27°C , Mostly cloudy | Kigali-Rwanda
Dr.Tedros Adhanom Ghebreyesus, wambaye amadarubindi na Minisitiri w'Ubuzima Dr. Diane Gashumba ubanza ibumoso, bari kumwe n'abajyanama b'ubuzima bo ku kigo nderabuzima cya Mayange

Umuyobozi wa OMS ku isi yashimye ibikorwa by’abajyanama b’ubuzima

Yanditswe na MUTUNGIREHE SAMUEL

Ku ya 12-01-2018 saa 07:43:38

Umuyobozi mukuru w’Ishami ry’Umuryango w’Abibumbye ryita ku buzima, OSM, Dr Tedros Adhanom Ghebreyesus yashimye uburyo abajyanama b’ubuzima bo mu Rwanda bagira uruhare mu kubungabunga ubuzima bw’abaturage no kurwanya ibyorezo mu kerekezo k’iterambere rirambye (SDGs).

Dr.Tedros Adhanom Ghebreyesus, wambaye amadarubindi na Minisitiri w’Ubuzima Dr. Diane Gashumba ubanza ibumoso, bari kumwe n’abajyanama b’ubuzima bo ku kigo nderabuzima cya Mayange

Yabitangaje ejo hashize, tariki ya 11 Mutarama 2018, ubwo yari ageze mu Rwanda mu ruzinduko rwe yatangiriye mu Ntara y’Iburasirazuba, ku kigo Nderabuzima cya Mayange giherereye mu karere ka Bugesera, aho yeretswe bimwe mu byo abajyanama b’ubuzima bakora mu rwego rwo gutanga ubuvuzi bw’ibanze, yerekwa n’uko mituweli igira uruhare rukomeye mu kubungabunga ubuzima.

Dr. Tedros yashimye cyane intera u Rwanda rumaze kugeraho, avuga ibyo abajyanama b’ubuzima bakora bitanga ikizere ko u Rwanda ruzagera ku ntego z’Iterambere rirambye (SDGs) nk’uko ziyemejwe arebeye ku buryo ababyeyi n’abana n’abandi bitabwaho muri rusange muri serivisi z’ubuzima.

Ati “Baribanda cyane ku bana n’abagore ariko n’abandi; akazi bakora by’umwihariko ku bagore n’abana ni ako gushimirwa. Izo serivisi zo kuvura malariya, indwara z’ubuhumekero, gucibwamo, bikorewe ku rwego rw’umudugudu ni ikintu mu by’ukuri ibindi bihugu bigomba kwigiraho”.

Minisitiri w’Ubuzima mu Rwanda, Dr Diane Gashumba, yavuze ko OMS ari abafatanyabikorwa bakomeye mu bijyanye n’ubuzima n’ibindi biteza imbere urwego rw’ubuzima.

Ati “Baradufasha cyane cyane muri gahunda z’inkingo; muzi ko tumaze kugera hejuru ya 93% by’abana babona inkingo zose, baradufasha kuri malariya, mu kwitegura kuba twakwirinda indwara z’ibyorezo izo ari zo zose, badufasha no mu bindi byo kuduha impuguke zitwigira imishinga”.

Ku kigo nderabuzima cya Mayange aho Umuyobozi mukuru wa OMS Dr Terdos yasuye, gifite umwihariko kuko ikigero cy’ababyeyi babyarira kwa muganga kigeze ku 100% mu gihe ku rwego rw’igihugu muri rusange kigeze kuri 91% naho igipimo cy’ubwitabire mu kwivuza nacyo kigeze hejuru ya 80%.

Kugeza ubu mu Rwanda hari abajyanama b’ubuzima ibihumbi 45 bakora akazi ko kuvura abana indwara zitandukanye no kuvura abantu bakuru indwara ya malariya, gutanga ubufasha muri gahunda yo kuboneza urubyaro ku bagore, gutanga ibikoresho byo kwirinda icyorezo cya Sida, kurwanya imirire mibi n’ibindi byo mu bukangurambaga butandukanye.

Dr Tedros yasuye n’urwibutso rwa Jenoside yakorewe Abatusti mu 1994 ruherereye i Nyamata mu karere ka Bugesera, aho yunamiye inzirakarengane zazize Jenoside.

TANGA IGITEKEREZO

Leave a Reply

1 Comment on "Umuyobozi wa OMS ku isi yashimye ibikorwa by’abajyanama b’ubuzima"

avatar
Sort by:   newest | oldest | most voted
Joseph
Guest

Ni byiza cyane abajyanama bubuzima bakora akazi kenshi gakomeye mu kubungabunga ubuzima bwumubyeyi nubwumwana,Kuvura abana bari munsi yimyaka 5 (impiswi,umusonga na malariya,no gukurikirana imikurire yabana ku bijyana nimirire). Ndetse no kuboneza urubyaro kuwego rwumudugudu.