19°C , Mostly cloudy | Kigali-Rwanda

Urwego rw’Umuvunyi: Ingaruka za ruswa ziraremereye

Yanditswe na Ntawitonda Jean Claude

Ku ya 20-12-2019 saa 16:01:06
Umuvunyi Mukuru Anastase Murekezi na Guverineri w'Intara y'Amajyepfo Emmanuel K. Gasana bahemba Akarere ka Gisagara kahize utundi turere

Mu gihe k’ibyumweru bitatu by’Icyumweru cyahariwe kurwanya ruswa, cyatangiye ku itariki ya 17 Ugushyingo kigasozwa ku ya 09 Ukuboza 2019 ubwo hizihizwaga Umunsi Mpuzamahanga wahariwe kurwanya ruswa muri uyu mwaka, ubutumwa bwatanzwe bwibanze ku kugaragaza uburemere bwa ruswa.

Umuvunyi Mukuru Anastase Murekezi, yibukije abaturage ko ruswa imunga umuryango n’Igihugu kuko aho yahawe ikicaro, usanga amafaranga yakagiriye akamaro abaturage ajya mu mifuka ya bamwe, maze abakeneye serivisi ntibazihabwe, abarengana ntibarenganurwe, akazi kagahabwa utagakwiye.

Yasabye abaturage n’abayobozi kurangwa n’umuco w’ubupfura ndetse no kubahiriza indangagaciro na kirazira kuko ababifite bagendera kure ruswa n’igisa na yo cyose, bakarinda Igihugu kugwa mu kaga gakururwa na yo.

Mu muhango wo gutangiza ubukangurambaga ku kurwanya ruswa mu Murenge wa Rwempasha mu karere ka Nyagatare tariki ya 03 Ukuboza 2019,  Murekezi yagize ati: “Abayobozi, abaturage, abana, abakuru, abanyeshuri, abarimu twese twese, dufatanye; ari inzego za Leta, iz’abikorera, abacuruzi, imiryango mpuzamahanga ikorera mu Rwanda dufatanye twange ruswa”.

Ibikorwa byo muri icyo cyumweru byabimburiwe n’ibiganiro byatanzwe ku maradiyo atandukanye yo mu Rwanda, bikurikirwa n’umuhango wo gutangiza ku mugaragaro ibikorwa byari biteganyijwe.

Igikorwa cya kabiri cyabaye icy’urugendo rwo kurwanya ruswa, gikurikirwa n’ubukangurambaga bwo gukangurira abaturage ububi bwa ruswa. Hanatanzwe ibihembo ku turere twahize utundi mu mikorere y’Inama Ngishwanama zo kurwanya ruswa n’akarengane (DACACI).

Ishyirwaho ry’Inama Ngishwanama zo Kurwanya Ruswa n’Akarengane kuva ku rwego rw’Igihugu kugera ku rwego rw’Akagari riteganywa n’Iteka rya Perezida nº 64/01 ryo ku wa 12/02/2014 rigena inshingano, imiterere n’imikorere byazo.

Uturere twahembwe ni utwashyize mu bikorwa inshingano zirimo gushyiraho ingamba zo kurwanya ruswa n’akarengane mu Karere, gushyira mu bikorwa ingamba zo kurwanya ruswa n’akarengane zashyizweho n’Inama Ngishwanama ku rwego rw’Igihugu, gusesengura inyandiko zakozwe kuri ruswa n’akarengane, gushyiraho uburyo bwo guhana amakuru hagati y’inzego zishinzwe kurwanya ruswa n’akarengane, kwegeranya imibare y’amadosiye ya ruswa n’akarengane, kugena inshingano no gukurikirana imikorere by’Inama Ngishwanama ku rwego rw’Umurenge n’Akagari.

Iburasirazuba

Akarere ka Gatsibo kahize utundi turere mu guhanga udushya mu bijyanye no kurwanya ruswa n’imikorere inoze ya DACACI.

Mu muhango wabereye i Rwempasha mu Karere ka Nyagatare, Urwego rw’Umuvunyi rwatangaje ko Gatsibo yagize amanota 90%, ikurikirwa n’Akarere ka Nyagatare kagize amanota 89%, Rwamagana 87.5%, Kayonza 85%, Ngoma 84%, Bugesera 77% na Kirehe yagize 69%.

Iburengerazuba

Mu muhango wabereye mu Murenge wa Kanama, Akarere ka Rubavu kaje ku isonga n’amanota 84.5%. Umuvunyi Mukuru Anastase Murekezi, yashimye ako Karere intambwe kateye mu kurwanya ruswa, nyuma y’igihe kaza mu turere turimo ruswa nyinshi nk’uko byagaragajwe na raporo zitandukanye.

Akarere ka Rubavu kakurikiwe na Rusizi yagize 80.5%, Nyamasheke igira 79%, Rutsiro igira 54%, Karongi igira 43.5% na ho Ngororero igira 10%.

Amajyepfo

Umuhango wabereye mu Murenge wa Mbazi mu Karere ka Huye, maze Akarere ka Gisagara gahiga utundi mu guhanga udushya mu kurwanya ruswa n’imikorere inoze ya DACACI.

Gisagara yakurikiwe na Ruhango yagize amanota  87%, Nyanza n’amanota 81%, Muhanga 65,5%, Huye 61,5%, Nyaruguru 23% na Nyamagabe yagize amanota 10%.

