21°C , Mostly cloudy | Kigali-Rwanda

Umunyamideli Mimi Mirage yageze i Kigali avuga  ku mubano afitanye na Sadio Mane

Yanditswe na GISUBIZO GENTIL MOISE

Ku ya 08-12-2019 saa 12:12:24
Mimi Mirage yavuze ku bushuti afitanye na Sadio Mane

Umunyamideli w’umunyarwandakazi wamamaye nka Mimi Mirage yageze mu Rwanda avuga ku mpano yoherereje Mwiseneza Josiane nk’impano y’imodoka yamwemereye n’umubano wihariye uvugwa hagati ye n’umukinnyi wo muri Senegal, Sadio Mane.

Mimi Mirage yageze ku kibuga Mpuzamahanga cy’Indege cya Kigali i Kanombe ahagana saa kumi z’urukerera yakirwa n’itangazamakuru.

Mu kiganiro yagiranye n’itangazamakuru, uyu munyamideli wari umaze umwaka n’amezi abiri avuye mu Rwanda yavuze ko yari akumbuye Kigali n’abantu bayo by’umwihariko inyubako ya Kigali Arena.

Yavuze ko mu bimuzanye harimo ibikorwa bye by’ubucuruzi asanzwe akora n’ibindi by’ubugiraneza dore akunze gufasha abatishoboye n’ubwo atavuze neza uko azabikora.

Mimi Mirage yagize ati : “Akenshi iyo nje hano mba nzanywe n’ubucuruzi no gusura abantu. Ubu nzanywe n’ubucuruzi ariko hari n’ibindi bikorwa nje gukora numva nkeneye gukora nko gufasha abantu.”

Mimi Mirage yongeyeho ko afite amatsiko yo guhura ku nshuro ya mbere na Mwiseneza Josiane wabaye Miss Popularity 2019 mu irushanwa rya Nyampinga w’u Rwanda akaba yaranamubaye hafi cyane kugira ngo agere ku ntsinzi.

Abajijwe ku gipfurumba cy’amafaranga yoherereje Mwiseneza Josiane kugira ngo aguremo imodoka yari yaramwemereye, Mimi Mirage yanze gutangaza ingano yayo ariko yemeza ko yagura imodoka, anakomoza ku byavuzwe ko ayo mafaranga yariwe na musaza we.

Aha yavuze ko yamumbwiye ko yaguze iyo modoka yaranayerekanye, yongeraho ati : “Njywe ntabwo nshaka kujya hagati y’umuryango we na musaza we bafitanye isano iruta iyo mfitanye na Josiane. Njyewe narayamuhaye ayakoresha icyo ashaka.”

Mimi Mirage yanakomoje ku nkuru zimaze iminsi zihwihwiswa aho mu minsi ishize nibwo hasakaye amakuru avuga ko Kate Bashabe yaba ari mu rukundo n’umukinnyi w’ikirangirire wo muri Senegal ukinira ikipe ya Liverpool, Sadio Mane, ariko Mimi Mirage yarabinyomoje avuga ko yivuganiye na Sadio Mane ku giti cye agashimangira ko nta mubano wihariye afitanye na Kate.

Nubwo bamwe batekereza ko Mimi Mirage yaba ari mu rukundi na Sadio Mane, we yavuze ko ari inshuti ye bisanzwe n’ubwo nta busobanuro bwinshi yashakaga gutanga kuri aya makuru.

Yagize ati : “Uwo nzi ni Sadio Mane, uwo Kate ntabwo muzi. Sadio ni inshuti yanjye icyo nababwira cyo ni uko atanazi uwo Kate nta kindi narenzaho kuko duherukana vuba aha.”

Mimi Mirage udakunze kuba cyane mu Rwanda yavuze ko yishimira urukundo abanyarwanda bamwereka ndetse nuko bahora bamwakira iyo aje i Kigali.

Mirage ni umwe mu banyamideli bakomeye bakomoka mu Rwanda

Umwanditsi:

GISUBIZO GENTIL MOISE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.