18°C , Intermittent clouds | Kigali-Rwanda

Uturere tw’u Rwanda tuzasigara ari 27 nihemezwa itegeko rishya

Yanditswe na Twagira Wilson

Ku ya 22-05-2019 saa 06:46:11
Prof. Shyaka Anastase yatangaje ko nihemezwa itegeko uturere tuzasigara ari 27

Minisitiri w’Ubutegetsi bw’Igihugu Prof. Shyaka Anastase avuga ko mu gihe umushinga w’itegeko rishya rigenga Umujyi wa Kigali uzaba umaze kwemezwa ugatorwa n’abagize Inteko Ishinga Amategeko, mu turere 30 hazasigara uturere 27 gusa dufite ubuzima gatozi, hasigare utundi 3 tw’Umujyi wa Kigali tudafite ubuzima gatozi dusigare twitwa za zone.

Prof. Shyaka yabivugiye mu Nteko Ishinga Amategeko, mu kiganiro we n’Umuyobozi w’Umujyi wa Kigali, Rwakazina Marie Chantal, bagiranye n’itsinda ry’Abadepite bagize Komisiyo ya politiki, ubwuzuzanye bw’abagabo n’abagore mu iterambere ry’igihugu, mu rwego rwo gutangira gusuzuma no gutanga ibitekerezo ku mushinga w’itegeko rishya rigiye kujyaho rigenga Umujyi wa Kigali.

Minisitiri w’Ubutegetsi bw’Igihugu yagize ati “Iri tegeko nimuryemeza rigatorwa n’Abadepite, ubwo hazaba hasigaye uturere 27 dufite ubuzima gatozi, nyuma utwo turere 3 tw’Umujyi wa Kigali tuzaba tutakiri uturere tuzaba duhindutse za zone, ariko buri karere kazaba gafite abajyanama 2 bagahagarariye mu rwego rw’Umujyi wa Kigali, ku buryo bazabasha gukora ubuvugizi nyuma bagasubirayo ku babatumye kugaragaza ibibazo bafite, bitume hatabaho icyuho hagati ya Njyanama n’umuturage.”

Agaruka ku isobanurampamvu ry’uwo mushinga w’itegeko, Minisitiri w’Ubutegetsi bw’Igihugu, yabwiye Abadepite ko mu bizahinduka muri iri tegeko rishya ari uko abakozi b’uturere 3 tugize Umujyi wa Kigali bazaba batakiri abakozi b’utwo turere tuzaba tutagifite ubuzima gatozi, ahubwo ko bazaba babaye abakozi b’Umujyi wa Kigali, ariko bitavanyeho imikorere myiza inoze, hamwe na serivise zizakomeza kwegera abaturage ndetse zikarushaho.

Ku kibazo cy’abafatanyabikorwa mu iterambere DJAF basanzwe bafatanya guteza imbere uturere binyuze mu bikorwa bitandukanye niba urwo rwego rutazahungabana, nk’uko byagarutsweho na perezida wa Komisiyo ya politiki Emma Furaha Rubagumya, Minisitiri Shyaka avuga ko bitewe n’uko abo bafatanyabikorwa bagengwa n’ibwiriza atari itegeko, hazakorwa ibishoboka ahubwo urwego rwa DJAF rwongererwe ubushobozi rufashwe gukora neza, ariko rudahungabanyijwe kuko rufatiye runini iterambere ry’akarere.

Prof. Shyaka Anastase yatangaje ko nihemezwa itegeko uturere tuzasigara ari 27

 

Asubiza ibibazo by’Abadepite basanga itegeko rishya rigenga Umujyi wa Kigali, niba ritazatuma habaho igongana mu bijyanye n’imikusanyirize y’imisoro, Meya w’Umujyi wa Kigali Rwakazina yavuze ko izo mpungenge nta zihari, ahubwo ko n’inzego zo hasi zari zisanzwe zikangurira abasora gusora neza kandi ku gihe zizakomeza gukora izo nshingano, inzego zigakora mu bwuzuzanye.

2 Comments on “Uturere tw’u Rwanda tuzasigara ari 27 nihemezwa itegeko rishya”

Tanga Igitekerezo

Email yanyu ntigaragazwa ku rubuga. Amazina na Email ni ngombwa.