19°C , Partly cloudy | Kigali-Rwanda

Umuryango AMI watangiye gutoza urubyiruko gukemura amakimbirane no kwihangira imirimo

Yanditswe na Amani Claude

Ku ya Sep 20, 2018 saa 8:22

Ku bufatanye n’impuzamiryango mpuzamahanga “PAX CHRISTI INTERNATIONAL”, Umuryango nyarwanda, utari uwa Leta ufite inararibonye mu gutoza abantu umuco w’amahoro (AMI/Association Modeste et Innocent) kimwe n’indi miryango ihuriye muri “Reseau PAX CHRISTI- Afrique des Grands Lacs” byatangiye gushyira mu bikorwa umushinga ugamije gutoza urubyiruko rwiga mu mashuri yisumbuye na Kaminuza ndetse n’urutiga, uburyo bwo gukumira no gukemura amakimbirane mu buryo budahutaza no kwihangira imirimo.

Gahunda yo gutoza urubyiruko yatangiye gutanga umusaruro mu miryango rukomokamo

PAX Christi International ni umuryango mpuzamahanga w’amahoro wa Kiliziya Gatolika washinzwe mu Burayi mu mwaka 1945 nyuma y’intambara ya kabiri y’Isi yose ugamije guhuza Abafaransa n’Abadage mu rwego rw’ubwiyunge bwabo.

Kugeza ubu iyi mpuzamiryango ifite abanyamuryango b’imiryango 120 mu bihugu 50 ku Isi, intego zayo nyamukuru zikaba ari uguharanira  amahoro ku batuye Isi, guharanira iyubahirizwa ry’uburenganzira bwa muntu, ubutabera n’ubwiyunge. Kugira ngo ishyire mu bikorwa imishinga imwe n’imwe, ifatanya n’abanyamuryango bayo bari ahatandukanye ku isi.

Umuryango Association Modeste et Innocent (AMI) uhagarariye impuzamiryango “PAX CHRISTI INTERNATIONAL” mu Rwanda ukaba ubarizwa mu ihuriro  “PAX CHRISTI- Afrique des Grand Lacs” (mu Biyaga Bigari) watangije uyu mushinga mu kwezi kwa Kanama 2018.

Iri huriro ni ryo ryatangije uyu mushinga wo gufasha urubyiruko ukaba uri gushyirwa mu bikorwa mu Rwanda, mu Burundi, no muri Repubulika iharanira Demokarasi ya Congo (RDC).

Ku ikubitiro, AMI yatangiranye n’urubyiruko 60, abahungu 30 n’abakobwa 30 bo muri Paruwasi ya Rugango yo muri Diyosezi Gatolika ya Butare. Uru rubyiruko rukaba ruturuka mu miryango itandukanye y’Agisiyo Gatolika (Mouvements d’Action Catholique) ikorera muri iyo Paruwasi.

Umuhuzabikorwa wa AMI, Bwana Jean Baptiste BIZIMANA yatangarije Imvaho Nshya ko uyu mushinga witezweho gutsimbataza amahoro binyuze mu rubyiruko rufatwa nk’imbaraga z’igihugu kandi rukaba ari na rwo Isi y’ejo.

Yavuze ko afite ikizere ko uru rubyiruko nirumara gutozwa, ruzagira umumaro munini mu muryango nyarwanda cyane cyane mu miryango ruturukamo no mu baturanyi.

Urubyiruko rwose hamwe ruzatozwa mu mwaka wa mbere w’uyu mushinga rugera ku 180. Yakomeje avuga ko bimaze kugaragara ko mu bihugu byinshi byo ku isi haba muri Afurika y’Ibiyaga Bigari ndetse no mu Rwanda, urubyiruko rwagiye rwoshywa n’ababifitemo inyungu maze rugakoreshwa mu bugizi bwa nabi, ndetse nko mu Rwanda rwashowe muri Jenoside yakorewe Abatutsi.

