19°C , Mostly cloudy | Kigali-Rwanda

Umuryango “Spero Initiative” ukomeje gufasha abana binyuze muri siporo

Yanditswe na BUGINGO FIDELE

Ku ya 20-07-2020 saa 13:44:14
Imiryango 20 yahawe mituweri na Spero Initiative

Umuryango “Spero Initiative” ukomeje gukora ibikorwa  byo gufasha abana bakiri bato  binyuze muri siporo, uburezi ndetse n’ubuzima.

Uyu muryango watangiye muri Kanama 2019 utangijwe na Ndizeye Yves usanzwe ari umutoza mu mukino wa Table Tennis ufite impamyabumenyi yo ku rwego rwa gatatu 3 (Level 3) itangwa na ITTF afatanyije na  Miss Mutesi Aurore Kayibanda wabaye Nyampinga w’u Rwanda mu mwaka wa  2012.

Ndizeye Yves (ibumoso) na Miss Mutesi Aurore Kayibanda (iburyo) batangije umuryango Spero Initiative

Kuri ubu, Umuryango “Spero Initiative” ukaba waramaze kubona  icyangombwa kiwemerera gukora mu buryo bwemewe n’amategeko.

Umwe mu batangije uyu muryango, Ndizeye Yves yatangarije Imvaho Nshya ko   uretse bo bawutangije bafite n’abandi bantu 4 bakorana. Akomeza avuga ko intego yabo ari uguteza imbere umwana w’umunyarwanda ukiri muto mu buryo bwose bushoboka  binyuze muri siporo, uburezi ndetse n’ubuzima.

Uyu muryango watangije  ishuri  ry’umukino wa Table Tennis «Spero Table Tennis Academy»  muri Camp Kigali mu karere ka Nyarugenge ndetse na Rilima mu  Karere ka Bugesera.

Ubwo hatangizwaga Spero Table Tennis Academy i Bugesera

Ndizeye yagize ati: “Dufasha abana cyane cyane tukareba abatishoboye kugira ngo  bazabashe kugera ku ndoto zabo z ‘ejo hazaza heza, umwana utarimo kwiga ubuzima nta bwo biba bimeze neza, kwiga bituma umutu amenya uko ejo hazaza he hazaba hameze.”

Akomeza avuga ko bakoresha siporo kuko  ituma abantu bashobora kwiyakira muri sosiyete kuko ihuza abantu b’ingeri zitandukanye mu byiciro byose.

Ndizeye avuga ko bahisemo  gushyira imbagara no mu buzima kuko umwana  iyo amaze kumenya gukina umukino runaka agomba no kugira ubuzima bwiza.

Ibikorwa umuryango “Spero Initiative” umaze gukora

Muri Gicurasi 2020, uyu muryango wageneye imiryango y’abana 27 ibiribwa kugira ngo bibafashe muri iki gihe cya COVID-19 kubera ubuzima bwabo  butari  bworoshye mu gihe cya “Guma mu rugo”.

Ubwo imiryango 27 yashyirizwaga inkunga y’ibiribwa muri iki gihe cya COVID-19

Ndizeye ati: “Twabikoze rero ngo tubegere tubereke ko tubazirikana, umwana nta bwo wamutoza Table Tennis ngo umwime ibiryo  kandi ufite ubushobozi bwo kubimubonera, twishatsemo ubushobozi  yaba mu Rwanda no hanze tubabonera inkunga y’ibiribwa”.

Mu mafaranga yakusanyijwe  nyuma yo kugura ibiribwa ayasagutse, umuryango “Spero Initiative” wabashije kwishyurira mituweri imiryango 20 irimo abantu 212 ndetse unabashyikiriza udupfukamunwa mu rwego rwo gukomeza kubakangurira kwirinda  iki cyorezo cya COVID-19. Iki gikorwa kikaba cyarabaye tariki 18 Nyakanga 2020.

Uretse mituweri, imiryango 20 yagenewe n’udupfukamunwa mu kubafasha kwirinda icyorezo cya COVID-19

Ibi bikorwa byombi bikaba byaratwaye amafaranga asaga ibihumbi 3 by’amadorari y’Amerika ni ukuvuga asaga miriyoni 2,5 z’amafaranga y’u Rwanda.

Kuri ubu Ndizeye Yves ari mu Bushinwa aho arimo gusoza amasomo mu gihe Miss Mutesi Aurore Kayibanda ari muri Leta zunze ubumwe z’Amerika gusa  uyu muryango ufite abandi bakorana bari mu Rwanda barimo  Iyamuremye Antoine, Umutoni Consolée, Mugwaneza Annick  na Bushema  Aimé Frank.

 

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.