19°C , Mostly cloudy | Kigali-Rwanda
Brett Kavanaugh (uwa mbere ibumoso) yarahiriye inshingano z'Umuyobozi w'Urukiko rw'Ikirenga rwa Leta Zunze Ubumwe z'Amerika imbere ya Perezida Donald Trump ku wa 7 Ukwakira 2018 (Fofo Reuters)

USA: Trump yihanganishije Kavanaugh nyuma yo kurahira

Yanditswe na KAYIRA ETIENNE

Ku ya 09-10-2018 saa 16:44:37

Sena ya Leta Zunze Ubumwe z’Amerika (USA) yarashyize yemeza umucamanza Brett Kavanaugh ku mwanya w’Umuyobozi w’Urukiko rw’Ikirenga.

Ni nyuma y’impaka ndende zajemo n’ibirego by’uko ngo Brett yaba yarigeze gukora icyaha cyo gufata ku ngufu akiri ingimbi.

Nyuma yo kurahirira uyu mwanya ukomeye w’ubutabera mu Ngoro Yera (Maison Blanche) ku itariki 8 Ukwakira 2018, Perezida Donald Trump yihanganishije Kavanaugh ku ntambara yahuye na yo anasaba imbabazi umugore we n’abana be.

Brett Kavanaugh (uwa mbere ibumoso) yarahiriye inshingano z’Umuyobozi w’Urukiko rw’Ikirenga rwa Leta Zunze Ubumwe z’Amerika imbere ya Perezida Donald Trump ku wa 7 Ukwakira 2018 (Fofo Reuters)

Radio Mpuzamahanga y’u Bufaransa RFI, itangaza ko Perezida Trump yiruhukije ubwo Abasenateri 50 batoye bemeza ko Umucamanza Kavanaugh yahisemo akwiriye umwanya w’Umuyobozi Mukuru w’Urukiko rw’Ikirenga rw’Amerika.

Ku rukuta rwe rwa Twita Donald Trump yagize ati «Nshimiye cyane abagize Sena umurimo mwiza bakoze. Mu izina ry’Abanyamerika, mboneyeho gusaba imbabazi Brett Kavanaugh n’umumuryango we ku bitutsi yatutswe bidafite ishingiro ariko akabyihanganira kugeza kuri iyi ntambwe yo guhabwa inshingano yateganyirijwe nta jambo ribi yumvikanishije.»

Ibitangazamakuru mpuzamahanga bitandukanye, byamenyesheje ko Trump yagombye gushimira Sena kuko iyo uru rwego rujya kwanga kwemeza uyu mushinjacyaha mukuru yahisemo, ngo we n’abo mu ishyaka ry’Abarepubulike avamo bari kuba batsinzwe urugamba rwa politiki ku buryo byari kugira ingaruka itari nziza ku butegetsi bwe.

Koko urwo rugamba ntirwari rworoshye kuko Abasenateri 48 bose bari batoye banga kwemeza Kavanaugh kuri uriya mwanya. Nk’uko bisanzwe, abakeba b’Abademokarate ni bo batashakaga ko Umucamanza Brett ayobora Urukiko rw’Ikirenga rw’Amerika.

Nubwo yemejwe binyuze mu matora atari yoroshye y’Abasenateri ku wa Gatandatu w’icyumweru gishize nk’uko bitangazwa na RFI, mu ijambo yagejeje ku bari bitabiriye uwo muhango muri Perezidansi y’Amerika ejo bundi hashize ku wa Mbere, Brett Kavanaugh yasezeranyije ko azakora imirimo ashinzwe atabogamye.

Yagize ati «Urukiko rw’Ikirenga ni urwego rw’amategeko. Nta bwo ari urwego rw’umuntu ku giti ke, nta n’ubwo ari urwego rwa politiki. Rugizwe n’itsinda ry’abacamanza 9, nge nkaba nshinzwe guhuza ibikorwa n’iyo kipe y’abanyamategeko.»

Brett asoza ijambo rye yijeje abari aho ko azaharanira ubutabera bungana ku Banyamerika bose nk’uko biteganywa mu Itegeko Nshinga ry’Igihugu.

Marie Bourreau, umunyamakuru wihariye wa RFI i New York yatangaje ko iyi nsinzi isobanuye ikintu gikomeye kuri Perezida Trump ku giti ke no ku barepubulike muri rusange. Ati «Impamvu ni uko Urukiko rw’Ikirenga ari rwo rwego rukuru rw’ubutabera bw’Amerika, rufata ibyemezo bitavuguruzwa ku mpaka zose abanyapolitiki batumvikanaho.»

Urugero rwa hafi ni impaka ku bibazo by’imibereho y’abaturage barimo: uburenganzira bwo kuvanamo inda, ubwiteganyirize mu kwivuza bwiswe Obamacare cyangwa gushakana hagati y’abahuje ibitsina. Aba bacamanza ibyo bazemeza mu gihe bibaye ngombwa ko bishyikirizwa Urukiko rw’Ikirenga ni byo bizakurikizwa kandi Abarepubulike bafitemo ubwiganze ugereranyije n’Abademokarate.

TANGA IGITEKEREZO

Leave a Reply

Your email address will not be published. Required fields are marked *