze.

  5. iki gitekerezo nikiza ariko se bazemererwa kwiga week-end program cg holiday program ko aribyo bya korohera abarezi bagakomeza kongera ubumenyi bwabo kandi bakomeza n’akazi kabo bitababangamiye murwego rwo kudatakaza akazi

  6. Jye mbona uwo ataariwo muti wo kongera ireme ry,uburezi kuko niba mwumvise impamvu abanyeshuri banga kwiga uburezi,ni uko mu kazi bahembwa atagize icyo abamarira.ahubwo hashyirwa imbaraga mu kongera umushahara ujyanye n,ibiciro biri ku isoko!!!!

  7. ni byiza pe ariko nge ndemeramya cyane nababona ko ipfundo ry’ikibazo atari uburezi as a career ahubwo ikibazo ni icyo mwarimu abonamo salary y’intica ntikize

Tanga Igitekerezo

Email yanyu ntigaragazwa ku rubuga. Amazina na Email ni ngombwa.