20°C , Mostly clear | Kigali-Rwanda

Urubyiruko rwasabye koroherezwa muri gahunda zo kuboneza urubyaro

Yanditswe na Mutungirehe Samuel

Ku ya Nov 15, 2018 saa 5:20

Urubyiruko rwahuriye mu nama Mpuzamahanga yo kuboneza urubyaro (ICFP), rwasabye koroherezwa kubona kugera kuri serivisi zo kuboneza urubyaro no kubisobanurirwa.

Urubyiruko ni ikiciro kutamenya ibyo kuboneza urubyaro bigiraho ingaruka zishyira ubuzima bwabo mu kaga.

Byagarutsweho n’urubyiruko rutandukanye muri yi nama imaze iminsi ine iteraniye i Kigali.

Mu buhamya bwatanzwe na Baye Leinyuy Bongla, Umunyakameruni uyobora ishami ry’urubyiruko muri iyi nama Mpuzamahanga yo kuboneza urubyaro, yagaragaje ibyabaye kuri mugenzi we w’umukobwa watewe inda ku myaka 16 bitewe no kudahabwa amakuru yuzuye ku bijyanye n’ubuzima bw’imyororokere n’uko yakwirinda gusama mu gihe kwifata byanze.

Ati “Uru rugero ubwarwo rwahindura ubuzima bwawe burundu. Dukeneye gutangira kubivugaho (ibyo kuboneza urubyaro), abakobwa batari bake bashobora guhura n’ibi byago. Ese ntibyaba ari bibi kwima umuntu uburenganzira bwe mu gufata ibyemezo ku mubiri we agamije kugira ngo abeho ubuzima bwiza?”

Umuyobozi ushinzwe ubushakashatsi mu kigo Guttmacher, Dr. Ann Biddlecom, yagaragaje ko imibare y’uku kwezi k’Ugushyingo 2018 y’icyo kigo, igaragaza ko miliyoni 36 z’abana bafite imyaka iri hagati ya 15 na 19, bo mu bihugu bikiri mu nzira y’amajyambere bakora imibonano mpuzabitsina kandi bemeza ko badashaka gutwita, ikibazo kibaka ari uko abarenga kimwe cya kabiri cyabo badakoresha uburyo bugezweho kandi bwizewe bwo kuboneza urubyaro.

Iyo raporo ikomeza igaragaza ko kimwe cya kabiri cy’abana batwita batabishakaga, bangana na miliyoni 9.6, birangira inda bazikuyemo kandi mu buryo bushyira ubuzima bwabo mu kaga.

Dr. Biddlecom ati “Gushora imari muri gahunda zo kwita ku buzima bw’imyororokere ku rubyiruko ni ikintu gikenewe kugira ngo hizerwe ko abakiri bato bashobora kwimenya no kwifatira ibyemezo ku buzima bwabo. Ingimbi n’abangavu bagomba kugera kuri serivisi zo kuboneza urubyaro kimwe n’ubujyanama ku myororokere”.

Kokou S., wo mu ishami rihagarariye urubyiruko mu muryango w’Afurika Yunze Ubumwe, yagaragaje uburyo akora kugira ngo amenye ko urubyiruko rufite ibikenewe byose mu kuboneza urubyaro mu buryo bwo kwirinda inda zitateganyijwe, mu kurwanya abatanga amakuru atari yo ku buzima bw’imyororokere no mu guhangana n’imyemerere muri za sosiyete ku bijyanye n’imyororokere mu bagore bakiri bato.

Ku ruhande rw’u Rwanda, Dr. Felix Sayinzoga, uyobora ishami ryo kwita ku buzima bw’umwana na gahunda z’ubuzima mu baturage, mu kigo cy’ubuzima RBC, yavuze ko imikoranire ya leta y’u Rwanda n’imiryango ishingiye ku madini yagize uruhare rukomeye mu kumenyekanisha uburyo butandukanye buhari bwo kuboneza urubyaro, hitawe ku buryo bwa kamere, kandi ko abandi baturage bakeneye ubundi buryo bugezweho bwo kuboneza urubyaro butari ku bigo by’amadini boherezwa ku bindi bigo by’ubuzima bya Leta bagahabwa izo serivisi nk’abandi bose.

Kojo Lokko, Umuyobozi wungirije mu kigo “The Challenge Initiative”, yasoje iyo nama avuga ko inama nk’iyo igamije kurushaho guha ubushobozi abana b’abakobwa by’umwihariko mu kubaza ibibazo bijyanye n’imyororokere, bakabasha gutegura neza ahazaza habo no kugira uburenganzira ku buryo bwose bwo kuboneza urubyaro nta nkomyi cyangwa kwitinya no kwicira urubanza.