23°C , Partly cloudy | Kigali-Rwanda

Umusanzu wanyu mu kubaka igihugu ni ingenzi – Prof Shyaka abwira Abanyarwanda baba muri USA

Yanditswe na Imvaho Nshya

Ku ya 13-02-2020 saa 10:31:28
Ifoto y’urwibutso Minister Professor Shyaka Anastase ari kumwe na Ambassador Mukantabana Mathilde bari kumwe n’abahagarariye abanyarwanda muri USA

Ku nshuro ya Gatandatu, abahagarariye imiryango y’Abanyarwanda baba muri Leta Zunze ubumwe za Amerika bahuriye mu mwiherero ngarukamwaka, bakoreye muri Washington DC, umujyi Leta ebyiri za USA zihuriyeho arizo Maryland na Virginia, ku itariki ya 08/02/2020.

Ni imiryango ihagarariye abanyarwanda igera kuri 27.

Atangiza iyo nama, uhagarariye urugaga rw’abanyarwanda baba muri USA (United States Rwandan Community Abroad), Prof Musiine John, yavuze ko uretse guhuza ibikorwa bitandukanye byo gufatanya n’abandi banyarwanda, bari bafite umuhigo wo gukomeza kongera imiryango hirya no hino muri USA ibyo bikazabafasha guhuriza hamwe imbaraga na gahunda z’Abanyarwanda bose batuye muri Amerika yaba mu bikorwa byabo by’akazi ka buri munsi, guhuza gahunda z’umuco, kuganira kuri gahunda z’iterambere ry’igihugu ndetse no gushyira hamwe bakarwanya abagifite ingengabitekerezo no gupfobya Jenocide yakorewe Abatutsi.

Peerzida wa Diaspora nyarwanda y’abatuye muri USA Professor John Yves Musiine.

Buri mwaka bari bafite Intego yo gutangiza  nibura imiryango nyarwanda itanu, ariko Abanyarwanda bakaba barakomeje kwiyegeranya, bituma ahubwo havuka imiryango mishya 7, igikorwa gishobora kwiyongera bitewe n’uburyo Abanyarwanda bakomeje kumva ibyiza byo gukorera hamwe, uko kwegerana kukaba gutuma buri wese uri mu batuye muri USA, bitewe n’icyo akora amenya uruhare yagira mu guteza imbere igihugu, ari abikorera, abanyeshuri, abarimu n’abandi bakora imirimo itandukanye, cyane ko bagenda biyongera.

Akamaro k’inama nk’iyi kandi, kagarutsweho n’uhagarariye u Rwanda muri USA, Ambasaderi Mathilda Mukantabana, wavuze ko iyo nama ngarukamwaka ari ikintu gikomeye ku Banyarwanda batuye muri iki gihugu bakomeje kugaragaza ko bafite inyota yo kubaka u Rwanda aho bari.

Ambasaderi Mathilda MUKANTABANA atangiza umwiherero wa gatandatu w’abagize diaspora nyarwanda yo muri USA.

Ibi bikaba bigaragazwa n’uburyo imiryango idasiba kuvuka, yiyongera ku isanzwe. Uretse kungurana ibitekerezo mu buryo butandukanye, yabasabye gukomeza guharanira kugaragaza ishusho nziza y’u Rwanda. Imibare y’ubukerarugendo, ishoramari, abanyeshuri no kongerera urubyiruko ubumenyi bikorwa mu nzego zitandukanye muri USA, akaba ari kimwe mu bigaragaza ko umusaruro ari mwiza ariko abasaba gukomereza aho.

Mu ijambo rya Minisitiri w’Ubujtegetsi bw’igihugu Prof Shyaka Anastase yabanje kubashima uko badahwema gutekereza igihugu cyababyaye. Ati, « Igihugu cy’u Rwanda n’abana bacyo baba hanze ubumwe burakomeza kwiyongera. Namwe muba muri USA mufite ubushake bwo kubaka no kumenya gushyira hamwe no guhura ngo muganire, cyane ko dufite inshingano zo kubaka igihugu.”

Yishimiye kandi uko bakomeje kugenda bongera imiryango anabasaba kujya bazirikana abatabona amakuru ku Rwanda, kuko abarwanya u Rwanda bata baticaye ubusa. Gusa nabo akaba yababuriye ko u Rwanda rufite imbaraga nyinshi, zaba izo kubaka igihugu mu bikorwa by’amajyambere, no kurwanya ababisagararira.

Imwe mu myanzuro yafatiwe muri uwo mwiherero, ni ukongera ubufatanye no gushishikariza Abanyamerika gusura u Rwanda cyane cyane gushora imari mu bikorwa bitandukanye nk’uko imibare iriho ikomeje kwiyongera ibigaragaza.

Nk’uko bisanzwe uwo mwiherero w’abayobozi bayoboye imiryango y’abanyarwanda muri USA, uhurirana n’igikorwa gikomeye cyo gusengera abo bayobozi ba USRCA ,abayobozi b’u Rwanda , Abaturarwanda  ndetse n’u Rwanda by’umwihariko.

Iki gikorwa uretse abo bayobozi hanatumirwa Abanyarwarwanda bose batuye muri USA n’inshuti zabo, cyitabiriwe n’abagera kuri 500.

Mu ijambo Dr Murigande Charles yagejeje abari bitabiriye ayo masengesho, yavuze ko Imana ikunda cyane u Rwanda n’Abanyarwanda, kuko ugereranyije intambwe rwateye n’aho rwavuye n’inzitane rwagiye ruhura nazo, bigaragara ko Imana yarubaye hafi koko.

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.