17°C , Partly sunny | Kigali-Rwanda

USA zasezeranyije gukomeza kuba umufatanyabikorwa w’u Rwanda

Yanditswe na TWAGIRA WILSON

Ku ya 25-05-2018 saa 09:00:17

Ambasaderi Peter Vrooman uhagarariye Leta zunze ubumwe z’Amerika (USA) mu Rwanda, avuga ko igihugu ke kizakomeza kuba umufatanyabikorwa mwiza w’u Rwanda ku birebana n’ishoramari  mu nzego zitandukanye zirimo ubuzima, ubuhinzi, uburezi n’izindi,  aho yatanze ingero z’uko  kugeza ubu Leta zunze ubumwe z’Amerika zimaze gushora miliyoni 300 z’amadorari y’Amerika mu rwego rw’ingufu, ahwanye na miliyari zikabakaba 270  000 000 z’amafaranga y’u Rwanda.

Amb. Peter Vrooman uhagarariye Leta Zunze Ubumwe z’Amerika mu Rwanda (Foto Twagira W.)

Amb. Peter yabivugiye mu Nteko Ishinga Amategeko, ejo hashize ku wa Kane tariki ya 24 Gicurasi 2018, mu kiganiro yahaye itangazamakuru ubwo yari amaze kwakirwa no kuganira na Perezida w’Umutwe w’Abadepite Hon. Mukabarisa Donatille. Ibiganiro byabo byagarutse ku mubano w’ibihugu byombi, aho Mukabarisa avuga ko wifashe neza, kandi ko uzakomeza kurushaho kuba mwiza.

Amb. Peter yagize ati Murabona Amerika ni kimwe mu bihugu byabaye hafi u Rwanda nyuma ya Jenoside yakorewe Abatutsi mu 1994, kugeza ubu u Rwanda ni umufatanyabikorwa mwiza dukorana mu nzego zitandukanye nk’ubuzima, uburezi, ndetse n’ubuhinzi,  ntanze urugero, nko mu rwego rw’ingufu Amerika imaze gushora miliyoni 300 z’amadorali y’Amerika mu birebana n’ingufu z’amashanyarazi, kandi tuzakomeza kuyongera,  ndetse dukangurire n’abandi bashoramari kuzana imari yabo mu Rwanda.”

Ku birebana n’ibiganiro abayobozi bombi bibanzeho, Ambasaderi w’Amerika yavuze ko bagarutse ku ntambwe u Rwanda rumaze gutera mu birebana n’iterambere ry’abagore nuko bahawe ubushobozi, guha ubushobozi abafite ubumuga, ndetse n’imikoranire n’Inteko z’ibihugu byombi.

TANGA IGITEKEREZO

Leave a Reply

Your email address will not be published. Required fields are marked *