17°C , Partly cloudy | Kigali-Rwanda
Ziggy 55 uzwiho kurimba cyane

Umuziki wampaye agaciro muri Sosiyete – Ziggy 55

Yanditswe na Gisubizo Gentil

Ku ya 09-05-2019 saa 07:01:34

Umuhanzi Ziggy 55 ukora umuziki nyafurika umenyerewe cyane mu Njyana ya Rhumba, abona umuziki ntaho utakugeza mu gihe uwukora afite intego.

Ziggy 55 wamamaye cyane mu itsinda rya The Brothers, usigaye akora umuziki ku giti cye nyuma yo gusenyuka kw’iri tsinda, yemeza ko umuziki ushobora kugukura ku rwego rumwe ukagushyira ku rundi mu gihe uwukora awuhaye agaciro.

Mu kiganiro yagiranye n’ Imvaho Nshya yagarutse ku isano afitanye n’umuziki, yagize ati : “Umuziki watumye ngira icyubahiro mu bantu, wampaye inshuti nyinshi z’ingeri zitandukanye”.

“Biranshimisha iyo nyuze ku bantu nkumva bashimira ubutumwa mbaha bunyuze mu muziki wanjye, umuziki dukora wubaka abantu ugahuza abandi.”

Uyu muhanzi asanga kuba aririmba wenyine byaramufunguye amaso, ndetse byagura urwego rwe rw’imitekerereze bitandukanye na mbere agikorera mu itsinda.

Yagize ati : “Gukorera umuziki mu itsinda bitandukanye no gukora ku giti cyawe, ku bwanjye byatumye nagura urwego rw’imikorere ndetse n’imiririmbire”.

Yakomeje avuga ko kubera urwego umuziki nyarwanda ugezeho, nta kwirara bisaba gukora cyane kandi ukagira umwihariko mu buhanzi bwawe.

Yumva ko abahanzi bakwiye gukorera hamwe bakagira ubumwe mu byo bakora, ndetse n’abanyamakuru bagashyigikira umuziki nyarwanda kuko niho hazava iterambere ry’abahanzi.

Ziggy 55 yumva kandi Abanyarwanda bakwiye kumva bakanateza imbere umuziki wabo, kuko bizakura umuhanzi ku rwego rumwe bimuhindurire ubuzima.

Ziggy 55 umaze gushyira hanze indirimbo zitandukanye, nyinshi ziri mu njyana ya Rhumba ajya anyuzamo akanavangamo Rap, yashyize hanze indirimbo nshya yise “Lentement”, ayitura abakunda ibihangano bye.

Iyi ndirimbo amajwi yayo yatunganyijwe na Producer Trckslayer, amashusho atunganywa na Producer Fab Lab.

Nyuma yo kuva muri The Brothers, Ziggy55 yatangiye agakora umuziki ku giti cye, aho kugeza ubu afite indirimbo zinyuranye zagiye zikundwa zirimo; Cherie na nga, Mon Amour yakoranye na Trezzor bafatanyije na Urban Boys, Byangora yakoranye na Christopher, A l’aise, Uwanjye yakoranye na Danny Vumbi kimwe n’izindi nyinshi yagiye akora.

Mu mashusho y’iyi ndirimbo nshya ya Ziggy55 hagaragaramo abahanzi banyuranye barimo DJ Pius na Davis D.

Ziggy 55 ashimangira ko ubufatanye ari ngombwa mu bahanzi

TANGA IGITEKEREZO

Leave a Reply

Your email address will not be published. Required fields are marked *