21°C , Mostly cloudy | Kigali-Rwanda

Umuti wa COVID-19 ni ukubahiriza amabwiriza-CP Kabera

Yanditswe na KAYITARE JEAN PAUL

Ku ya 29-06-2020 saa 11:19:48

Mu gihe u Rwanda n’Isi bikomeje guhangana n’icyorezo cya COVID-19, inzego zitandukanye zikunze kumvikana zishishikariza Abaturarwanda kubahiriza amabwiriza yo kwirinda ikwirakwira ry’icyo cyorezo.

Abanyarwanda kimwe n’abatuye mu Rwanda bagirwa inama kenshi yo kwambara neza agapfukamunwa, umunwa n’amazuru bipfutse neza, gukaraba intoki no guhana intera ya metero imwe hagati y’umuntu n’undi.

Umuvugizi wa Polisi y’igihugu, CP J.Boso Kabera, yagaragaje ko hari umuti wo kwirinda Koronavirusi no gukomeza kubahiriza amabwiriza.

Yagize ati: “Kugeza ubu umuti dufite wo kurwanya Koronavirusi ni ukubahiriza amabwiriza! Abari muri gahunda ya Guma Mu Rugo bayubahirize n’abandi turi mu mirimo itandukanye tuyubahirize”.

Umuvugizi wa Polisi yakomeje ku bukangurambaga polisi y’igihugu imazemo iminsi ‘NtabeAriNjye’, aho ikangurira abaturarwanda kutaba intandaro yo kwandura no kwanduza abandi.

Ati: “Nange ndayubahiriza ‘NtabeAriNjye’ wandura cyangwa wanduza abandi Koronavirusi. Nawe rero bibe uko”.

Ishami ry’Umuryango w’Abibumbye ryita ku Buzima (OMS/WHO), utangaza ko kwirinda COVID-19 bisaba kwambara agapfukamunwa aho bishoboka hose, gukaraba intoki inshuro nyinshi, gusiga intera ya metero imwe hagati y’umuntu n’undi.

Minisiteri y’Ubuzima ku munsi w’ejo ku Cyumweru tariki ya 28 Kamena 2020, ko habonetse abarwayi bashya 22 b’icyorezo cya Koronavirusi (COVID-19) mu bipimo 3,002 byafashwe mu masaha 24 ashize, hataha abantu 30 bakize neza.

Imibare yatangajwe ku rwego mpuzamahanga yerekana ko muri Afurika abamaze kwandura COVID-19 bageze ku 382,652 barimo 182,569 bakize n’abandi 9,657 bahitanywe na cyo.

Abamaze kwandura ku Isi bangana na 10,272,143 barimo abakize 5,573,549 n’abapfuye 504,965.

Umwanditsi:

KAYITARE JEAN PAUL

Tanga Igitekerezo

Email yanyu ntigaragazwa ku rubuga. Amazina na Email ni ngombwa.