18°C , Mostly cloudy with thunderstorms | Kigali-Rwanda
Dr Karima Kizito watangije umuryango PCFR

Umuryango PCFR wiyemeje kumenyekanisha amateka ya Jenoside mu mahanga

Yanditswe na TWAGIRA WILSON

Ku ya 07-03-2018 saa 13:47:44

Mu gihe u Rwanda rwitegura kwibuka ku nshuro ya 24 Jenoside yakorewe Abatutsi mu 1994, Umuryango PCFR   “Peace Centre for Forgiveness Unity and Reconciliation” uharanira guteza imbere gahunda z’ubumwe n’ubwiyunge ukorera muri Leta Zunze Ubumwe z’Amerika mu mujyi wa Indian, watangiye  igikorwa cyo kumenyekanisha amateka y’ibyabaye muri Jenoside yakorewe Abatutsi mu 1994.

Dr Karima Kizito watangije umuryango PCFR

Icyo gikorwa kiswe “Rwandan Genocide against the Tutsi Pop-up Museum”cyatangiye ku itariki ya 26 Gashyantare 2018 kikazasozwa  ku itariki 28 Mata 2018.

Umuyobozi wa PCFR Dr Karima Kizito nk’umwe mu barokotse Jenoside yakorewe abatutsi mu Rwanda, avuga ko  nk’Umuryango witwa ‘Peace Center for Forgiveness & Reconciliation’, bafite zimwe mu ntego z’ibanze zirimo  kumenyakanisha Jenoside yakorewe Abatutsi n’ingaruka zayo.

Iki gikorwa kikaba cyaratewe inkunga na ‘Indiana Humanities’, inafasha abaturage ba Indiana guhura bakaganira, bagasoma inyandiko ku mateka ya Jenoside yakorewe abatutsi,  bakungurana ibitekerezo kandi batekereza ku buzima bwiza bw’ikiremwamuntu, baharanira ko ibyabaye bitazongera kubaho ukundi.

Uretse kumurika amateka ya Jenoside, Karima avuga ko iki gikorwa kirimo n’ibindi byiciro bitandukanye hakurijwe ibigomba kwigishwa no gusobanurwa, banereka abanyamahanga ibirebana n’Umuco Nyarwanda: Kwigisha no gusobanura uko bimwe mu bikoresho nyarwanda byakoreshwaga n’Abanyarwanda bo hambere, cyangwa bigikoreshwa kugeza ubu. Urugero: Inkangara, Inkongoro, Igisabo n’ibindi biranga umuco nyarwanda.

Ku bijyanye n’Amateka kuri Jenoside yakorewe Abatutsi mu 1994, muri iyo gahunda abamurika bigisha abantu barimo n’abanyamahanga ndetse n’abagize diaspora, amateka yaranze u Rwanda kugeza aho Jenoside ibereye. Uruhare runini abakoloni bagize mu guhindura imibanire y’Abanyarwanda narwo rugarukwaho.

Bagaragaza uruhare rw’imiryango iharinira amahoro ku isi ifite mu kurwanya Jenoside: Gukangurira indi miryango mpuzamahanga ishinzwe kubungabunga amahoro, guhaguruka bakarwanya ikitwa Jenoside n’ubundi bwicanyi bwose ndengakamere bwibasiye abantu runaka.

Mu itangazo   rigenewe abanyamakuru   Umuyobozi wa PCFR yashyize ahagaragara, Kizito D. Kalima asobanura ko icyamushishikaje ari ugushishikariza  buri wese  ko yashyiraho umuhate mu kuvuga no gutanga ubuhamya kuri Jenoside yakorewe Abatutsi n’ingaruka zayo.

Ashishikariza cyane abarokotse Jenoside n’ababarokoye  gushaka ukuntu bajya bavugisha ukuri ku byo babonye n’ibyo banyuzemo, kugira ngo byandikwe kandi bishyirwe mu bubiko bwabugenewe.

 

 

TANGA IGITEKEREZO

Leave a Reply

1 Comment on "Umuryango PCFR wiyemeje kumenyekanisha amateka ya Jenoside mu mahanga"

avatar
Sort by:   newest | oldest | most voted
Somayire Antoine
Guest

Iki gikorwa ni lngirakamaro ku buryo bunyuranye ;mu rwego rwo kurwanya no kumenyekanisha jenoside yakorewe Abatutsi.