17°C , Partly cloudy | Kigali-Rwanda
Abaturage basabwe kwihatira kwipimisha indwara zitandura kugira ngo zifatirwe ingamba (Foto Sezibera)

Umuturage ufite ubuzima bwiza ni we utanga umusaruro – Meya Rwakazina

Yanditswe na Sezibera Anselme

Ku ya 15-05-2019 saa 18:06:52

Umuyobozi w’Umujyi wa Kigali Rwakazina Marie Chantal ashimangira ko umuturage muzima kandi ufite ubuzima bwiza ari we utanga umusaruro mu rwego rw’ubukungu kandi ari na we igihugu gikenera.

Ibyo Meya Rwakazina yabigarutseho kuri uyu wa 14 Gicurasi 2019 mu gutangiza igikorwa cy’ubukangurambaga bwo kurwanya indwara zitandura Umujyi wa Kigali washyiriyeho abaturage.

Ni igikorwa cyateguwe n’Umujyi wa Kigali kuva tariki ya 13-19 Gicurasi 2019, ku nsanganyamatsiko igira iti: “Twirinde indwara zitandura twirinda umubyibuho ukabije”.

Ku nshuro ya 4 ubwo bukangurambaga bukaba bwatangirijwe ku mugaragaro mu kigo nderabuzima cya Remera kandi kikazakomereza no mu tundi turere.

Nk’uko Rwakazina abasobanurira, yagize ati: “Turifuza umuturage ufite ubuzima bwiza, umuturage muzima kandi ni na we ubasha gutanga umusaruro mu bukungu bw’igihugu.”

Rwakazina avuga ko ubukangurambaga bwari busanzwe bukorwa ariko kuri iyi nshuro bwashyizweho imbaraga zirushijeho kuko kuzipimisha kare umuntu aba afite amahirwe yo kuzikira. Muri izo ndwara zitandura avugamo umuvuduko w’amaraso, diyabete, kanseri, no gupima ibiro kuko ari byo akenshi ahamya nka kimwe mu bimenyetso bigaragaza zimwe muri izo ndwara zitandura zavuzwe.

Akomeza atangaza ko izo ndwara zisanzwe zisuzumirwa mu mavuriro atandukanye mu mujyi wa Kigali ariko ubukangurambaga kuri iyi nshuro bugamije gufasha uwaba yarasigaye inyuma atarisuzumisha.

Agira ati: “Twifuza ko n’uwasigaye inyuma tumushyiriraho uburyo bumuha amakuru, tumuhere serivisi hafi kugira ngo abantu baze ari benshi. Ikindi ni ukubiganira kugira ngo abatabizi, ababiburira umwanya, n’ababyirengagiza na bo bihutire kuza kureba izo serivisi.”

Rwakazina yemeza ko ubukangurambaga bwagiye butangwa hamwe n’ubukomeza gukorwa bwagiye butanga umusaruro mwiza, anahinyura abavuga ko ari indwara z’abakire ko atari byo kuko Diyabete n’umuvuduko w’amaraso zose bazihuriraho cyane cyane iyo bagenda bakura.

Akangurira buri wese kwipimisha kuko iyo bikozwe kare bituma habaho gufata ingamba z’imirire ikwiye, gukora siporo no kunywa amazi menshi hakabaho kugabanya amavuta.

Umuyobozi Mukuru w’Ikigo k’Igihugu cy’Ubuzima (RBC) Prof. Condo Jeanine avuga ko ubukangurambaga ku banyarwanda mu kwipimisa indwara zitandura buri kugenda neza kuko umubare w’abipimisha ugenda wiyongera buri mwaka bitewe n’uko aho icyo gikorwa kigenda gikorerwa muri Car Free Day babyitabira, bisobanuye ko bamaze kumva neza akamaro ko kwipimisha izo ndwara.

Prof. Condo asobanura ko bakunda gupima aho ibibazo biri cyane harimo umuvuduko w’amaraso, diyabete, isukari mu maraso ariko hakaba n’igihe bapima umutima na kanseri. Akomeza agira ati: “Muri za Car Free Day dukunda gupima uburebure, ubunini n’ibiro, umuvuduko w’amaraso na Diyabete.”

Nk’uko abigaragaza ku bijyanye n’imiterere y’izo nzego avuga ko kuri diyabete ihagaze kuri 3% mu gihe ku bijyanye n’umuvuduko w’amaraso bihagaze kuri 15%.

Ati: “Ku bantu bakuze hagati y’imyaka 55 na 64 umuvuduko w’amaraso usanga ugeze ku gipimo cya 40%, uwo mubare ugenda wiyongera uko imyaka izamuka.”

RBC ikaba ikomeje gushishikariza Abanyarwanda bose gufata ingamba zikumira indwara zitandura usanga ahanini zibasira abagore kurusha abagabo, bakitabira gukora siporo, kutirirwa bicaye imbere ya televiziyo, kutarya ibintu byose bishoboka, by’umwihariko abana bato biga bahora bagenda mu modoka bicaye bagakoreshwa siporo ku mashuri kuko ibyo byose bituma umuntu atagera ku kigero cyo hejuru.

Abaturage basabwe kwihatira kwipimisha indwara zitandura kugira ngo zifatirwe ingamba (Foto Sezibera)

TANGA IGITEKEREZO

Leave a Reply

Your email address will not be published. Required fields are marked *