20°C , Partly sunny | Kigali-Rwanda

Uturere twose twahawe moto 120 zo gufasha mu kunoza serivisi z’ubutaka

Yanditswe na SEZIBERA ANSELME

Ku ya 08-02-2018 saa 08:04:19

Ikigo k’igihugu gishinzwe imicungire n’imikoreshereze y’ubutaka mu Rwanda ku bufatanye n’Ikigega cy’Abongereza k’’iterambere (DFID) bahaye inkunga uturere 30 tw’igihugu moto 120 zigamije gufasha ba noteri b’imirenge kwegereza serivisi zinoze abaturage kandi zihuse, ibyo bikaba byarabaye ejo hashize ku wa 07 Gashyantare 2018.

Hanganimana Asinati ushinzwe ubutaka n’imiturire mu murenge wa Bumbogo amaze gushyikirizwa Moto n’umuyobozi w’Ikigo k’Igihugu k’imicungire n’imikoreshereze by’ubutaka Mukama Esperance (Foto Sezibera)

Umuyobozi mukuru w’Ikigo k’igihugu gishinzwe imicungire n’imikoreshereze by’ubutaka Mukamana Esperance, agira ati: Moto 120 zatanzwe mu turere 30 tw’ igihugu, hari imirenge izagenda ihabwa iziri hagati ya 3 na 5 mu rwego rwo gufasha abashinzwe ubutaka n’imiturire gutanga serivisi zihuse kandi zinoze.

Moto zije gukemura ikibazo cyo kwihutisha serivisi ku baturage nubwo bidakemutse 100% kuko hari ibibazo byaterwaga n’imwe mu mirenge iri kure y’uturere kandi ba noteri ari bo bagomba kubegera ngo buzuze dosiye zijyanwa ku turere bigatuma zitinda”.

Akomeza atangaza ko mbere yo kugena aho izo moto zizagana, abayobozi b’uturere basabwe gutoranya imirenge itanga serivisi nyinshi cyane z’ubutaka kandi bakareba n’iri kure y’uturere yagorwaga no kugira ngo serivisi z’ubutaka zitangwe neza.

Mukamana asobanura ko imirenge izaba itagezweho n’iyo nkunga ya moto uturere tuzagenda tuyishakira ibisubizo kugira ngo hakemurwe inozwa rya serivisi. Gusa anatangaza ko izo moto atari iz’abo bakozi ku giti cyabo kugira ngo bahite bazegurirwa, kuko hari amasezerano bazasinya bamaze kuzibona ubundi bakajya bazishyura, ariko uvuye mu kazi atararangiza kuyishyura azajya ayisubiza mu maboko y’akarere kugira ngo kayihe undi mukozi mushya.

Hanganimana Asinati ashinzwe ubutaka n’imiturire mu murenge wa Bumbogo mu karere ka Gasabo, avuga ko bahuraga n’ibibazo byerekeranye no kujyana dosiye aho ziba zigomba kugera kuko barindiraga imodoka imwe y’umurenge kandi nayo ifite akazi kenshi gatandukanye.

Ikindi avuga ni uko abashinzwe ubutaka bahura n’akazi kenshi ko kujya kureba uko ibikorwa byifashe ugasanga kenshi dosiye zidindira kandi zigatinda kugera ku karere ndetse n’iziri ku karere zigatinda kuvayo zigera kuri ba nyirazo.

Avuga ko serivisi z’ubutaka zikunze kubamo ibibazo biterwa no kuba umuturage uyishaka aza yishyizemo ko atahana dosiye ye ariko yahagera agasanga hari ibyo asabwa kuzuza atari yiteguye bigatuma batabyishimira.

Agira ati: Ibintu bikunze kubamo ibibazo ni ibyerekeranye n’abazungura cyangwa iby’umuntu witabye Imana usabwa kumwandukuza kuko rimwe na rimwe iyo uwasabye serivisi avuye ku muntu ushinzwe irangamimerere hari nubwo asabwa kugana inkiko. Hari kandi abagura n’abagurisha baba batabikoreye imbere ya noteri, abo nabo bakaba bakunze guhura n’ibibazo birebana no guhererekanya.”

Hanganimana akomeza avuga ko izo moto zigiye kubafasha kwegereza abaturage serivisi bagana aho ibibazo bibarizwa hanze y’ibiro kuko ubusanzwe wasangaga abaturage ari bo basangaga ababaha serivisi ku biro byabo.

Moto zatanzwe ku bashinzwe gutanga serivisi z’ubutaka imwe ibarirwa agaciro ka miliyoni 2 z’amafaranga y’u Rwanda.

 

TANGA IGITEKEREZO

Leave a Reply

Your email address will not be published. Required fields are marked *