17°C , Partly cloudy | Kigali-Rwanda

Umurenge Kagame Cup 2019: Amakipe yakoze uburiganya yakuwe mu irushanwa

Yanditswe na BUGINGO FIDELE

Ku ya 06-06-2019 saa 17:35:27
Ikipe y'Umurenge wa Kivumu (Rutsiro) yasezerewe kubera gukinisha umukinnyi utujuje ibyangombwa

Tariki 09 Kamena 2019 ni bwo hazasozwa irushanwa ry’Umurenge Kagame Cup 2019 ryatangiye muri Gashyantare 2019.  Iri rushanwa rigamije kwimakaza amahame y’imiyoborere myiza ririmo imikino itandukanye irimo umupira w’amaguru, Basketball, Volleyball, Gusiganwa ku magare, Gusiganwa ku maguru ndetse n’imikino y’abafite ubumuga  ya Sitball.

Mbere y’uko haba imikino ya  nyuma hari amakipe yakuwe mu irushanwa kubera uburiganya. Aya makipe ni Masaka mu mupira w’amaguru mu bagabo yari yatsindiye gukina umukino wa nyuma hanyuma Nyarugenge ikabarega ko bakinishije umukinnyi, Uwiringiye Samuel wakiniye Umurenge wa Ndera.

Indi kipe yasezerewe na Kivumu mu mupira w’amaguru mu bagore ari na yo yari ifite igikombe inshuro 2 ziheruka. Iyi kipe yari yageze ku mukino wa nyuma isezereye Gihombo (Nyamasheke). Kivumu rero yerezwe ko yakinishije Vumiliya Tindo adafite ibyangombwa byerekane ko ari umunyarwanda.

Ikipe y’Umurenge wa Kivumu (Rutsiro) yasezerewe kubera gukinisha umukinnyi utujuje ibyangombwa

Muri Volleyball, ikipe ya Kicukiro yarasezerewe nyuma yo kuregwa na Rubavu ko yakinishije Niyibizi Claude ufite ikarita y’abanyamahanga.

Iyi akaba ari imyanzuro yafashwe na komite  nkemurampaka  rwego rw’Igihugu igizwe na Rubulika Anthony (RGB), Ndahiro Innocent (MINALOC), Munyanziza Gervais  na  Habyarimana Florent (MINISPOC).

Ku bijyanye n’uburiganya bw’amakipe, Guverineri w’Intara y’Amajyepfo CG Gasana Emmanuel yasabye  abayobozi b’uturere  turimo imirenge yagiye ikora uburiganya mu mikino yo ku rwego rw’Intara   guhana Umuyobozi w’Imiyoborere Myiza n’ushinzwe Urubyiruko, Umuco  na Siporo mu Karere ndetse n’Umunyamabanga Nshingwabikorwa w’umurenge.

Iyi mirenge ni Gatare muri Nyamagabe, Ruramba (Nyaruguru), Busasamana (Nyanza) na Tumba (Huye).

Gahunda y’imikino ya nyuma

Imikino yo gusoza iteganyijwe tariki 09 Kamena 2019, mu mupira w’amaguru mu bagore,  Gihombo (Nyamasheke) izakina na Nyakabanda  (Nyarugenge), umukino ubere kuri Sitade ya Huye (11h00). Mu bagabo, Nyarugenge izakina na Gihango (Rutsiro), umukino ubere kuri Sitade ya Huye (13h30).

Muri Volleyball, mu bagore, Karongi izakina na Gatsibo (9h00) naho mu bagabo Kirehe ikine na Rubavu (11h00). Imikino yombi izabera muri Gymnase ya Gisagara.

Muri Basketball, Musanze izakina na Nyarugenge mu bagore (9h00) ndetse no mu bagabo (11h00). Imikino izabera UR-Huye.

Muri UR Huye kandi hazanabera imikino y’abafite ubumuga  “Sitball” mu bagore (9h00) no mu bagabo (11h00).

Mu gusiganwa ku magare, isiganwa rizatangira saa tatu (9h00) mu bagabo n’abagore ahazakoresha umuhanda wa Gisagara-Huye.

Mu gusiganwa ku maguru, amarushanwa azabera muri Sitade ya Huye saa mbiri(8h00) naho mu bagabo n’abagore.

Aya marushanwa yatangiye mu mwaka wa 2006 yitwa “Amarushanwa y’Imiyoborere Myiza” hagamijwe kwimakaza amahame y’imiyoborere myiza. Muri 2010 aya marushanwa yahawe izina “Umurenge Kagame Cup” mu rwego rwo kugaragaza no gushimira Perezida w’u Rwanda Paul Kagame uruhare rwe rukomeye mu miyoborere myiza n’inkunga atanga mu iterambere rya siporo mu Rwanda no mu Karere igihugu cy’u Rwanda  giherereyemo.

TANGA IGITEKEREZO

Leave a Reply

Your email address will not be published. Required fields are marked *