19°C , Mostly cloudy | Kigali-Rwanda
Minisitiri w'intebe Dr. Ngirente Edouard iburyo acanira urubyiruko urumuri rw'ikizere, mu muhango wo kwibuka abakozi bahoze bakora mu biro bya Minisitiri w'Intebe (Foto Samuel M)

Urumuri rw’Ikizere rutubere ikimenyetso cyo gutana n’umwijima – Dr. Ngirente

Yanditswe na Mutungirehe Samuel

Ku ya 15-04-2019 saa 09:28:53

Minisitiri w’Intebe, Dr. Ngirente Edouard, yasabye Abanyarwanda gukomeza urumuri rw’ikizere rukababera ikimenyetso cyo gutana burundu n’umwijima waranze amwe mu mateka y’u Rwanda.

Ni ubutumwa yahaye Abanyarwanda, by’umwihariko abitabiriye umugoroba wo kwibuka Abatutsi bakoraga mu biro bya Minisitiri w’Intebe, muri gahunda yo kwibuka ku nshuro ya 25 Jenoside yakorewe Abatutsi mu 1994.

Dr. Ngirente amaze gucana urumuri rw’Ikizere, yavuze ko rukwiye gutandukanya u Rwanda n’umwijima ukundi, bityo rukwiye gusigasirwa. Ati “Urumuri rw’ikizere rukomeze kutubera ikimenyetso cyo gutana burundu n’umwijima waranze amwe mu mateka mabi y’igihugu cyacu.

Urwo rumuri twacanye rudufashe gukomeza gusenyera umugozi umwe nk’Abanyarwanda bashyize hamwe. Uru rumuri kandi by’umwihariko, ruzamurikire urubyiruko rwacu ari yo mizero y’ejo hazaza kugira ngo rukomeze guharanira gukora neza rukora ibyiza.”

Minisitiri w’Intebe yongeye kwibutsa Abanyarwanda ijambo rya Perezida Paul Kagame yavuze ubwo yatangizaga icyumweru k’icyunamo cyo kwibuka ku nshuro ya 25 Jenoside yakorewe Abatutsi, ko u Rwanda rudashobora kwihanganira kuba mu mateka yisubiramo, ya Jenoside, bityo kimwe n’abandi banyarwanda urubyiruko narwo rukwiye kubigiramo uruhare, rusigasira ibyagezweho mu kubaka u Rwanda rwifuzwa.

Ati “Amateka rero atari meza yagiye aranga igihugu cyacu tukaba twizeye ko urubyiruko ruzayarwanya, rukabana neza, abana bato bagakurira mu gihugu kiza, abakuru na bo tugakora imirimo dushinzwe dushingiye kuri uwo musingi washyizweho kugira ngo igihugu gikomeze gutera imbere ari mu nzego zose, zaba iz’ubukungu, imibereho myiza n’imiyoborere.”

Umujyanama wa Perezida wihariye mu by’umtekano, Gen. Kabarebe James, yatanze ikiganiro ku ntandaro y’uburyo ubukungu n’imitegekere y’igihugu mbere ya Jenoside byatumye abakennye batazuyaza kumvira ababashukaga kwica abaturanyi, abavandimwe n’inshuti zabo bari basanzwe basangiye byose, ngo nibabikora barabona amahirwe yo gusigarana ibyabo kuko ntako bari bameze.

Ati “Abayoboye u Rwanda, baruyoboye ku buryo barukenesheje ugasanga igihugu ni abayobozi bo hejuru n’ingabo bibashyigikiye, hagati nta kintu gihari nk’uko ibindi bihugu usanga ubutegetsi bufite ubukungu buciriritse, bukagira n’abaturage. Mu Rwanda byari abategetsi bakomeye nta kindi gihari hagati kugeza hasi ari abaturage batindahaye. Uwo muturage ukeneshejwe utindahaye mu mitekerereze, ku buryo kumushumuriza ngo genda wice uyu urabona iki, umwanzi wawe ni uyu, nta gutekereza agira.”

Yakomeje avuga ko iyo politiki ari yo ingabo za FPR-Inkotanyi zaje guhindura, mu gitekerezo cyo kuvuga ngo bashobora kubaka igihugu Abanyarwanda bose bahuriyeho, gutera imbere n’ibindi byinshi, bahangana n’ibitekerezo byo kubima umwanya mu gihugu, ko Umututsi agomba kugenerwa uko abaho, akicwa igihe bashakiye, akavutswa uburenganzira, nta yandi mahitamo ahari.

Mu buhamya bwatanzwe na Kabera Jean Paul warokokeye mu Bugesera aho umuryango we wari warimuriwe uvanywe mu Ruhengeri ngo bazicwe n’isazi ya Tsetse yo mu Bugesera, yavuze inzira igoye yanyuzemo Abatutsi bicwaga bagerageza kwirwanaho ariko bikanga, ku bw’Ingabo za RPA akarokorwa akaba n’ubu akiriho kandi afite ikizere cyo kubaho.

Minisitiri w’intebe Dr. Ngirente Edouard iburyo acanira urubyiruko urumuri rw’ikizere, mu muhango wo kwibuka abakozi bahoze bakora mu biro bya Minisitiri w’Intebe (Foto Samuel M)

TANGA IGITEKEREZO

Leave a Reply

Your email address will not be published. Required fields are marked *