28°C , Partly sunny | Kigali-Rwanda

Uruhare rw’u Rwanda mu gucecekesha imbunda muri Afurika

Yanditswe na NTAWITONDA JEAN CLAUDE

Ku ya 25-05-2020 saa 13:06:52
Gucecekesha imbunda biracyari intego nyamukuru y'Umugabane w'Afurika

Kuri uyu wa Mbere tariki ya 25 Gicurasi u Rwanda rwifatanyije n’Abanyafurika bose kwizihiza Umunsi w’Ubwigenge bw’Afurika wizihijwe ku nsanganyamatsiko igira iti: “Gucecekesha imbunda: Kuremera ikirere kiza iterambere ry’Afurika.”

Uyu munsi wizihijwe mu gihe uyu mwaka wa 2020 ari wo Abakuru b’Ibihugu by’Afurika na Guverinoma zigize Umuryango w’Ubumwe bw’Afurika (AU) bemeje nk’intego ya gahunda yo guhagarika intambara ku Mugabane wa Afurika yiswe Gucecekesha Imbunda (Silence The Guns), yatangiye mu mwaka wa 2013.

Minisitiri w’Ububanyi n’Amahanga akaba n’Umuvugizi wa Leta y’u Rwanda Dr. Biruta Vincent, yatangaje ko u Rwanda rutazateshuka ku ntego rwiyemeje yo kubungabunga amahoro no gucecekesha imbunda ku Mugabane w’Afurika n’ahandi.

Ni mu ijambo yafashe ubwo yiyungaga ku bandi bayobozi b’Afurika  bitabiriye umuhango wo kwizihiza uyu munsi hifashishijwe ikoranabuhanga.

Minisitiri w’Ububanyi n’Amahanga akaba n’Umuvugizi wa Leta y’u Rwanda Dr. Biruta Vincent

Yagize ati: “U Rwanda rwiyemeje kugira uruhare mu bikorwa byo kubungabunga amahoro ku Mugabane wacu no hanze yawo, haba kurinda abasivili no gufatanya n’abandi kugera ku ntego wihaye yo gucecekesha imbunda.”

Minisitiri Dr. Biruta yakomeje avuga ko gucecekesha imbunda bikiri intego nyamukuru, ashimangira ko koroshya ubuhahirane no kurema isoko rimwe (AfCFTA) ari intambwe igeza Afurika ku nzozi zayo zo kugera ku mahoro n’umutekano birambye, bijyanya n’iterambere ry’ubukungu ridasigaza n’umwe inyuma.

Yemeje adashidikanya ko mu gihe ibyo bigezweho umuzi w’ibibazo byinshi Afurika ihura na byo uzaranduka burundu.

Umunsi udasanzwe mu bihe bidasanzwe bya COVID-19

Minisitiri Dr. Biruta yashimangiye ko nubwo uyu munsi wizihijwe mu bihe bidasanzwe byo kwirinda icyorezo cya Koronavirusi (COVID-19), ari umunsi udasanzwe kuko wongera gukangurira Abanyafurika kwitekerezaho.

Yavuze ko icyo cyorezo cyayogoje Isi cyatumye mu bihugu bitandukanye habonekamo imfu nyinshi, n’ibibazo bikomeye by’ubukungu by’umwihariko muri Afurika. Ati: “Dufatanyije tuzabitsinda twongere gusubira ku murongo vuba aha.”

Yashimangiye ko Umunsi w’Ubwigenge bw’Afurika utanga amahirwe yo gushimangira umuhate w’abakurambere baharaniye ko Afurika yigenga (bashinga Umuryango w’Ubummwe bw’Afurika (OUA) mu 1963) utaba impabusa.

Yagarutse ku gaciro k’insanganyamatsiko y’uyu mwaka igaragaza igisubizo ku bibazo by’amakimbirane y’urudaca arangwa ku Mugabane w’Afurika , ikaba ari ingenzi by’umwihariko muri ibi bihe COVID-19 yibasiye ubuzima bw’abantu n’ubukungu bwabo.

Ati: “Guharanira ubwigenge bw’Afurika bikomeje uyu munsi, bishingiye ahanini ku guhangana n’imbogamizi z’ubukene n’iziboneka mu kwishyira hamwe k’Umugabane wacu. Byose ntibyarwaho hatabanje gukemurwa ibibazo by’amakimbirane muri Afurika, kuko umutekano n’iterambere bifitanye isano ya hafi.”

Ubuyobozi bw’Umuryango w’Ubmwe bw’Afurika bwatangaje ko gucecekesha intwaro bisaba ibihugu byose kwimakaza imiyoborere myiza, no kubahiriza amahame y’uburenganzira bw’ikiremwa muntu.

Umwanditsi:

NTAWITONDA JEAN CLAUDE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.