Bwana BIZIMANA yagize ati “Uru rubyiruko tuzarutoza uburyo bukwiye bwo gukemura amakimbirane mu buryo budahutaza n’uburyo bwo kuyirinda no kuyakumira. Uko byaba biri kose, uko akarengane kaba ari kose, mu gukemura amakimbirane umuntu ntagomba kuvutswa uburenganzira bwo kubaho mu mutuzo no mu mudendezo. Tuzabatoza gukura mu myumvire, kuba bo nyirizina, aho kuba ba Rukurikizindi, bakurikira ababashuka batabanje kubitekerezaho na ba Babona bagambirira inyungu zabo bwite kabone n’iyo ubuzima bwa bamwe bwashyirwa mu kaga.”

Yakomeje agira ati “Birazwi kandi ko urubyiruko rwacu rukennye, ari na yo ntandaro nyamukuru yo kuba rwayoboka inzira mbi no gushukika bikarworohera. Uyu mushinga kandi  uzafasha uru rubyiruko kwiteza imbere, rufashwa kubyaza umusaruro amahirwe ari mu duce batuyemo bityo bazabere n’abandi urugero rwiza mu kwihangira imirimo.”

Kuri AMI, ibyavugwaga kera n’abahanga ko ngo “Ushaka amahoro ategura intambara”, si ko bo babibona kandi babyemera, bo bemera ko “ushaka amahoro ategura amahoro”. Basanga urubyiruko ruramutse rugiye rutozwa hakiri kare umuco w’amahoro, kudahutazanya, guha buri wese agaciro n’icyubahiro kimukwiriye, Isi yarangwa n’amahoro.

Abanyamuryango ba PAX CHRISTI INTERNATIONAL (PCI) bahisemo gutoza urubyiruko umuco w’amahoro nk’imwe mu nzira yo kurema amahoro arambye ku Isi.

AMI na PCI bemera ko urubyiruko rukwiriye gutozwa kuzamura imyumvire rukajya rubasha gushungura ibyo rubwirwa bityo rukabasha kwihitiramo ikiruha amahoro n’igihugu muri rusange, aho kugendera ku bitekerezo bitubaka akenshi biba bigendereye inyungu za bamwe n’igihombo ku bandi.

Umwe mu rubyiruko rwatangiye gutozwa NTAWUKURIRYAYO Eugène, ashima aya mahirwe bahawe, akavuga ko ubumenyi bamaze guhabwa bwatangiye gutanga umusaruro kuko hari bamwe batangiye gukemura amakimbirane yo mu miryango bakoresha uburyo bw’ubuhuza.

Padiri Mukuru wa Paruwasi Rugango Jean Pierre BAKURIREHE,  avuga ko yishimiye uyu mushinga kuko uzafasha urubyiruko rwa Paruwasi ayoboye gushyira mu bikorwa ivanjiri ya Yezu aho yabuzaga abantu gushyamirana. Yishimiye kandi ko uyu mushinga uzanabateza imbere mu buryo bwo kwihangira imirimo, bakava mu bushomeri bubugarije.

Uyu mushinga watangijwe na AMI ufite intego imwe n’indi mishinga isanzwe ifite aho yiyemeje kubungabunga “UBUNTU” mu bantu bishatse kuvuga gukangurira abantu, gukangura imisusire y’Imana ibarimo.

Ubuntu ni ukuryoha kandi ni ugutanga. Umuntu uryoshye aba ari muzima mu mubiri, muri roho, mu bwenge no mu mutima na ho gutanga  bikaba gukora ku buryo uburyohe bwawe busakara mu gihugu bukagirira abandi akamaro: umubiri wawe muzima ukazahura ubukungu bw’igihugu, umutima wawe utajabuka ukaboneza ubuyobozi bw’igihugu, ubwenge bwawe bushishoza bukeza umuco w’igihugu, na ho umwuka wawe (roho) w’impagarike (nzima) ukanoza imibanire y’abatuye igihugu.