27°C , Partly sunny | Kigali-Rwanda

Umuntu wa mbere yahitanywe na COVID-19 mu Rwanda

Yanditswe na Imvaho Nshya

Ku ya 30-05-2020 saa 20:53:05

Kuri uyu wa Gatandatu tariki ya 30 Gicurasi 2020, hatangajwe umurwayi wa mbere wahitanywe n’icyorezo cya Koronavirusi (COVID-19) mu Rwanda.

Minisiteri y’Ubuzima ivuga ko uwapfuye yari umushoferi w’imyaka 65 wari utuye mu gihugu cy’Abaturanyi wahisemo gutaha mu Rwanda nyuma yo kuremba. Yitaweho n’abaganga mu kigo cyagenewe ariko yaje gupfa azize kwangirika kw’imyanya y’ubuhumekero ye.

Uwo murwayi yatangarijwe hamwe n’abarwayi bashya 4 b’icyorezo cya COVID-19 batahuwe mu bipimo 1,368 byafashwe mu masaha 24 ashize, hataha abantu 3 bakize neza, bituma umubare w’abamaze gukira ugera kuri 250  muri 355 bamaze gutahurwaho icyo cyorezo mu Rwanda.

Minisiteri y’Ubuzima ivuga  ko umubare w’abakirimo kwitabwaho n’abaganga ugeze ku 108mu barwayi bose bamaze kuboneka  mu bipimo 65,608 byafashwe kuva umurwayi wa mbere yatahurwa muri Werurwe kugeza ubu.

Abarwayi bashya bose bahise bashyirwa mu kato bakihagera, ndetse n’abakirwaye muri rusange bakomeje kuvurirwa ahabugenewe.

Igikorwa cyo gupima abantu mu buryo bwa rusange mu Gihugu kirakomeje, bikaba bivugwa ko kugeza ubu nta murwayi mushya uratahurwa aturutse mu Baturarwanda hagati kuko abenshi mu  baba bavuye mu mahanga cyangwa mu bashyizwe kato bahuye na bo.

Harabura umunsi umwe ngo ikiciro k’ibindi bikorwa byahagaritswe bikomorerwe, mu gihe nta kizaba gihindutse. Muri byo hazaba harimo ingendo zo kuri moto bityo hamaze gupimwa abamotari barenga 1000, ndetse ngo bizakomeza gukorwa.

Abaturarwanda barasabwa kurushaho kubahiriza amabwiriza yo kwirinda ari yo gusiga intera ya metero, kwambara udupfukamunwa no gukaraba intoki kenshi bakoresheje amazi meza n’isabune cyangwa arukoro yabugenewe.

Imibare yatangajwe ku rwego mpuzamahanga yerekana ko muri Afurika abamaze kwandura COVID-19 bageze ku 136,677 barimo 56,958 bakize n’abandi 3,941bahitanywe na cyo. Abamaze kwandura ku Isi bangana na 6,094,239 barimo abakize 2,701,314 na 368,818 bapfuye.

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.