Amajyaruguru

Umuhango wabereye mu Murenge wa Shingiro mu Karere ka Musanze.  Akarere ka Rulindo ni ko kaje ku isonga n’amanota 90%, gakurikirwa n’aka Gakenke kagize amanota 66%, aka Gicumbi 58%, aka Burera 10%, haheruka aka Musanze kagize amanota 10% gusa.

Abaturarwanda bose, cyane cyane urubyiruko, bibukijwe uruhare rwabo mu kurwanya ruswa hagamijwe kuyirandura burundu nk’uko insanganyamatsiko y’uyu mwaka igira iti: “Duhuze Imbaraga Turwanya Ruswa.”

Umunsi wahariwe Kaminuza mu kurwanya ruswa

Tariki 4 Ukuboza hizihijwe Umunsi wahariwe Kaminuza n’Amashuri Makuru mu kurwanya ruswa; abayobozi, abarimu n’abanyeshuri muri za Kaminuza n’Amashuri makuru basabwe  kwamagana ruswa kubera ko imunga ubukungu bw’Igihugu.

Umuvunyi Mukuru Wungirije ushinzwe gukumira no kurwanya ruswa, Musangabatware Clement yagize ati: “Kaminuza n’Amashuri Makuru biri mu nzego zishinzwe uburere n’uburezi bw’abana, turazisaba kujya zinabigisha kurwanya no kwanga ruswa.”

Urubyiruko rwibukijwe imbaraga rufite mu kurwanya ruswa

Urubyiruko rw’u Rwanda na rwo rwibukijwe ko rufite imbaraga nk’iz’amazi n’umuriro zikenewe mu rugamba rwo kurwanya ruswa, kuko rugize ubushake rwahindura byinshi Igihugu kirwitezeho cyane ko rugize umubare munini w’abagituye.

Ku Munsi wahariwe Urubyiruko wahuje abarenga 300, Umuvunyi Mukuru yagize ati: “Ruswa irigaragaza ni yo mpamvu urebye imibare dufite, usanga ruswa mu gushaka akazi, ruswa mu gushaka amanota, kandi mu rubyiruko. Ni yo mpamvu twaganiriye n’ urubyiruko kugira ngo bayirinde kandi batoze barumuna babo kwirinda iyo ruswa”.

Ku mukino wa 11 wa Shampiyona wahuje Kiyovu Sports na Rayon Sports tariki ya 1 Ukuboza 2019 hatangiwe ubutumwa bugamije kurwanya ruswa, buri wese asabwa kubigiramo uruhare.

Mu Rwanda hatangiwe ibihembo mpuzamahanga byo kurwanya ruswa

Tariki 9 Ukuboza ku Munsi Mpuzamahanga wahariwe kurwanya ruswa, u Rwanda rwakiriye umuhango wo gutanga ibihembo ngarukamwaka byiswe ‘Sheikh Tamim Bin Hamad Al Thani International Anti-Corruption Excellence Award’ bitanzwe ku nshuro ya 4, n’iya mbere bitangiwe ku mugabane w’Afurika.

Muri uwo muhango Perezida Paul Kagame yashimiye Umuyobozi w’Ikirenga (Emir) wa Qatar, Sheikh Tamim Bin Hamad Al Thani, wahisemo gutangira ibi bihembo mu Rwanda, anashimangira ko ari igikorwa kizakomeza kwibutsa Abanyarwanda umukoro bihaye wo kurwanya ruswa ubudacogora.

Yagize ati: “Iki ni igikorwa  kizakomeza kutwibutsa gukomeza kugaragara no gutanga umusanzu mu kurwanya ruswa nubwo kuyirwanya ari urugendo u Rwanda rusanzwe rwaratangiye, iki ni ikimenyetso gikomeye gisobanura kuvugisha ukuri, no  guhagarara twemye muri gahunda zikenewe mu kurwanya ruswa”.

Ibirori byitabiriwe n’abantu 600, barimo urubyiruko rwaturutse mu bice bitandukanye by’Igihugu, abahembwe n’abagize inama y’ubutegetsi y’abategura ibi bihembo.

Ku nshuro ya kane, ibi bihembo byahawe abantu barindwi babaye indashyikirwa ku Isi mu kurwanya ruswa no kwimakaza ugukorera mu mucyo bari mu byiciro bine birimo icyo Kwihangira Umurimo, icy’Urubyiruko, icy’Uburezi n’ik’Ibihe byose.

Umuvunyi Mukuru Anastase Murekezi ashimangira ko ingaruka za ruswa zidindiza iterambere ry’umuryango n’iry’Igihugu

Umuyobozi Wungirije wa Kaminuza, Philip Cotton mu batanze ibiganiro byamagana ruswa

Abaturage bari bateze amatwi ubutumwa bw’Umuvunyi Mukuru

Hahembwe abanyamakuru bakoze inkuru zicukumbuye kuri ruswa n’akarengane

Icyumweru cyahariwe kurwanya ruswa cya 2019, cyateguwe ku bufatanye n’Umuryango w’Ubumwe bw’u Burayi (European Union)

Umwanditsi:

Ntawitonda Jean Claude

One Comment on “Urwego rw’Umuvunyi: Ingaruka za ruswa ziraremereye”

  1. Mu nzego z’ibanze ndetse no mumitangire ya serivisi z’ubutaka haracyagaragara RUSWA cyane bityo ndasaba inzego zibishinzwe gukomeza gukora ubukangurambaga no kwigisha kuko rwose abaturage baraharenganira bikomeye.

Tanga Igitekerezo

Email yanyu ntigaragazwa ku rubuga. Amazina na Email ni ngombwa.