19°C , Partly sunny | Kigali-Rwanda

Umuyobozi mushya wa Leta ya Kisilamu (IS) yamenyekanye

Yanditswe na Kayira Etienne

Ku ya 23-01-2020 saa 15:06:47
Aha ni mu muhanda wo muri Iraki aho abarwanyi ba EI bigeze gutambagiza ibendera ryabo bagaragaza ko bahigaruriye(Foto Reuters)

Mu gihe  gishize Abou Bakr al-Bagdadi wari Umuyobozi Mukuru w’Umutwe w’Iterabwoba wa Leta ya Kisilamu (EI) yishwe n’ingabo z’Amerika aho yari ari mu gihugu cya Siriya, ubuyobozi bw’uyu mutwe bwaje kubyemeza ko koko ko Al-Bagdadi wari Umuyobozi wa Islamic State (IS). Kuva icyo gihe bari bataratangaza uwamusimbuye, ariko guhera ku wa Gatatu tariki 22 Mutarama 2020 Umuyobozi mushya wa IS yaramenyekanye.

Radiyo Muzamahanga y’u Bufaransa RFI, imenyesha ko Ikinyamakuru « The Guardian » cyo mu Bwongereza ngo ari cyo cyatangaje bwa mbere ko Umuyobozi mushya wa Leta ya Kisilamu (EI) yamenyekanye. Izina rye ngo ni Amir Mohammed Adbul Rahman al-Mawli al-Salbi.

The Guardian iti “Al-Salbi nta bwo ari mushya mu mutwe wa IS, ahubwo ni umwe mu bayobozi basanzwe bakomeye kandi uzwi mu bantu b’intagondwa zo ku rwego ruhanitse. Yari asanzwe azwi ku izina ryo ku rugamba. Ariko serivisi z’ubutasi zizewe zemeje ko ariya mazina yatangajwe ari yo ye y’ukuri .»

Iki gitangazamakuru cyo mu Bwongereza kemeza ko Amir Mohammed Adbul Rahman al-Mawli al-Salbi ngo afite impamyabushobozi yo muri Kaminuza ya Mossoul ho muri Iraki mu bijyanye n’idini. Kubera ubwo bumenyi bw’idini yize, ngo bumuhesha icyubahiro muri uyu mutwe w’iterabwoba amazemo imyaka myinshi. The Guardian iti « Amakuru acukumbuye kandi yihariye agaragaza Amir Al-Mawli nk’umuntu ugendera ku mahame y’idini rye. Yagiye agira uruhare mu bwicanyi ndengakamere no mu guhamagarira ibyihebe kurimbura Abakristo. Ni we wayoboye ibitero mu kibaya cya Ninive guhera muri Kanama 2014 ».

Al-Salbi ngo avuka mu muryango w’Abaturkmène bo mu gace kitwa Tal Aftar, mu Majyaruguru ya Iraki. Itariki yavutseho ngo ntizwi kugeza ubu, ariko ngo ni umwe mu bayobozi ba IS bafite imyaka y’ubukure. Ashobora kuba yarigeze gufungirwa hamwe na Abou Bakr al-Bagdadi.

Ari mu bantu bake bashinze Umutwe wa Leta ya Kisilamu, akaba n’inkingi ikomeye muri IS wasanze Abou Bakr al-Bagdadi muri gereza yari afungiyemo. Mu myaka 15 ishize Amir Al-Salbi na Al-Bagdadi bafunzwe n’ingabo za Leta Zunze Ubumwe z’Amerika,  bafungirwa ahantu hamwe.

Radio Mpuzamahanga y’u Bufaransa RFI, ishimangira ko byumwihariko Al-Salbi ngo azwiho ubutagondwa bushingiye ku idini rya Islam, ubutwari no kuba amaze imyaka myinsi mu mutwe wa Islamic State. Uyu muyobozi mushya ngo yujuje neza ibyo bintu 3 bimuvuzweho nta gushidikanya.

Iti “Inzego z’ubutasi zimaze amezi menshi zimuzi nk’umuntu w’igihangange ushobora kuyobora umutwe wa IS ugakomeza mu murongo wawo nta guhungabana.” Ni muri urwo rwego deparitema ya Leta y’Amerika yatanze itangazo ko umuntu uzafata Al-Salbi ari muzima cyangwa akamuzana ari umurambo, ngo azahabwa igihembo cya miriyoni 5 z’Amadolari.

Umwanditsi:

Kayira Etienne

Tanga Igitekerezo

Email yanyu ntigaragazwa ku rubuga. Amazina na Email ni ngombwa.