26°C , Partly sunny | Kigali-Rwanda
Minisitiri w'Ubuzima Dr. Gashumba Diane, iburyo, arimo kwifatanya n'abaturage bo mu karere ka Gisagara bisuzumisha indwara zitandura, ibumoso ni Guverineri w'Intara y'Amajyepfo Mureshyankwano Marie Rose

Umwanda ushobora gutera indwara za kanseri -Dr. Gashumba

Yanditswe na MUTUNGIREHE SAMUEL

Ku ya 05-02-2018 saa 08:08:55

Minisitiri w’Ubuzima, Dr Diane Gashumba, yibukije Abanyarwanda ko umwanda ari imwe mu ntandaro y’indwara za kanseri zibasira abantu benshi muri iki gihe kandi imibare y’abakomeje kwandura iyo ndwara ikomeje kwiyongera.

Minisitiri w’Ubuzima Dr. Gashumba Diane, iburyo, arimo kwifatanya n’abaturage bo mu karere ka Gisagara bisuzumisha indwara zitandura, ibumoso ni Guverineri w’Intara y’Amajyepfo Mureshyankwano Marie Rose

Yabitangaje ejo hashize, tariki ya 4 Gashyantare 2018 ubwo u Rwanda rwifatanyaga n’isi kwizihiza umunsi mpuzamahanga wo kwirinda indwara ya kanseri irimo guhitana abantu miliyoni 14 ku isi buri mwaka, ku rwego rw’igihugu ukaba warizihirijwe mu karere ka Gisagara mu Ntara y’Amajyepfo.

Dr. Gashumba yavuze ko abantu batari kumva neza akamaro k’isuku ku mubiri no mu ngo, ko ari kimwe mu bishobora gutera indwara za kanseri zitandukanye.

Ati “Kanseri ni indwara mbi igenda ifata indi ntera, cyane cyane kubera uko abantu bagenda bahindura imibereho yabo mu byo barya. Barareka kurya imboga, imbuto ahubwo bakirukira kurya ibintu birimo amavuta menshi, kunywa ibisindisha ndetse n’ibiyobyabwenge.

Umwanda ushobora gutera indwara ya hepatite nayo ikavamo kanseri. Kutoga mu kanwa, kutoza amenyo bishobora gutera kanseri zo mu kanwa, izo mu muhogo ndetse n’izo mu gifu.”

Yakomeje asobanura ko gukora siporo nabwo ari uburyo burambye bwo kwirinda indwara zitandura zirimo na kanseri, abantu bakayikora nk’umuco w’ubuzima bwiza.

Dr. Uwinkindi François, Umuganga ushinzwe kurwanya indwara za kanseri mu kigo k’igihugu gishinzwe ubuzima RBC, yavuze ko mu Rwanda kanseri ziganza cyane ari iz’abagore, kanseri y’inkondo y’umura y’abagore na kanseri y’ibere mu gihe ku bagabo ari kanseri ya prostate, iy’umwijima na kanseri y’igifu.

Ati “Nka kanseri y’igifu, hari agakoko kongera ibyago byo kurwara kanseri y’igifu, iyo kagumye mu gifu gashobora gutera ibisebe bikabyara kanseri yo mu gifu kandi ako gakoko tukarya mu bintu birimo umwanda.”

Yagaragaje ko imibare iva mu mavuriro yo mu Rwanda, abantu bagera ku 1900 barwara kanseri, mu gihe imibare y’Ishami ry’Umuryango w’Abibumbye ryita ku Buzima, OMS, igaragazaga ko miliyoni 14 barwara kanseri buri mwaka ku isi, muri bo miliyoni 8.5 ikabahitana.

Ati “Nka kanseri y’ibere tubona abantu bagera kuri 300 buri mwaka n’abandi bagera kuri abo barwaye kanseri y’inkondo y’umura hakazaho n’abarwaye kanseri ya prostate bagera muri 200 ariko icyo twakishimira ni uko ubuvuzi buhari, ubu dufite ibitaro bitanu mu Rwanda bishobora gusuzuma kanseri bikabasha no kuyivura”.

Dr. Uwinkindi yavuze ko kanseri zimwe usanga hatazwi ikizitera, ariko nka kanseri y’inkondo y’umura ku bagore iterwa no gukora imibonano mpuzabitsina idakingiye; inzoga n’itabi nabyo bikaba byatera kanseri zo mu bihaha n’iyo mu gifu, n’isukari nyinshi ikaba yatera kanseri y’umwijima igihe utakibasha gukora neza ariko hari amahirwe yo gukira izo ndwara mu gihe umuntu yihutiye kwisuzumisha hakiri kare ibimenyetso bikomeye byazo bitaragaragara ngo umuntu age kwa muganga ari uko yarembye.

Abaturage bo mu karere ka Gisagara ahizihirijwe uwo munsi wo kwirinda kanseri, batangaje ko iyo ndwara bayumva ndetse banabonye abayirwaye bamwe ikabahitana kandi ko kwisuzumisha ari bumwe mu buryo bwo kwirinda ko yakomeza kubatwarira ubuzima.

TANGA IGITEKEREZO

Leave a Reply

Your email address will not be published. Required fields are marked *