Uruganda nyarwanda rwaje mu bigo 40 byahanze udushya duhindura sosiyete ku Isi

Yanditswe na Mutungirehe Samuel

Ku ya 27-09-2019 saa 11:19:07
Ba rwiyemezamirimo batandukanye barimo na Amar Ali, uyobora uruganda Africa improved Foods, rukora ifu y'igikoma mu Rwanda, bahembewe guhanga udushya muri sosiyete z'ibihugu bakoreramo

Umuryango Schwab, ugamije impinduka muri sosiyete binyuze muri ba rwiyemezamirimo « Schwab Foundation” wahembye ibigo bya ba rwiyemezamirimo 40 ku Isi bahanze udushya tuzana ibisubizo muri sosiyete mu mwaka wa 2019, birimo n’uruganda nyarwanda ‘Africa Improved Foods’ (AIF) rukora ifu y’igikoma « Nootri » igizwe n’intungamubiri zitandukanye zivuye mu binyampeke bihingwa n’abaturage, rufasha Guverinoma gukemura ikibazo k’imirire mibi mu bana itera kugwingira.

Buri mwaka Foundasiyo Schwab « Schwab Foundation » imenyakanisha abanyamuryango bashya aho kugeza ubu yari ifite abagera kuri 350 baturuka mu bihugu birenga 70 ku Isi.

Umuhango wo guhemba ba rwiyemezamirimo bafite ibigo n’inganda zateje imbere guhanga udushya muri sosiyete wabereye muri Leta Zunze Ubumwe z’ Amerika, mu Mujyi wa New York, ari naho Amar Ali, Umuyobozi Nshingwabikorwa w’uruganda nyarwanda ‘Africa Improved Food’, ruherereye mu cyanya cyahariwe inganda i Masoro yahembwe yaje mu kiciro k’ibigo biyoboye ibindi mu rwego mpuzamahanga no mu turere mu kugira ibicuruzwa bishya, gahunda nziza, uburyo bwo gutanga serivisi cyangwa bwo gukora ubucuruzi ariko busubiza ibibazo bikibangamiye sosiyete n’ibidukikije, ni ukuvuga ‘Corporate Social Intrapreneurs”.

Urutonde rw’abahembwe uyu mwaka urusangaho kandi abashinze ibigo bigitangira gukora bitarashinga imizi n’abayobozi babyo, ab’ibigo mpuzamahanga n’ibyo mu Karere, Abakuru ba za Guverinoma n’impuguke kabuhariwe zikoreshwa mu gukemura ibibazo bijyanye n’imibereho ya muntu n’ibidukikije. Ibibazo bijyanye n’ibidukikije no guhanga udushya tuganisha mu kubona amazi meza no kubona ubukungu buharanira kurwanya urwango mu bantu.

Hashize imyaka 20 ‘Fondation Schwab’ ifata ba Rwiyemezamirimo baharanira imibereho myiza y’abaturage nk’urungano rw’abayobozi bashya b’ejo hazaza.

Dr. François Bonnici uyobora Foundation Schwa yagize ati « Bigenda bimenyerwa ko guhanga udushya tujyanye n’imibereho myiza y’abaturage byagize akamaro mu nzego zose. Ikindi ni uko no kubaho kw’abagira uruhare mu mpinduka mu buryo bw’imikorere y’ibigo ari ingenzi mu gushyira mu bikorwa intego z’iterambere kugeza mu 2030. Abahawe ibihembo na Foundation Schwab 2019 bagaragaza ko ari abayobozi bashya bazagira impinduka nziza no guhindura imikorere hagamijwe ejo heza hazaza.

Nta bwo bigaragara gusa mu byo bakora baha abaturage ahubwo mu gushishikariza no guhindura imbaga y’abantu mu nzego zinyuranye ari muri Politiki y’ubukungu n’imibereho myiza y’abaturage, mu ikoranabuhanga ndetse no mu buringanire. Abahembwe kandi bagaragara nk’indorerwamo zigamije kuzana ibyo bitekerezo no gukorana n’abashaka kugera ku ntego z’ikinyagihumbi. »

Mu bindi byiciro byahembwemo ba rwiyemezamirimo n’ibigo bitandukanye birimo ikiciro cy’abashoramari « Social Entrepreneurs” bafashije gukemura ibibazo bibangamiye sosiyete n’ibidukikije, bibanze ku guha ubushobozi abaturage bakennye, abasigajwe inyuma n’amateka n’abandi batibona muri sosiyete zabo bitewe n’ibihugu ikigo gikoreramo.

Hari n’ikiciro “Public Social Intrapreneurs”, cy’abayobozi mu nzego za Leta bafashije abaturage kumva uruhare rwabo mu guhanga udushya binyuze muri gahunda za Leta, amabwiriza n’ubushake bw’abaturage.

Hakaza n’ikiciro k’inzobere “Social Innovation Thought Leaders” zizwi n’amategeko babaye intangarugero mu bintu bimwe na bimwe bifasha sosiyete guhindura imyumvire mu buryo bwo guhanga udushya.

Amar Ali, Umuyobozi Nshingwabikorwa w’uruganda nyarwanda Africa Improved Food

Ubwo Amar Ali yahabwaga igihembo uwo wa gatatu i uvuye iburyo

Umwanditsi:

Mutungirehe Samuel

Tanga Igitekerezo

Email yanyu ntigaragazwa ku rubuga. Amazina na Email ni ngombwa.