26°C , Partly sunny | Kigali-Rwanda
Minisitiri w'Urubyiruko, Mbabazi Rosemary

Urubyiruko rwa Diyasipora n’urwo mu gihugu rugira uruhare mu iterambere-Mbabazi

Yanditswe na KAYITARE JEAN PAUL

Ku ya 06-03-2018 saa 08:52:44

Minisiteri y’Urubyiruko iratangaza ko urubyiruko rwo muri Diyasipora n’urwo mu Rwanda rukwiye kumenya igenamigambi ry’igihugu no kugira uruhare mu iterambere ry’igihugu.

Minisitiri w’Urubyiruko, Mbabazi Rosemary

Minisitiri w’Urubyiruko, Mbabazi Rosemary, asobanura ko Minisiteri y’Urubyiruko yibanda cyane ku mibereho myiza yarwo kuko igihugu gifite abaturage bameze neza, ni cyo kiba gifite ubukungu bukomeye.

Muri gahunda y’imibereho myiza, Minisiteri y’Urubyiruko ihuriza hamwe urubyiruko kugira ngo rwerekwe ikerekezo k’igihugu n’icyo rusabwa. Ati “Iyo batabigizemo uruhare bumva ko ari ikindi kiciro kiri ku ruhande ariko tuba tubereka ko ari bo baturage ba mbere bagomba kumenya igenamigambi igihugu gifata, kugira ngo babigiremo uruhare kuko ni bo bafite igihe kinini imbere yabo.”

Minisitiri w’Urubyiruko avuga ko bafite gahunda yo gukoresha imbuga nkoranyambaga nko gushyiraho amakuru yose kugira ngo aho urubyiruko ruri hose ku Isi no mu gihugu rushobore kubona amahirwe ari mu Rwanda.

Ati “Turimo turubaka uburyo bw’amakuru menshi tuzajya dushyira ku mbuga nkoranyambaga ku buryo urubyiruko ruri muri diyasipora rubona amakuru. Abo mu gihugu bo tubafitiye santeri z’urubyiruko 32 ziri mu turere twose tw’igihugu, twoherezayo amakuru yose ajyanye n’akazi niba hari amahirwe y’umurimo, niba hari akazi gakenewe, ahakenewe serivisi z’urubyiruko tukabyoherezayo. Turatekereza gushyiraho ihuriro ry’urubyiruko ruri mu mahanga tukabereka amahirwe ari mu gihugu bakanamenya n’amakuru ku gihugu cyabo byanashoboka bakabigiramo uruhare.”

Urubyiruko ruguma muri Diyasipora rutanga umusanzu mu iterambere ry’igihugu

Minisitiri w’Urubyiruko ashimangira ko u Rwanda atari akarwa ko urubyiruko rurangiza kwiga rukaguma muri diyasipora nta cyo bitwaye. Ati “Nta cyo bidutwaye bagiye bakagira ubuzima bwiza bakagira icyo bakora, ni ubwenge tuba dukura hirya hino.

Byaba byiza bagarutse mu gihugu bafite ubwo bumenyi kuko iyo bagiye kwiga mu mahanga tubita indangamirwa, kandi intego yabo ni ugushaka imbuto n’amaboko bakaza bagakorera igihugu.”

Eng. Murenzi Daniel uyoboye Diyasipora nyarwanda ku Isi yatangarije Imvaho Nshya ko urubyiruko rwo muri Diyasipora rugira uruhare mu iterambere ry’igihugu. Asobanura ko urubyiruko rwitabira gahunda za Leta zirimo itorero Indangamirwa, Rwanda Day, ariko ngo n’abamaze gutozwa bafatanya n’abandi kubaka igihugu.

Ati “Urubyiruko rwo muri Diyasipora rwitabira itorero Indangamirwa, Youth Connect, Umushyikirano, mbese urubyiruko rwa Diyasipora rwahawe urubuga muri gahunda za Leta nko guharanira kuzamura ururimi n’umuco nyarwanda.

Ikindi navuga ko nyuma yo kuva muri Youth Connect, urubyiruko mu miryango itandukanye rwatekereje ku mishinga rwakorera mu Rwanda nko kuba rwarashoboye gutekereza ku mushinga wo koroza ingurube urubyiruko bagenzi babo bo mu Ntara y’Amajyaruguru, gutangirira abatishoboye umusanzu w’ubwisungane mu kwivuza n’ibindi bikorwa bigamije iterambere ry’igihugu.”

Eng. Murenzi yongeraho ko urubyiruko ruba i Dubai muri Leta zunze ubumwe z’Abarabu rurimo kwishyira hamwe kandi ko mu gihe cya vuba bazagaragaza ibikorwa byabo na byo biteza imbere igihugu.

Ubushomeri si umwihariko w’u Rwanda, hari igikorwa ngo bugabanuke

Ikibazo k’ibura ry’akazi mu Rwanda, Minisitiri w’Urubyiruko avuga ko ubushomeri atari umwihariko w’u Rwanda ahubwo ko no mu bihugu byateye imbere buhari. Asaba urubyiruko kudakora akazi kakoza umuntu isoni nko kwicuruza, kwiba n’ibindi.

Ku bashaka kuba ba rwiyemezamirimo asobanura ko hari ikigega k’ingwate cya BDF kuko ushaka kwihangira imirimo ari urubyiruko cyangwa umugore Leta imuha ingwate ya 75% binyuze muri icyo kigega kuko akenshi ngo usanga urubyiruko rugorwa no kutagira ingwate rusabwa muri banki.

Uwineza Josephine ukorera mu isoko rya Nyarugenge mu Mujyi wa Kigali avuga ko we na bagenzi be barangije amashuri makuru bakishyira hamwe BDF ibatangirira 75% y’inguzanyo bari basabye muri iki kigega.

Ati “Turangije kwiga muri ULK, twagize ikibazo cyo kubona akazi duhitamo kwishyira hamwe tukajya twizigama amafaranga 500, nyuma tugana BDF tuyiha umushinga w’ubucuruzi bw’imboga n’imbuto irawiga. Twaje guhabwa inguzanyo twasabye turakora kandi ubu tuvugana, twamaze kwishyura kandi duteye imbere.”

Abanyarwanda baba mu mahanga bafite uburenganzira nk’ubw’abari mu gihugu, kandi bose bahabwa amahirwe angana ku gihugu, nko kwitorera abayobozi b’igihugu, kandi begerwa kenshi muri gahunda ya Rwanda Day, bakaganirizwa, bakagaragaza ibitekerezo byabo n’ibibazo bafite byakemurwa n’ubuyobozi bigakemuka. Batumirwa kandi nama y’Igihugu y’Umushyikirano, bagatanga ibitekerezo byabo kuri gahunda zinyuranye zo kubaka igihugu.

 

TANGA IGITEKEREZO

Leave a Reply

Your email address will not be published. Required fields are marked *