20°C , Partly cloudy | Kigali-Rwanda
Rutahizamu mushya wa APR FC, Usengimana Danny ufite intego zo guhatanira umwanya uhoraho

Usengimana afite intego yo guhanganira umwanya uhoraho

Yanditswe na Bizimana Eric

Ku ya 11-02-2019 saa 08:26:35

Usengimana Danny, rutahizamu w’ikipe ya APR FC n’ikipe y’igihugu Amavubi, aravuga ko afite intego yo guharanira umwanya uhoraho mu ikipe ye nshya.

Arabivuga nyuma yo kwerekanwa mu bakinnyi bashya b’iyi kipe bamuritswe ku wa Kane tariki 7 Gashyantare 2019, hamwe n’umutoza mushya Zlatko Krmpotić.

Usengimana azanye na rutahizamu Nshuti Innocent wagarutse mu rugo nyuma yo kutitwara neza muri Club Africain muri Tuniziya.

Yanasanze kandi APR FC ifite ba rutahizamu barimo; Sugira Ernest, Byiringiro Lague, Hakizimana Muhadjiri na Mugunga Yves.

Umutoza Zlatko avuga ko ashaka gushingira umupira we usatira kuri ba rutahizamu batatu. Usengimana agahamya ko kubona umwanya bisaba gukora cyane akazigaragariza uyu mutoza mushya.

Ati «Ahantu hose ntibiba byoroshye, hose usanga harimo guhangana gukomeye ariko ni wowe ugomba kumenya uko ubyitwaramo. Mu myaka umuntu aba akinnye aba amaze kubona ibintu byinshi, ikiza urakora ugashyiramo imbaraga kandi n’umutoza aba ari mushya, uragenda ukamwiyereka ubundi ukabona gukina.»

Ma.j Gen. Mubaraka Muganga, Visi Perezida wa APR FC avuga ko Usengimana ari umwe mu bakinnyi bakomeye kandi bizeyeho kuzabafasha muri uyu mwaka. Anahamya ko niyitwara neza akabona indi kipe yo hanze bazamuha amahirwe yo kugenda.

Ati «Nkuko nanabivuze ubushize, umukinnyi wese w’u Rwanda ugaragaza ububasha n’iyo yaba ari ikiguzi kingana gute twagitanga kuko tuba dushaka kurerera Amavubi kurusha na APR, kuko iyo Amavubi akina neza na APR FC ibyungukiramo. Danny ni umukinnyi wacu kuva dutanga urutonde, igihe cyose rero haboneka indi kipe imushaka, ikatwandikira, twamureka akajya kugerageza amahirwe. Ubu twizeye ko azadufasha.»

Rutahizamu mushya wa APR FC, Usengimana Danny ufite intego zo guhatanira umwanya uhoraho

TANGA IGITEKEREZO

Leave a Reply

Your email address will not be published. Required fields are marked *