20°C , Mostly cloudy | Kigali-Rwanda

Umuraperi Kivumbi yasezerewe mu irushanwa ‘The Next Pop Star’

Yanditswe na Gisubizo Gentil M.

Ku ya 07-12-2020 saa 11:26:14

The Next Pop Star ni irushanwa riri kuba ku nshuro yaryo ya mbere, Umuraperi Kivumbi akaba yasezerewe azize kutitabira igitaramo cya Live bagenzi be bakoreye imbere y’Akanama Nkemurampaka.

Iki gitaramo cyabaye ku Cyumweru tariki 6 Ukuboza 2020 ni bwo abahanzi 19 bahatanira igihembo cya ‘The Next Pop Star’ banyuze imbere y’Akanama Nkemurampaka baririmba mu buryo bwa Live, mu gitaramo cyanyuze kuri KC2.

Iki kiciro cyagezemo abahanzi 20, mu gutaramira imbere y’Akanama Nkemurampaka habonetse 19 kuko Kivumbi atigeze abasha kuhagera.

Amakuru yo gusezererwa k’uyu musore yemejwe n’ubuyobozi bw’iri rushanwa, wabwiye itangazamakuru ko kutitabira igitaramo cya Live bagenzi be bakoreye imbere y’Akanama Nkemurampaka byahise bimusezerera.

Uyu musore kuva yakwinjira mu bahanzi 20 mu kiciro cy’abagombaga gutaramira imbere y’Akanama Nkemurampaka, kimwe n’abandi, yagombaga kwitabira imyitozo yose ariko bivugwa ko yayitabiriye inshuro imwe gusa.

Usibye Kivumbi utarakunze kwitabira, Marina na we wasibye imyitozo ya nyuma, yagaragaye ku munsi wo gutaramira imbere y’Akanama Nkemurampaka.

Ubwo uyu muhanzikazi yari ageze imbere y’Akanama Nkemurampaka yaririmbye indirimbo yitwa “Diamond” ya Rihanna.

Umuhanzikazi Marina ari mu bari guhatanira igihembo cya The Next Pop Star

Akanama Nkemurampaka muri iri rushanwa kari kagizwe na Zizou Alpacino,Tidjala Kabendera na Lion Imanzi bose bamenyerewe mu ruhando rw’imyidagaduro n’umuziki nyarwanda.

Abahanzi 19 bose banyuze imbere y’akanama nkemurampaka, amanota yabo azateranywa n’amajwi y’ababatoye, ku wa Gatatu tariki 9 Ukuboza 2020 ni bwo hazatangazwa 6 bazaba bageze mu kiciro cya nyuma cy’iri rushanwa.

Irushanwa rya The Next Pop Star ryitezweho guhindura ubuzima bw’abaryitabiriye. Abahanzi 18 bitabiriye iki gitaramo, baganiriye n’itangazamakuru, dore ko Marina we yanze kuvugisha itangazamakuru, bagaragaje ko iri rushanwa rifite umwihariko ndetse ritanga ikizere ku muhanzi uzaryegukana.

Abahanzi basigaye bahatana muri iri rushanwa barimo; Hirwa Irakoze Honorine, Sammy Yvone Uwikunda wamenyekanye cyane muri Symphony Band, Nyatanyi Tuyisenge David, Kibatega Jasmine, Yannick Gashiramanga, Mahoro Ines, Muhirwa Issa uzwi nka Maylo umwe mu baraperi bakomeye bo mu Karere ka Musanze.

Harimo kandi Ish Kevin usanzwe uzwi mu muziki, Eric Ntwari, Marina ubarizwa muri The Mane, Rwamukwaya Theo Blaise, Cyubahiro Serge uzwi muri Neptunez Band, Bampire Joie, Gisa Cy’Inganzo, Mubiligi Allelua Pierrine, Kenny Kshot, Milly, Cyiza Jackson na Gihozo Credo Santos.

Umuyobozi Mukuru wa SM1 Music Group/Sony Music Group, Clay Dustin, aherutse gutangaza ko abazatsinda biyongereye bakaba babiri, uwa mbere azahabwa miriyoni 50 Frw n’amasezerano y’imikoranire n’iyi sosiyete mu gihe uzaba uwa kabiri azahabwa amasezerano y’imikoranire gusa.

Kibatega Jasmine ari mu bahatanira iki gihembo

Zizou Alpacino, Tidjala Kabendera na Lion Imanzi nibo bagize Akanama Nkemurampaka

Umwanditsi:

Gisubizo Gentil M.

Tanga Igitekerezo

Email yanyu ntigaragazwa ku rubuga. Amazina na Email ni ngombwa.