19°C , Mostly clear | Kigali-Rwanda
Umuvunyi Mukuru wungirije ushinzwe kurwanya ruswa Musangabatware Clément (Foto Gentil G)

Urwego rw’Umuvunyi rufata Abahesha b’inkiko nk’indorerwamo y’ubutabera

Yanditswe na Twagira Wilson

Ku ya 14-06-2019 saa 16:56:24

Umuvunyi Mukuru wungirije ushinzwe kurwanya ruswa Musangabatware Clément asanga Abahesha b’inkiko b’umwuga ari nk’indorerwamo imikorere myiza y’ubutabera mu gihugu igomba kureberwamo.

Yabitangarije i Kigali kuwa 13 Kamena 2019, mu kiganiro yahaye Abahesha b’inkiko basaga 100 bakorera hirya no hino mu gihugu, mu nama yateguwe n’Urwego rw’umuvunyi.

Abahesha b’inkiko b’umwuga baganirijwe kugukumira no kurwanya ruswa, aho bibukijwe ko mu byo basabwa ari uguharanira kuzuza inshingano zabo, bafasha guha ubutabera abaturage nta kubogama, nubwo utubazo tutabura mu rwego rw’imigengekere myiza y’ubutabera.

Musangabatware ati: “Abahesha b’inkiko ni mwe ndorerwamo imikorere myiza y’ubutabera igomba kureberwamo, murasabwa ku kuza ku isonga mu kuzuza no gutanga ubutabera umuturage akeneye mutanga isura nziza y’ubutabera, kuko igihugu kirimo ruswa ntashoramari ritera imbere, ndetse n’ibikorwa remezo nta bwo biramba’’.

Umuvunyi Mukuru wungirije ushinzwe kurwanya ruswa Musangabatware Clément (Foto Gentil G)

Musangabatware yabibukije amwe mu mategeko mashya yashyizweho n’andi yavuguruwe hagamijwe guhana no gukumira icyaha cya ruswa n’ibifitanye isano nayo, aho yagarutse ku ngingo ya 21 y’itegeko, aho ruswa yashyizwe mu byaha bidasaza.

Kabera Vedaste uyobora urugaga rw’Abahesha b’inkiko b’umwuga, yabwiye Abahesha b’inkiko ko ari bo bantu bari ku isonga mu kugaragaza igipimo k’imiyoborere myiza mu gihugu, ashingiye ku itegeko abasaba kuba inyangamugayo, kutabogama mu myitwarire yabo mu kazi, ku buryo baha umuturage ibyo yatsindiye birinda aho ari ho hose hashobora kugaragara icyuho cya ruswa.

Yagize ati: “Murasabwa kwirinda ahaboneka icyuho cya ruswa, Abahesha bashobora kugira uruhare mu gupfobya imitungo basabwa kubicikaho, kuko iyo agaragaye ahanwa harimo no gusezererwa mu kazi”.

Abahesha b’inkiko bakaba barasabwe guhesha umuturage ubutabera bamufasha guhabwa ibyo yatsindiye mu nkiko nta yandi mananiza, kuko bihesha igihugu isura nziza mu rwego rw’ubutabera.

TANGA IGITEKEREZO

Leave a Reply

Your email address will not be published. Required fields are marked *