18°C , Mostly cloudy | Kigali-Rwanda
Mugisha Samuel wongerewe amasezerano muri Dimension Data akazayikinira mu mwaka wa 2019

Umwaka wa gatatu muri Dimension Data ni uwo gukora cyane – Mugisha

Yanditswe na Nshim Janvier

Ku ya 12-10-2018 saa 09:36:33

Mugisha Samuel usanzwe akinira ikipe ya Dimension Data for Qhubeka yo muri Afurika y’Epfo ikaba ibarizwa mu Butaliyani atangaza ko umwaka wa 3 agiye gukina muri iyi kipe uzamusaba gukora cyane kugira ngo azabashe kuzamuka mu ikipe nkuru.

Uyu mukinnyi ufite imyaka 20 y’amavuko yageze mu ikipe ya kabiri ya Dimension Data for Qhubeka muri 2017 nyuma yo kwitwara neza muri Tour du Rwanda 2016 aho yasoje ari we uyoboye urutonde rw’uzi kuzamuka kurusha abandi.

Mugisha watangiye gukina amarushanwa mpuzamahanga muri 2015 yasinye amasezerano y’umwaka umwe muri iyi kipe nyuma yongerewe amasezerano yo gukinira iyi kipe mu mwaka wa 2018 uri kugana ku musozo.

Kuri ubu Mugisha ari mu Rwanda aho yaje mu kiruhuko nyuma y’aho umwaka w’imikino wa 2018 usojwe ku mugabane w’u Burayi. Aganira n’Imvaho Nshya yatangaje ko uyu mwaka wa 2018 wamugendekeye neza.

Ati : « Ku ruhande rwange wagenze neza kuko habonetsemo insinzi no kwitwara neza mu marushanwa atandukanye ».

Mugisha Samuel wongerewe amasezerano muri Dimension Data akazayikinira mu mwaka wa 2019

Muri uyu mwaka wa 2018, Mugisha Samuel wazamukiye mu ikipe ya Benediction y’i Rubavu yitwaye neza kuko ari kumwe n’ikipe y’u Rwanda y’abatarengeje imyaka 23 yegukanye intera 3 mu irushanwa ry’Afurika mu batarengeje imyaka 23 ryabereye muri Cameroun kuva tariki 31 Mutarama kugeza 04 Gashyantare 2018. Iri rushanwa rikaba ryaregukanwe n’Areruya Josep bihesha u Rwanda kwitabira irushanwa ry’abatarengeje imyaka 23 mu Bufaransa «Tour de l’Avenir 2018 »

Muri Nyakanga 2018, Mugisha ari kumwe n’ikipe ya Dimension Data yitwaye neza mu irushanwa rya Giro Ciclistico della Valle d’Aosta Mont Blanc ryabereye mu Butaliyani aho yasoje ari ku mwanya wa mbere mu barusha abandi kuzamuka.

Nyuma y’iri rushanwa yahise yitabira Tour du Rwanda 2018 muri Kanama 2018 ari kumwe n’ikipe y’u Rwanda arayegukana. Ubundi yitabira irushanwa ry’abatarengeje imyaka 23 mu Bufaransa, shampiyona y’Isi n’andi marushanwa asoza umwaka w’imikino wa 2018.

Mugisha atangaza ko mu ikipe bishimiye uko yitwaye ari nayo mpamvu bamwongereye amasezerano akaba azakinira iyi kipe mu mwaka wa 2019.

Ati « Uyu mwaka hari abazazamuka mu ikipe nkuru natwe abasigaye tugomba gukora cyane umwaka utaha tuzakazamuka ».

Mugisha agaruka ku myaka ibiri amaze muri iyi kipe ya Dimension Data yavuze ko byamufashije cyane kuko ubu amaze kugira ubunararibonye. Kuba agiye gukina undi mwaka muri Dimension Data, Mugisha avuga ko bimusaba gukora cyane.

Ati : «Nagiye hariya mfite intego yo gukina nk’uwabigize umwuga, ngomba gukora cyane kandi ndizera ko bizagenda neza muri rusange. Ibyo nabasabye barabinyemereye nange ibyo bansabye nzabikora ».

Umwaka wa 2019 uzaba ari uwa nyuma Mugisha akinnye mu ikipe ya kabiri ya Dimension Data, natazamurwa mu ikipe ya mbere ashobora kuzashaka indi kipe.

TANGA IGITEKEREZO

Leave a Reply

Your email address will not be published. Required fields are marked *