Urubyiruko rurashima Leta yashyizeho kwiga imyuga kuko birinda ubushomeri

Yanditswe na Rutayisire Emile

Ku ya 02-12-2019 saa 12:07:13
Urubyiruko rwahawe amahirwe yo kwiga imyuga, abayitabiriye babayeho neza

Ubashije kwiga imyuga aca ukubiri n’ubushomeri. Ibi bishimangirwa n’urubyiruko rwize imyuga n’ubumenyingiro ruhamya ko rutangira kwinjiza amafaranga rukiri mu ishuri kandi rwarangiza kwiga ntirushomere. Uru rubyiruko rukaba rushima Leta y’u Rwanda yashyizeho gahunda yo kwiga imyuga n’ubumenyingiro.

Gahunda yo kwiga imyuga n’ubumenyingiro ishyirwa mu bikorwa na Minisiteri y’Uburezi (MINEDUC) n’ibigo biyishamikiyeho. Hari amashuri yisumbuye hirya no hino mu gihugu yagizwe ay’imyuga n’ubumenyingiro (TVET), aho abanyeshuri bakangurirwa kuyagana hagamijwe kurwanya ubushomeri mu rubyiruko.

Hari kandi nIshuri Rikuru ry’Imyuga n’Ubumenyingiro, “RP” (Rwanda Polytechnic) rimaze guhurizwamo amashuri makuru 8 usanga hirya no hino mu gihugu: Kigali, Ngoma, Karongi, Huye, Tumba, Musanze, Gishari na Kitabi.

Leta yashyizeho na gahunda y’abiga igihe gito, akenshi bacikirije amashuri cyangwa bayarangije mu mashami atari imyuga, bakajya kwigira ku murimo muri gahunda ya ‘NEP Kora Wigire’, bakarangiza babona akazi mu nganda cyangwa bakikorera bakiteza imbere nyuma yo kwihangira imirimo.

Bamwe mu bize mu mashuri ya TVET, bahamya ko bahisemo neza kuko batangira gukorera amafaranga bakiri ku ntebe y’ishuri, nk’uko bitangazwa na Muneza Pierre, wize ikoranabuhanga (IT) arangije yishyira hamwe na bagenzi be ari batatu bakora Cyber Café (Aho batangira serivise a interineti), ndetse bakanakora za mudasobwa zapfuye, n’ibindi.

Agira ati “Mu ishuri twize ibintu bitandukanye by’ikoranabuhanga, turi mu mwaka wa nyuma muri 2018 ni bwo twishyize hamwe, dukora urubuga rwo kwimenyekanishirizaho. Abantu batangiye kudushaka, tukabakorera gahunda za mudasobwa, gukora izapfuye, dukora websites (Imbuga za interineti), amavidewo n’ibindi kandi biratwinjiriza.”

Akomeza avuga ko nibura binjiza amafaranga agera ku bihumbi 300 mu kwezi. Yemeza ko hari abo biganye mu mashuri abanza mu yisumbuye ntibakwiga imyuga none bari mu bushomeri. Kwiga imyuga n’ubumenyingiro ni byiza kuko umuntu atangira gukorera ifaranga akiri ku ntebe y’ishuri. Ati “Ndashimira Leta yashyizeho iyi gahunda ituma tuticara dutegereje akazi ahubwo tukakihangira.”

Omar Numukiza wize gufotora nawe agira ati “Nakuze nkunda ibintu by’amavidewo ni yo mpamvu ndangije kaminuza nahise nshaka aho mbyiga kuko nashatse akazi ndakabura. Mbere nabonaga abakora ibyo gufotora ari abantu batabyize nyamara bikabatunga, ariko naje kumenya amateka y’ab’ahandi byakijije cyane mbishyiramo imbaraga.”

Akomeza avuga ko kwiga imyuga ari ibintu byiza cyane kuko hari benshi biganye kaminuza bamaze imyaka igera kuri ine nta kazi barabona, ariko akaba asanga iyo biga imyuga bose baba bafite akazi.

Niyonkuru Jean Paul yize imyuga muri gahunda ya Igira ku murimo iterwa inkunga n’umuryango APEFE, avuga ko kwiga imyuga byamugiriye akamaro kubera ko atagize amahirwe yo kwiga amashuri yisumbuye ngo ayarangize kuko yagarukiye mu mwaka wa 5.

Agira ati “Sinarangije amashuri yisumbuye kubera ubukene bwo mu rugo. Nagize ubuzima bubi ndetse ngeza aho nta ikizerew cy’ubuzima. Iyo nabonaga umuntu ntwarira imizigo narayikoreraga, nabona uwo mpingira nkamuhingira nibaza igihe ubuzima buzamera neza byaranyobeye. Naje kumenya gahunda yo kwiga imyuga njyayo none namaze kumenya kudoda mfite akazi.”

Akomeza avuga ko yize amezi 6 mu ishuri, akorera mu ruganda amezi 6 ariko mu kurangiza umuyobozi w’uruganda yashimye imikorere ye ahita amuha akazi.

Niyonkuru agira ati “Mvuga ko mfite akayabo k’amafaranga 260.000 y’u Rwanda mbitse muri banki kubera ko nzi uburyo nabashije kuyageraho. Ndashima Leta y’u Rwanda ishyiraho gahunda zifasha urubyiruko rukava mu bushomeri. Ndahamagarira urubyiruko kwiga imyuga kuko ni wo muti w’ubushomeri.”

Karasira Faustin Umuyobozi wungirije ushinzwe ibikorwa mu rugaga rw’abikorera, PSF avuga  bashyira imbere gahunda yo guteza imbere imyuga n’ubumenyingiro kandi ko izakomeza kuguma hafi abikorera bafasha urubyiruko kwimenyereza umwuga.

Agira ati “Tugomba gukomeza kongera umubare w’abize imyuga twegera abantu bose bakora imyuga batarayize bakabona amahugurwa ku buryo bagira impamyabushobozi.”

Akomeza avuga ko ibyo bizatuma abakora imyuga bigirira ikizere kandi bakizwerwa n’ababakoresha kuko baba bafite ikemeza ko koko barangije. Yanagarutse ku kigo cyatangijwe na PSF cya Imanzi Business Institute kizajya gifasha  urubyiruko rurangije kwiga imyuga mu gihe batangiye kwikorera ndetse bakajya batyaza ubwonko hagamijwe gushyira ku isoko ibikenewe.

Umwanditsi:

Rutayisire Emile

Tanga Igitekerezo

Email yanyu ntigaragazwa ku rubuga. Amazina na Email ni ngombwa.