26°C , Partly sunny | Kigali-Rwanda
Abitabira imurikagurisha mpuzamahanga umubare munini uba ari urubyiruko (Ifoto yafashwe 2017)

Urubyiruko rwatangiye koroherezwa kwitabira Expo 2018

Yanditswe na KAYITARE JEAN PAUL

Ku ya 05-06-2018 saa 07:19:05

Nyuma y’aho Inama nkuru y’urubyiruko ‘NYC’ ishyiriye hanze itangazo rihamagarira ba rwiyemezamirimo b’urubyiruko kuzitabira imurikagurisha mpuzamahanga rya Kigali riteganyijwe kuva tariki 26 Nyakanga kugeza tariki 15 Kanama 2018, ubuyobozi bw’Inama nkuru y’urubyiruko buratangaza ko ubwitabire bushimishije ikindi kandi bukanasobanura ibyo bufasha urubyiruko ruzemererwa kwitabira imurikagurisha mpuzamahanga.

Abitabira imurikagurisha mpuzamahanga umubare munini uba ari urubyiruko (Ifoto yafashwe 2017)

Umuyobozi ushinzwe ibikorwa biteza imbere ba rwiyemezamirimo b’urubyiruko mu nama nkuru y’igihugu y’urubyiruko, Nishyirimbere Donath, asobanura ko korohereza urubyiruko kwitabira imurikagurisha mpuzamahanga bidatangiye ubu, ahubwo ko bimaze igihe bikorwa. Ati “Nta bwo ari igikorwa dutangiye uyu mwaka ahubwo bimaze igihe bikorwa”.

Urubyiruko rwemererwa kwitabira imurikagurisha ni uruba rwujuje ibisabwa ariko rukaba rwaranditse rusaba koroherezwa kumurika no kugurisha ibikorwa byabo, hanyuma hagakurikiraho kugenzura ibyo rwagaragaje rukora ariko na none hakitabwa ku dushya.

Ati “Icyo twibandaho cyane cyane ni ukureba udushya, ni ibiki urubyiruko rugiye kuza kumurika, ku buryo n’uwaza kubireba yavuga ati bino ni byo bihagarariye ibindi bikorwa bitandukanye by’urubyiruko rutabashije kuzamo”.

Akomeza avuga ko ubusabe bw’urubyiruko ruzitabira imurikagurisha bushimishije, akagaragaza ko umubare munini ari uwo mu mujyi wa Kigali. Ati “Ubusabe kimwe n’ubwitabire buba buri hejuru by’umwihariko mu mujyi wa Kigali ariko ubusabe bwo mu duce tw’icyaro nka Burera, Ngoma, Nyaruguru buba butari bwinshi cyane, ibyo ariko biterwa nuko abo mu cyaro baba batumva akamaro kabyo nko kuza mu imurikagurisha bakamara ibyumweru bibiri ariko abo mu mugi baba bumva amahirwe arimo kandi bakabyitabira cyane”.

Urubyiruko rutoranyijwe kwitabira imurikagurisha, ruroroherezwa. Nishyirimbere ati “Icyo dufasha abatoranyijwe ni ukubishyurira umwanya bazamurikiramo, ubwikorezi bw’ibyo bazana kumurika ‘kubizana no kubisubizayo’, kubagurira baji zibemerera kwinjira ahakorerwa ibikorwa byo kumurika no kugurisha, kubagurira impuzankano kugira ngo bamurike bakeye. Icyo bo basabwa ni ukwishakira amafunguro abatunga n’aho kurara”.

Uwera Virginie, rwiyemezamirimo w’imyaka 24, ukorera mu karere ka Ngoma, akaba akora umutobe mu nanasi, avuga ko yasabye koroherezwa kumurika ibyo akora kandi ko ari ubwa mbere abisabye. Ashimangira ko mu gihe yatoranywa, yarushaho gutera imbere no kubona abaguzi baruta abo yari asanganywe.

Ati “Nka rwiyemezamirimo w’urubyiruko nasomye itangazo ku mbuga nkoranyambaga ridushishikariza kwiyandikisha ku bashaka kwitabira imurikagurisha mpuzamahanga risanzwe riba buri mwaka, nange bintera kubisaba kuko mbibonamo amahirwe. Ndamutse ntoranyijwe narushaho gutera intambwe no kubona abaguzi benshi no gusobanurira urundi rubyiruko uburyo nkora umutobe w’inanasi kandi bitansabye igishoro kinini”.

Nishyirembere avuga ko rwiyemezamirimo ari umuntu uhora yiga kugira ngo ibyo akora abashe kubinoza, ngo ayo ni amahirwe akomeye cyane cyane ku bikorera kugira ngo bigire ku bamaze gutera intambwe hanyuma na bo barebe niba bashobora kubikora neza, haba mu ngano no mu bwiza. Yongeraho ko kuri ba rwiyemezamirimo bataratangira, ngo ari uburyo bwiza bwo kugira ngo baze bige, barebe uko abandi bakora, uko batangiye, nuko babigenza.

Ati “Ba rwiyemezamirimo tuba twazanyemo aho tuba tugira ngo bamurike ibyo basanzwe bakora, abantu babikunde babigure. Ikindi ni ukwigira ku bandi no kumenyana n’abandi ba rwiyemezamirimo bo mu gihugu, hanze no mu bakiriya. Ikindi kandi dufite ubuhamya bw’abo byagiriye akamaro bakaba barateye imbere”.

 

TANGA IGITEKEREZO

Leave a Reply

Be the First to Comment!

avatar