26°C , Partly sunny | Kigali-Rwanda
Donald Trump na Dr Ronny Jackson umuganga ushinzwe kumuvura ku ya 12 Mutarama 2018(AFP)

USA: Ibizamini byagaragaje ko Trump ari muzima mu mutwe

Yanditswe na KAYIRA ETIENNE

Ku ya 18-01-2018 saa 06:58:57

Mu rwego rwo kubeshyuza inkuru zimaze iminsi hafi icyumweru zicicikana mu bitangazamakuru mpuzamahanga bimwe no ku mbuga nkoranyamabaga hirya no hino ku isi ko ubwonko bwa Perezida wa Leta Zunze Ubumwe z’Amerika (USA) Donald Trump bwaba budakora neza kubera amagambo avuga asa n’atarimo ubwenge, Trump yasabye abaganga kumukorera isuzuma. Nyuma y’aho ibisubizo by’ibizamini yakorewe bisohokeye ku wa Kabiri w’iki cyumweru, Dr Ronny Jackson yatangarije abanyamakuru ko Trump ari muzima.

Donald Trump na Dr Ronny Jackson umuganga ushinzwe kumuvura ku ya 12 Mutarama 2018(AFP)

France24 yamenyesheje ko Dr Ronny Jackson, umuganga wa Perezida wa Leta Zunze Ubumwe z’Amerika ukorera mu Ngoro Yera (Maison Blanche) yatangaje ko ibizamini byihariye bigamije kumenya uko ubushobozi bw’imitekererezi y’umutwe ihagaze yakorewe ngo byagaragaje ko Donald Trump nta kibazo na kimwe afite cyatuma abantu bamwibazaho ku bijyanye n’ubushobozi bw’ubuzima bw’ubwenge. Yagize ati « Ibizamini byerekanye ko atekereza neza 30/30. Nta burwayi afite nta n’ikibazo afite mu bwonko ». Umuganga we yatangaje ko ubuzima bw’umukuru w’igihugu cya USA bumeze neza muri rusange.

Ngo byagaragaye ko Trump afite amahirwe menshi kuko atanywa itabi n’inzoga. Dr Ronny yakomeje agira ati « Ahubwo ibyavuye mu bizamini byagaragaje ko Perezida wa Leta  Zunze Z’Amerika afite imbaraga n’ubushobozi bidasanzwe byo gukorera igihugu neza, ndetse yanakora n’indi manda ya kabiri ubuzira ikibazo ». Gusa, muri ibyo bizamini ngo byagaragaye ko Donald agomba kugabanyaho ibiro biri hagati 4 na 7, mu bigera ku 108 afite ku burebure bwa metero imwe na santimetero 90 z’uburebure. Umutima we ngo utera neza nta kibazo afite. Muganga we yamugiriye inama n’uko yatangira gukora imyitozo ngororamubiri.

France24 itangaza ko Donald Trump ari we wisabiye abaganga  kumukorera ibizamini. Ngo byavuye ku gitabo cyanditswe na Michael Wolff cyasohotse mu minsi mike ishize, gifite umutwe ugira uti “Fire and Fury: In the Trump White House”. Ugenekereje mu Kinyarwanda wavuga ngo, “Umuriro n’Umujinya w’umuranduranzuki bya Trump muri Perezidansi y’Amerika”.

Aha umwanditsi w’iki gitabo ashingiye ku buhamya yahawe n’abakora mu Ngoro Yera, yakusanyije amagambo Trump avugiramo nk’ikimenyetso cy’uko afite ikibazo k’imitekerereze ku buryo hari abahise batangaza ko arwaye mu mutwe. Abamukeka kugira ubwo burwayi bwo mu mutwe, bibutsa ibyo aherutse gutuka ibihugu by’Afurika abigereranya n’imisarani ubwo yari mu nama n’intumwa za rubanda muri Perezidansi y’Amerika na none.

TANGA IGITEKEREZO

Leave a Reply

Be the First to Comment!

avatar