17°C , Thunderstorms | Kigali-Rwanda

Umutungo wa Leta: Miliyari 4 muri 7 zanyerejwe zimaze kugaruzwa

Yanditswe na Mugisha Benigne

Ku ya 10-10-2019 saa 05:59:59
Umuvunyi Mukuru wungirije ushinzwe kurwanya ruswa, Musangabatware Clement

Umuvunyi wungirije ushinzwe kurwanya ruswa, Musangabatware Clément, atangaza ko umutungo wa Leta wari waranyerejwe ungana na miriyari 7 z’amafaranga y’u Rwanda, amaze kugaruzwa akaba ari miriyari 4 zisagaho gato.

Ibi Musangabatware abigaragaza nk’umwe mu myanzuro yafashwe na Leta mu mwiherero w’Abayobozi Bakuru wabereye i Gabiro mu Karere ka Gatsibo.

Yagize ati “Tumaze kugaruza umutungo ungana na miriyari 4 z’amafaranga y’u Rwanda muri miriyari 7 zari zaranyerejwe, biracyakomeza kuko amafaranga yose agomba kugarurwa mu isanduku ya Leta.”

Umuvunyi Mukuru wungirije avuga ko kugaruza amafaranga bishingira ku bushake bwa poritiki y’Igihugu no kutihanganira na gato ruswa aho yagaragara hose, ingamba zo kwigisha abaturage gukumira ni kurwanya ruswa mu gihugu kugira ngo batishora muri ruswa.

Avuga ko indi ngamba ishingiye mu gushyira mu bikorwa amategeko arwanya ruswa, nk’itegeko ryashyizweho mu kwezi kwa munani umwaka ushize aho ruswa yagizwe icyaha kidasaza.

Ati “Kugira ngo itegeko rishya rishyirweho nka ruswa nk’icyaha kidasaza, ni ukugira ngo abantu batishora muri ruswa.”

Musangabatware avuga ko indi ngamba ari ubufatanye bw’inzego imbere mu gihugu mu kurwanya no gukumira ruswa, hashyizweho inama ngishwanama yo kurwanya ruswa n’akarengane ikora kuva ku rwego rw’Igihugu kugera mu nzego z’ibanze.

Indi ngamba nyamukuru yerekeranye n’imenyekanisha mutungo no kugaruza umutungo ukomoka kuri ruswa, muri iyi minsi bishyizwemo imbaraga cyane, ndetse n’insanganyamatsiko y’inama ibera i Kigali kuri ruswa ibikomozaho igira iti “Ibihugu by’Afurika birebera hamwe, bigira umurongo umwe, bisangire  ubunararibonye, bisuzume imbogamizi zihari bikagira umurongo umwe mu kugaruza umutungo ukomoka kuri ruswa.”

Avuga ko amafaranga anyerezwa muri Afurika ari menshi, akaba yagombye kubaka ibikorwa remezo nk’amashuri amavuriro, amashuri, ubuzima bw’abaturage n’izindi gahunda zigamije guteza imbere abaturage.

Musangabatware akomeza avuga ko kugaruza umutungo w’Afurika utakara binyuze muri ruswa bishoboka mu gihe ibihugu byagira ubushake no gushyiraho inzego, hakabaho imikoranire n’ubufatanye bw’inzego.

Abaturage bishimira uburyo bwashyizweho bwo kurwanya ruswa

Bamwe mu baturage baganiriye n’Imvaho Nshya bishimira uburyo bwashyizweho bwo kurwanya ruswa mu gihugu kuko butuma abantu benshi batinya kwishora muri icyo cyaha ndetse n’ababigerageje bakabifatirwamo.

Mumararungu Sylvie ni umuturage wo mu Murenge wa Gitega, Akarere ka Nyarugenge, avuga ko ashima ingamba Leta yashyizeho zo kugenzura imitungo y’abayobozi bakamenya n’aho ituruka bikozwe n’Urwego rw’Umuvunyi.

Yagize ati “Leta yashyizeho ingamba nishimira nko kugenzura imitungo y’abayobozi, kumenyekanisha imitungo no kugaragaza aho yavuye, icyo ni kimwe mu bituma abayobozi batazongera kwigwizaho imitungo ya Leta kuko ahanini yaturukaga muri za ruswa n’iyezandonke.”

Uyu mubyeyi kandi avuga ko yishimira kuba hari nomero zashyizweho n’Urwego rw’Umuvunyi umuntu ahamagara mu gihe hari aho abonye ibimenyetso bya ruswa, ngo iyi nayo ni ingamba ituma abaturage babona uko batanga amakuru y’ahari ruswa.

Kanyamasoko Aimable ni umuturage w’Umurenge wa Nyarugenge, Akarere ka Nyarugenge, avuga ko Leta y’u Rwanda yashyizeho ingamba zinyuranye zo kurwanya ruswa, ngo ariko ikibabaje ni uko idacika burundu, gusa na we yemeza ko igenda igabanuka ariko itaragera ku rwego rwo gucika burundu.

Uyu muturage avuga ko yishimira ingamba zashyizweho mu gufata abaryi ba ruswa, ariko ngo zikwiye gukazwa no ku bayobozi bo mu nzego zo hejuru kimwe n’izo hasi, kuko ngo usanga abenshi bakekwaho ruswa ari abo mu nzego z’ibanze bariye nk’ibihumbi 100, miriyoni imwe cyangwa ebyiri, mu gihe ngo hari abarya arenze bo ntibamenyekane ngo bakurikiranwe.

Muri rusange abaturage barashima ingamba Leta yashyizeho ndetse n’Urwego rw’Umuvunyi rushinzwe kurwanya ruswa n’akarengane kuko byatumye ruswa igabanuka ndetse n’abayirya bakaba bazi neza ko nibamenyekana bazabiryozwa, bigatuma abenshi bigengesera.

Umwanditsi:

Mugisha Benigne

One Comment on “Umutungo wa Leta: Miliyari 4 muri 7 zanyerejwe zimaze kugaruzwa”

Tanga Igitekerezo

Email yanyu ntigaragazwa ku rubuga. Amazina na Email ni ngombwa.