22°C , Mostly cloudy | Kigali-Rwanda

Umushinjacyaha wa MICT yanenze ibyemezo bya Mellon

Yanditswe na TWAGIRA WILSON

Ku ya 28-06-2018 saa 07:55:09

Umushinjacyaha Mukuru w’Urwego rushinzwe imanza zasizwe n’Urukiko Mpuzamahanga Mpanamabyaha rw’Arusha (MICT) rwari rushinzwe kuburanisha abakekwaho ibyaha bya Jenoside yakorewe Abatutsi mu 1994, Dr. Serge Brammertz, anenga ibyemezo biherutse gufatwa n’umucamanza mukuru uyobora urukiko rwa MICT Theodore Mellon, byo kurekura bamwe mu bahamwe n’ibyaha bya Jenoside batararangiza ibihano.

Umushinjacyaha Mukuru wa MICT Dr Serge Brammertz avugana n’uw’u Rwanda nyuma y’ikiganiro n’itangazamakuru (Foto Twagira W.)

Dr Serge Brammertz yabivugiye i Kigali ku biro by’Ubushinjacyaha bukuru,   hari mu kiganiro we n’Umushinjacyaha Mukuru wa Repubulika y’u Rwanda Mutangana Jean Bosco, bahaye itangazamakuru mu rwego rwo kugaragaza imikorere y’urwego rwasigariyeho urukiko rwa Arusha, aho umushinjacyaha mukuru wa MICT yanenze imyitwarire y’umucamanza Theodore Mellon.

Impamvu yo kunenga icyo kemezo ni uko Mellon yagiye arekura bamwe mu bahamwe n’ibyaha bya Jenoside yakorewe Abatutsi, akabikora nta bwiriza ashingiyeho n’uburyo u Rwanda rutamenyeshejwe kandi ari ho ibyaha nyirizina byakorewe.

Dr Serge Brammertz ati “Ku kibazo cy’uko hari abaregwa ibyaha  bya Jenoside barekurwa mbere yuko barangiza ibihano, twe nk’ubushinjacyaha nta bwo twivanga mu byemezo by’inkiko, icyakora natwe nta bwo dushyigikiye uburyo yabikozemo, kuko nibura yari kugaragaza amabwiriza yashingiyeho abarekura.

Nk’urugero akavuga ati abo ndekuye barangije 2/3 by’igihano bamaze muri gereza cyangwa hari abitwaye neza, nkuko no mu zindi nkiko bikorwa nk’urwashyiriweho Sierra Leone n’ahandi, ariko nyamara nta byo yakoze, icyakora tuzakomeza ibiganiro”.

Umushinjacyaha Mukuru wa Repuburika y’u Rwanda Mutangana Jean Bosco, abajijwe icyo avuga ku birebana no kongerera manda umucamanza Mellon  ukomeje kunengwa, ndetse n’ibyemezo  akomeje gufata, yavuze ko Minisiteri y’Ububanyi n’Amahanga yazagira icyo ibivugaho.

Yagize ati “Ku mikorere ya  Theodore Mellon no kumwongerera manda, nta bwo bireba ubushinjacyaha, ni ikibazo kireba dipolomasi z’ibihugu,  ku buryo Minisiteri y’Ububanyi n’Amahanga ari yo yagira icyo ibivugaho, naho ku byemezo byo kurekura abatararangiza ibihano kandi barahamwe n’ibyaha bya Jenoside, nta mategeko yakurikijwe kuko uwafashe ikemezo ntiyerekanye ibyo yashingiyeho nk’amabwiriza yo kubarekura.

Ikindi u Rwanda  nk’igihugu cyakorewemo ibyaha bya Jenoside, n’ababikoze bakaba bagifite ubwenegihugu bw’ubunyarwanda, nta mwanya u Rwanda rwahawe ngo rugire icyo rubivugaho, cyangwa abarokotse Jenoside, ndetse n’amashyirahamwe arengera inyungu z’abarokotse n’iyindi miryango, aho kugira ngo  kibe ikemezo gifatwe n’umuntu ku giti ke ntacyo yashingiyeho”.

TANGA IGITEKEREZO

Leave a Reply

Be the First to Comment!

avatar