USA: Icyumweru cyo gufata ikemezo kuri dosiye yo kweguza Trump

Yanditswe na Kayira Etienne

Ku ya 09-12-2019 saa 17:32:13
Donald Trump Perezida w'Amerika ari mu Ngoro Yera ku wa 6 Ukuboza 2019 (Foto AFP)

Ni muri iki cyumweru hategerejwe gufata ikemezo kuri dosiye y’ubufatanyacyaha hagati ya Donald Tump, Perezida wa Leta Zunze Ubumwe z’Amerika (USA), na mugenzi we wa Ukraine mu kugambanira Joe Biden uteganya kuzahangana na Trump mu matora y’ubutaha. Ikigaragara cyo ni uko ngo Abademokarate batagifite umurego nk’uwo bari bafite mbere kubera ko muri Kongere bacitsemo ibice.

Radio Mpuzamahanga y’u Bufaransa RFI, itangaza ko dosiye Trump aregwamo n’Abademokarate ikomeje kuba ingutu.

Iti “Perezida Donald Trump ubwe, avuga ko ari dosiye y’umwanda uzanwa n’Abademokarate atitaye ko bari mu bagomba kugira uruhare mu kemezo kigomba gufatwa n’abagize Kongere y’Amerika muri iki cyumweru  uyu munsi.”

Komisiyo y’Ubutabera ngo igomba kuba yasoje iki gikorwa mu mpera z’iki cyumweru, hagakurikiraho abagize Sena bagomba gutorera iki kemezo, yiganjemo Abarepubulika bigaragara ko ngo bazatora ko Trump ari umwere muri iriya dosiye.

RFI iti “Ni yo mpamvu Abademokarate bacitsemo ibice kugeza ubu. Icya mbere gishoboka ni ukugayira mu ruhame Donald Trump ibyo yavuganye na mugenzi we wa Ukraine, bisa no kumena ibanga ry’Amerika ku banyamahanga. Icya kabiri kitezwe ni ukweguza Trump ku mwanya w’Umukuru w’Igihugu, uretse ko iki kemezo cya nyuma gifite amahirwe make yo gutambuka.”

Nubwo ikemezo cya nyuma kitarafatwa, byatangiye kugaragaza ko Abademokarate bamwe bagize ubwihebe ko icyo baharaniye cyo kweguza Trump kitagezweho.

Perezida Donald ubwe ngo yatangiye gukina ku mubyimba abo yita abanzi be, agira ati “Insinzi iri ku ruhande rwacu.”

Umwanditsi:

Kayira Etienne

Tanga Igitekerezo

Email yanyu ntigaragazwa ku rubuga. Amazina na Email ni ngombwa.