17°C , Mostly cloudy | Kigali-Rwanda

Umuvugabutumwa yagaragaje ibintu 5 byugarije umuryango bigira ingaruka ku bana

Yanditswe na Mutungirehe Samuel

Ku ya 14-01-2020 saa 16:06:37
Kwizera Emmanuel, Umuvugabutumwa usanzwe atanga ibiganiro ku muryango nyarwanda

Umuvugabutumwa Kwizera Emmanuel, yagaragaje ibintu bitanu muri iyi minsi byugarije umuryango kandi bigira ingaruka ku bana mu gihe kirekire kandi bisa nk’ibigoranye guhangana nabyo.

Yabigarusteho mu kiganiro cyahurije hamwe abayobozi mu nzego za Leta n’abayobozi bakiri bato, imiryango ishingiye ku myemerere, amadini n’amatorero, mu isengesho ryo gusengera igihugu, by’umwihariko mu kiganiro kigamije kugaragaza uburyo bwo kubaka imiryango mizima ivamo igihugu kizima.

Kwizera, Umuvugabutumwa ukunze gutanga ibiganiro bitandukanye mu Rwanda no hanze ku muryango, yabanje gusobanura ko iyo urebye ibibazo biri mu miryango bifite ingaruka ku bana n’urubyiruko bitakiri ikibazo cyo mu mahanga.

Ati “Ahubwo ni ikibazo kiri hagati muri twebwe ndetse usaga ari ibibazo by’ukuri; aho usanga muri iki gihe urareba ugasanga ibibazo bigaragara cyane cyane mu mibare mu bigo bishamikiye kuri Leta ndetse n’ibigo bya Leta ijanisha ku ngo zitandukana buri munsi, imibare yerekana abana basambanywa bakiri bato ndetse n’abangavu batwara inda. Iriya mibare yose igenda yerekana ko hari ibihazo biri mu ngo zacu.

Ariko nanone reka mvuge ngo uyu munsi twe turiho ni twe tugezweho, nta bwo bikiri igisebo cya ba data, ahubwo umupira uri mu kibuga cyacu kandi koko burya ubuzima bw’ejo hazaza nta bwo bwikora, ubuzima bw’ejo hazaza ni icyo twe duhitamo. Nkunda kuvuga nti turi umusaraba w’amateka ariko nta bwo turi imbata zayo, nta bwo mu by’ukuri twahindura ibyo twanyuzemo, imiryango twabayemo kandi myinshi yari myiza ariko hari n’indi dufite icyo twayigiraho cyakosorwa kandi twahitamo uko ubuzima bw’ejo buzaza”.

Mu bintu bitanu kwizera avuga birimo guteza ibibazo mu miryango, icya mbere ni ikijyanye n’impinduramatwara ababyeyi b’ubu bari guhangana nacyo, cya murandasi (interineti).

Ati “Ni twe babyeyi ba mbere babayeho mu gihe cy’umwaduko wa interineti ‘The First Internet Parenting Generation’; nta bandi babyeyi bigeze babaho bareze mu gihe interineti ari igikoresho cya buri munsi mu buzima.

Ibi rero bigaragazwa n’aho itangazamakuru n’imbuga nkoranyambaga ari byo bigena ikibi n’ikiza ndetse bikagena n’indangagaciro z’uko umuntu ateye. Ni ikintu cya mbere tugomba kubanza kwibazaho”.

Ikindi cya kabiri, Kwizera yavuze uko abantu bari kwihuta cyane mu mibereho, aho ibintu biri kumenyekana kuri bose no mu gihe kihuse kuri bo.

Ati “Turi kurera urubyiruko natwe turimo, aho abantu bashaka kubaho ubuzima bw’ejo bakabubaho uyu munsi. Iki ni ikibazo gikomeye kuko iyo ubyitegereje usanga ari ho gukira vuba bituruka, umuntu ashobora gukira vuba atavunitse”.

Ageze ku cya gatatu yagize ati “Ubuzima bugenda burushaho gukomera, n’abasenga n’abavugabutumwa isengesho ryo gusenga mu buzima ntuhuge ryo sinzi ko Imana izarisubiza kubera ko dutaha mu ngo umugabo n’umugore bahuze; ingo nyinshi zahindutse aho abantu banyuzwa, ni nko ku kibuga k’indege, duhura tunaniwe tuje kuryama ari abana, ari n’ababyeyi babo”.

Icya kane muri izo mbogamizi ni uko abantu bagenda batakaza impamvu zo kubaho, aho usanga ingo nyinshi kubera ibibazo biri mu muryango abantu bagenda batakaza ikizere, bakiheba, abandi bakumva nta mpamvu yo kubaho.

Icya gatanu mu byugarije imiryango, ni uko ubuzima bugenda butakaza umwimerere, aho abantu bari kubana umwe muri bo afite ikindi agamije, nko kwibonera inzira zo kujya mu yandi mahanga yarotaga kuzagera.

Umuvugabutumwa Kwizera yagiriye inama abantu n’inzego bireba ko umuryango ari ikintu gikomeye, cyane ko ubuzima umuntu wese abutangirira mu muryango, akaburangiriza mu muryango, yaba n’umuntu uhawe cyangwa ugiye mu kiruhuko k’izabukuru batamuha igitanda mu biro bye ahubwo asubira aho yaturutse mu muryango bityo nta kigo, ubucuruzi cyangwa ikindi kintu cyasimbura umuryango w’abantu.

Mu bitekerezo bitandukanye bya bamwe mu banyarwanda b’abayobozi bato, Niyonagira Eliane avuga ko ajya ababazwa n’ababyeyi b’abagore bamwe muri iki gihe batagifite inshingano zo kuba ababyeyi bihanganira ibibazo by’urugo, bagahitamo kwigendera ngo bage gushaka uburenganzira bwabo. Ati “nta bwo uzaba umugore ubereye u Rwanda utaraba umugore ubereye abana”.

Umwanditsi:

Mutungirehe Samuel

Tanga Igitekerezo

Email yanyu ntigaragazwa ku rubuga. Amazina na Email ni ngombwa.