21°C , Partly cloudy | Kigali-Rwanda
Uwacu Julienne wari umaze imyaka itatu n'igice ari Minisitiri w'Umuco na Siporo

Uwacu yashimiye Kagame icyizere yamugiriye, bamwe bati “tuzagukumbura”

Yanditswe na Imvaho Nshya

Ku ya 19-10-2018 saa 11:00:54

Uwacu Julienne wayoboraga Minisiteri y’Umuco na Siporo (MINISPOC) kuva mu mwaka wa 2015, yashimiye Perezida Kagame ku mahirwe yamuhaye yo gukorera igihugu.

Yaraye asimbujwe Nyirasafari Esperance wari usanzwe ari Minisitiri w’Uburinganire n’Iterambere ry’Umuryango.

Uwacu yashimiye Perezida Kagame ku cyizere yamugiriye akamugira minisitiri muri Gashyantare 2015, amwizeza gukomeza gukorera igihugu na nyuma yo gukurwa ku mwanya wa minisitiri.

Yanditse kuri Twitter ati, “Ndabashimiye Nyakubahwa Perezida wa Repuburika Paul Kagame ku cyizere n’amahirwe mwampaye yo gukorera igihugu ndi umwe mubagize guverinoma muri iyi myaka ishize. Ndabizeza gukomeza gukorera igihugu cyacu aho nzaba ndi hose mu bushobozi bwanjye.”

Benshi mu bamukurikira kuri uru rubuga nkoranyambaga, bamushimiye uko yakoze akazi ke, abandi bamubwira ko azibukwa nk’umugore wa mbere wayoboye MINISPOC.

Umunyamakuru w’umufotozi Samuel Ngenda, yagize ati, “Rwose wakoze akazi wari ushinzwe neza. Nta washidikanya ko wayoboraga Ministeri igoranye kuyiyobora. Tukwifurije amahirwe mu yindi mirimo uzashingwa. Gusa muri siporo  uretse football gusa, ahandi byateye imbere: amagare, basket, volley , athletism n’ahandi.”

Umunyamakuru w’imikino Imfurayiwacu Jean Luc we yagize ati, “Ibihe byiza madam ministre, amateka azatwibutsa ko ari mwe, umutegarugori wa mbere wayoboye MINISPOC… Kandi akabikora neza. Amahirwe masa mu y’indi mirimo iri mbere.”

Ndori Boy we yamwibukije ubwo yavugaga ko Rayon Siporo ari “Ikipe y’Imana”, ubundi ashyiraho ako ka video ka Minisitiri Uwacu avuga n’ibitwenge.

Nshimiyimana Alfred we yabwiye Minisitiri Uwacu ko azamukumbura, ati, “Mwarakoze tuzabakumbura muri industry ya sports mu Rwanda . Imana ikomeze kubana namwe mu zindi gahunda.”

Uwitwa Micomyiza Isaie we kimwe mu byo avuga azamwibukiraho ni uburyo yateje imbere ubuhanzi. Ati “Turabashimira ko mwitanze uko mushoboye. By’umwihariko ingufu mwashyize mu guteza imbere ubuhanzi, gutoza abana umuco nyarwanda munabashishikariza gusoma ibitabo, no gushyigikira iterambere ry’uruganda rw’ibitabo muri rusange. Ubwitange bwanyu turacyabukeneye.”

Ally Issa Mukiza na we yamushimiye, avuga ko yateje imbere imikino, usibye umupira w’amaguru wananiranye. Ati, “Uretse amabara ahora mu mupira w’amaguru bisa n’aho byananiranye gukemuka, ariko rwose ahandi hose mwakoze neza, tubifurije ibihe byiza.”

Uwacu Julienne wari umaze imyaka itatu n’igice ari Minisitiri w’Umuco na Siporo

TANGA IGITEKEREZO

Leave a Reply

Your email address will not be published. Required fields are marked *