21°C , Intermittent clouds | Kigali-Rwanda
Ubwo Akarere ka Muhanga kahize utundi kashyikirizwaga igihembo

Uturere twa Muhanga, Nyanza na Huye twashimiwe uruhare mu kwitabira siporo kuri bose

Yanditswe na BUGINGO FIDELE

Ku ya 12-08-2019 saa 17:35:08

Komite Olempike y’u Rwanda ifatanyije n’ubuyobozi bw’Intara y’Amajyepfo  bashyimiye Uturere twa Muhanga, Huye na Nyanza  kubera  uruhare twagize mu guteza imbere siporo kuri  bose.

Iki gikorwa cyabaye tariki 11 Kanama 2019  kuri Sitade ya Muhanga gusa cyabimburiwe n’umwanya wo gukora siporo rusage. Abari bitabiriye iki gikorwa barimo Guverineri w’Intara y’Amajyepfo, CG Gasana K. Emmanuel, Perezida wa Komite Olempike y’u Rwanda, Amb. Munyabagisha Valens na bamwe mu badepite bakomoka muri utu  turere ndetse na komite nyobozi  mu turere twa Muhanga, Nyanza na Huye.

Ubutumwa buri ku ishimwe bahawe   buragira buti Ubuyobozi bw’Intara y’Amajyepfo n’ubwa Komite Olempike y’u Rwanda birashimira abaturage  n’ubuyobozi bw’akarere  uburyo bashyize mu bikorwa gahunda yahariwe siporo rusange haba mu mitegurire ndetse  n’uburyo abaturage  bayitabiriye mu mwaka wa 2018-2019.”

Umuyobozi wungirije ushinzwe Imibereho myiza y’abaturage  mu Karere ka Muhanga ari nako kaje ku isonga, Mukagatana Fortunee  yashimiye Komite Olempike y’u Rwanda n’Ubuyobozi bw’Intara y’Amajyepfo kuri iri shimwe babageneye avuga ko  bibateye imbaraga zo gukora cyane kandi ko basanze ari n’inyungu z’abaturage kuko gukora siporo biri mu bituma  bagira ubuzima bwiza.

Yakomeje avuga ko bagiye gukomeza gushishikariza abaturage muri rusange kuzajya bitabira.

Perezida wa Komite Olempike y’u Rwanda, Amb. Munyabagisha Valens yasabye ko   uretse umupira w’amaguru no gusiganwa ku maguru  hashyirwa n’imbaraga no mu mikino gakondo.

Nawe yashimiye utu turere uburyo twashishikarije abaturage kwitabira gahunda ya siporo kuri bose abasaba gukomeza kuko mu minsi iri imbere bizatanga umusaruro mwiza kuko siporo nimara kuba umuco  no mu bakiri bato bizageramo bityo impano ziboneke ari nyinshi.

Guverineri w’Intara y’Amajyepfo, CG Gasana K. Emmanuel   yavuze ko  iyi gahunda ya siporo kuri bose bagiye kuyongeramo ingufu banashishikariza  abakina imikino gakondo na bo kuyitabira.

Kuva muri 2013, Leta y’u Rwanda yatangije gahunda ya siporo kuri bose  igamije gushishikariza  Abanyarwanda gukunda no gukora siporo mu rwego rwo kugira ubuzima bwiza ndetse no kuyikundisha abakiri bato aho buri wa Gatanu nyuma saa sita aba ari umwanya wo gukora siporo.

Komite Olempike y’u Rwanda nk’urwego rureberera imikino muri rusange na bo batangiye gushyira ingufu  muri  iyi gahunda ya Siporo ya bose  uretse kuba ari ugushishikariza Abanyawanda gukora siporo  akaba ari  n’umwanya mwiza wo gushakisha abakinnyi bafite impano kugira ngo  zitezwe imbere.

Ubwo Akarere ka Muhanga kahize utundi kashyikirizwaga igihembo

Abayobozi muri Komite Olempike, Intara y’Amajyepfo ndetse na Depite Karinijabo bashyikiriza umuyobozi w’akarere ka Muhanga, Uwamariya igihembo

Babanje gukora siporo rusange

 

TANGA IGITEKEREZO

Leave a Reply

Your email address will not be published. Required fields are marked *