22°C , Mostly cloudy | Kigali-Rwanda

Umushinga w’uruganda Nzove III ugeze ku kigereranyo cya 98%

Yanditswe na SEZIBERA ANSELME

Ku ya 05-02-2018 saa 08:18:37

Umukozi ushinzwe igenamigambi mu kigo k’Igihugu gishinzwe amazi, isuku n’isukura (WASAC) Murekezi Dominic, avuga ko umushinga w’uruganda rwa Nzove ya 3 watangiye tariki ya 13 Nzeri 2016 imirimo yose igeze ku kigereranyo cya 98% bikaba biteganyijwe ko izarangira muri uku kwezi kwa Gashyantare 2018 hakabona gutangira igeragezwa ryawo.

Uruganda rw’amazi rwa Nzove ya III rutegerejweho metero kibe 40 000 z’amazi ku munsi (Foto James R.)

 

Murekezi avuga ko uruganda rwa Nzove ya 3 rwitezweho gukemura ikibazo kinini k’ingano y’amazi adahagije mu Mujyi wa Kigali kuko kugeza uyu munsi i Kigali hatangwa amazi angana na metero kibe 90 000 ku munsi zitangwa n’inganda zose zakozwe.

Atangaza ko ibyo bipimo bivuzwe bishobora guhindagurika bitewe n’uburyo ikirere kimeze kuko hari igihe imvura igwa ari nyinshi igahungabanya ibikorwa byo kuyungurura amazi, bigatuma ayasabwaga gutunganywa ku munsi agabanuka.

Murekezi akomeza asobanura ko habaho n’ikindi gihe WASAC ihura n’ikibazo cyo kubura umuriro nka kimwe mu biyigiraho ingaruka inganda n’amapompe bisunika amazi bikaba bitakibashije gusunika ingano yasabwaga bityo metero kibe 90000 zikaba zamanuka zikaba 80 000 no munsi yazo kuko iyo yawubuze idashobora gukoresha ubushobozi bwose yari ifite.

Agira ati: Uruganda rwa Nzove ya 3 icyo ruje kuzadufasha ni uko metero kibe 90 000 z’amazi WASAC itanga kugeza ubu zizazamuka zikaba meterokibe 145 000 kuko umushinga w’urwo ruganda rwa Nzove uzayongerera metero kibe 55 000 birimo izigera kuri 40 000 by’urwo ruganda rushya n’ibindi 15 000 ku ruganda rwubatswe umwaka ushize wa 2017 rurimo kongererwa ubushobozi”.

Mu mujyi wa Kigali habarizwa imiyoboro y’amazi ifite uburebure bw’ibilometero 2600, umushinga wa Nzove ya 3 ukaba uzatwara ingengo y’imari ingana na miliyoni zisaga 28 z’amadolari y’Amerika.

TANGA IGITEKEREZO

Leave a Reply

Be the First to Comment!

avatar