19°C , Mostly cloudy | Kigali-Rwanda

Umusirikare abaye uwa 3 wishwe na COVID-19 mu Rwanda

Yanditswe na Imvaho Nshya

Ku ya 01-07-2020 saa 20:29:14

Nyuma y’igihe kigera ku kwezi ahatangajwe umuntu wa kabiri wishwe n’icyorezo cya COVID-19, kuri uyu wa Gatatu tariki ya 1 Nyakanga 2020 hatangajwe umurwayi wa gatatu wahitanywe na cyo mu Rwanda, akaba yari umusirikare mu Ngabo z’u Rwanda (RDF) wafatiwe mu mahanga ari mu Butumwa bwa Loni bwo kubungabunga amahoro. 

Umurwayi wa kabiri wishwe na COVID-19 yari umupolisikazi Eunid Mbabazi w’imyaka 24 y’amavuko, na we wanduriye mu Butumwa bw’Umuryango w’Abibumbye bwo kubungabunga amahoro. Inkuru y’urupfu rwe yatangajwe tariki ya 2 Kamena , nyuma y’iminsi itatu gusa hatangajwe uwa mbere tariki ya 30 Gicurasi 2020.

Uwo  musirikare wa RDF w’imyaka 51, bivugwa ko yari asanzwe afite ubundi burwayi.

Inkuru ibabaje y’urupfu rwe yatangajwe hamwe n’umubare w’abarwayi bashya 17 batahuwe mu bipimo 3,961 byafashwe mu masaha 24 ashize, hakaba hanatashye 33 bakize neza.

Ibyo byatumye umubare w’abamaze gukira COVID-19 ugera kuri 480  mu bantu 1,042 bamaze gutahurwaho icyo cyorezo mu Rwanda.

Abarwayi bashya batahuwe i Kigali:7, muri Ngoma:6, i Rubavu:2  na Rusizi:2,, bakaba bahise bashyirwa mu kato aho bakomeje kwitabwaho n’abaganga.

Abaturarwanda barasabwa kurushaho kubahiriza amabwiriza yo kwirinda ari yo gusiga intera ya metero, kwambara udupfukamunwa no gukaraba intoki kenshi bakoresheje amazi meza n’isabune cyangwa arukoro yabugenewe.

Umwanditsi:

Imvaho Nshya

One Comment on “Umusirikare abaye uwa 3 wishwe na COVID-19 mu Rwanda”

  1. Uyu mutwe w’inkuru urajijisha, “Umusirikare abaye uwa 3 wishwe na Covid 19 mu Rwanda” wagirango ni abasirikare 3 covid 19 yishe kandi ari umuntu wa 3 ahubwo kuko uwa mbere yari Umuturage. uwa kabiri Umupolisikazi, uwa gatatu Umusirikare. Byaba byiza muvuze muti “Umusirikare abaye umuntu wa 3 wishwe na Covid 19 mu Rwanda”

Tanga Igitekerezo

Email yanyu ntigaragazwa ku rubuga. Amazina na Email ni ngombwa.