17°C , Partly cloudy | Kigali-Rwanda

Uruganda rutunganya amata rwa Burera rweguriwe abikorera

Yanditswe na Sezibera Anselme

Ku ya 15-01-2020 saa 13:32:43
Umuyobozi w'agateganyo wa NIRDA Mukeshimana Claire iburyo hamwe na Ruvimbo Chikwava weguriwe uruganda Burera Diary

Leta yamaze kugurisha uruganda rwa Burera Diary Ltd rutunganya umusaruro ukomoka ku mata ruhabwa umushoramari wikorera. Ni uruganda rwari rwarahagaze kuva mu mwaka wa 2018 Leta ifata umwanzuro wo kurwegurira abikorera.

Uruganda rwahawe uwikorera ari nawe warutsindiye “African Solutions  Company”, kuri uyu wa 14 Mutarama 2020 muri gahunda ya Leta ifite yo kwegurira abikorera bimwe mu bikorwa by’ubucuruzi.

Ruvimbo Chikwava wo mu gihugu cya Zimbabwe usanganywe uruganda rutunganya ibiryo by’amatungo mu Rwanda ari nawe waje gutsindira kwegukana Burera Diary, avuga ko afite gahunda yo gushora imari ingana na miliyari 1.6 z’amafaranga y’u Rwanda.

Ruvimbo avuga kandi ko gahunda ari ugutunganya byibuze litiro 10,000 by’ umusaruro w’amata azajya akusanyirizwa mu makusanyirizo 6 yo mu karere ka Burera. Yavuze kandi ko mu byo azatunganya harimo ikivuguto, yawurute, foromage, Ice Cream n’ibindi, agaragaza ko gahunda y’uruganda ari ugukora ubucuruzi ariko banafasha aborozi b’inka.

Ati: “Dufite gahunda yo guhugura aborozi uko bakongera umusaruro w’amata no kuwuntunganya bakawugeza ku ruganda umeze neza, dufite gahunda kandi yo kubaha ibiryo by’amatungo bazagaburira inka bigatuma bongera ubwiza n’ubwinshi by’amata”.

Ruvimbo avuga ko azatangira gukora mu kwezi kwa Gashyantare 2020 kandi ko mu minsi ya vuba ibizakorwa n’uruganda bikazaba biri ku isoko.

Umuyobozi w’agateganyo wa NIRDA Mukeshimana Claire, avuga ko Leta yizeye ko guha uru ruganda abikorera bizatuma rutera imbere rugakora ibikomoka ku mata byiza kandi byinshi. Anavuga ko aborozi b’inka bo mu karere ka Burera bagiye kubona aho bagurisha umusaruro wabo bakiteza imbere.

Ati: “Twizeye ko uyu mushorari azafasha abaturage bo mu karere ka Burera gutera imbere. Aborozi bazahabwa amahugurwa yo korora kijyambere kandi umusaruro wabo ukagurwa ku giciro cyiza. Turizera kandi ko kwegurira urwo ruganda abikorera tubyizeyeho ko bizafasha abaturage kubona n’akazi”.

Umuyobozi w’agateganyo wa NIRDA Mukeshimana Claire agaragaza akamaro ko kwegurira abikorera uruganda rwa Burera Diary

Leta yari ifite 98.3% by’umutungo wa Burera Diary ikaba yarihagarariwe n’Ikigo cy’Igihugu gishinzwe ubushakashatsi no guteza imbere inganda(NIRDA) hamwe n’Ikigega gishinzwe gutera inkunga imishinga mito n’iciriritse (BDF).

Umwanditsi:

Sezibera Anselme

Tanga Igitekerezo

Email yanyu ntigaragazwa ku rubuga. Amazina na Email ni ngombwa.