17°C , Partly cloudy | Kigali-Rwanda
Umuvunyi Mukuru, Murekezi Anastase ajya mu mwiherero

Umwiherero w’abayobozi b’Igihugu uraganirwamo ingingo eshanu

Yanditswe na Mugabo Lambert

Ku ya 08-03-2019 saa 15:27:13

Ku gicamunsi cyo kuri uyu wa Gatanu tariki 8 Werurwe 2019 abayobozi bakuru b’Igihugu berekeje i Gabiro mu Ishuri rya Gisirikare mu Karere ka Gatsibo, aho bitabiriye Umwiherero ngarukamwaka ubahuza.

Uyu mwiherero ubaye ku nshuro ya 16, uzasoza imirimo yawo ku wa 12 Werurwe 2019. Itangazo ry’Ubuvugizi bwa Guverinoma rivuga ko uyu mwiherero uzaganirwamo ingingo eshanu, ari zo: Aho u Rwanda rugeze mu kerekezo k’iterambere, Guteza imbere ireme ry’uburezi, Guteza imbere ubuzima, Kongera umusaruro w’ubuhinzi no Guteza imbere ishoramari no kongera ibyoherezwa mu mahanga.

Abayobozi basaga barenga 250 bahagarariye inzego zitandukanye za Leta, ibigo biyishamikiyeho ndetse n’ibigo byigenga n’iby’ubucuruzi baritabira uyu mwiherero.

Biteganyijwe ko Perezida wa Repubulika Paul Kagame azayobora uyu mwiherero, ariko Minisitiri w’Intebe Dr. Edouard Ngirente we azageza ku bawitabiriye uko imyanzuro y’Umwiherero wa 2018 wa 15 yashyizwe mu bikorwa.

Umwiherero ni igikorwa gishingiye ku muco nyarwanda aho abayobozi b’Igihugu bahuraga bakaganira ku bibazo byugarije abaturage. Intego y’izi nama yari ugushaka ibisubizo ku bibazo byagaragajwe no kwiyemeza kubishyira mu bikorwa.

Kuri ubu, umwiherero ukoreshwa nk’umwanya udasanzwe aho abayobozi bagaragaza ibyo bakoze, ibitaragezweho n’impamvu, bakarebera hamwe aho iterambere ry’Igihugu rigeze ndetse bakanafata ingamba ku buryo bwakoreshwa mu kwihutisha ibikorwa by’ingenzi bijyana n’iterambere rirambye.

Umuvunyi Mukuru, Murekezi Anastase ajya mu mwiherero

Kanda muri iyi foto yo hasi urebe andi mafoto menshi y’abayobozi bajya mu mwiherero

Umwiherero 2019: Governement Leaders depart to Gabiro. Kigali, 8 March 2019

TANGA IGITEKEREZO

Leave a Reply

Your email address will not be published. Required fields are marked *