20°C , Mostly cloudy | Kigali-Rwanda

Umunsi w’ababyeyi waranzwe no gusobanurirwa ifu ya Nootri

Yanditswe na Rutayisire Emile

Ku ya 12-05-2019 saa 13:33:00
Mukundwa Fifi ari kumwe n'abana be bishimiye umunsi w'ababyeyi waranzwe n'imyidagaduro no gufata neza umubiri

Uruganda AIF (African Improved Food) rubinyujije mu kirango kiranga ubwoko butandukanye bw’ifu rukora “Nootri” rwizihije umunsi w’ababyeyi basabana n’abana babo bishimira intungamubiri bakura muri iyo fu.

Ku wa Gatandatu tariki ya 11 Gicurasi 2019 ni bwo umunsi Mukuru w’ababyeyi wabereye mu Karere ka Gasabo, mu Murenge wa Kimironko, mu Kagali ka Kibagabaga, ku nshuro ya kabiri, witabirwa n’ababyeyi bari kumwe n’abana babo basobanurirwa akamaro k’imvange y’ifu yitwa “Nootri” igira uruhare ku mikurire y’abana, bahabwa kandi na serivisi zitandukanye zirimo gukorerwa isuku y’inzara, masaje (massage) nyuma ya tombora yakorwaga bakinjira n’aho abana babo bahabwa umwanya wo kwidagadura.

Kugira ngo ubone itike yo kwitabira uwo muhango waguraga ifu ya Nootri ubwoko ubwo ari bwo bwose ugahabwa itike ikamuha amahirwe yo kujya ahabereye ibirori n’abana be babiri nk’uko Imvaho Nshya yabitangarijwe na Mugabekazi Sandra, umwe mu bafatanyanyije na Nootri gutegura uwo munsi.

Abo babyeyi baganirijwe n’umukozi mu bitaro King Faisal, ku bijyanye n’ibiranga indyo yuzuye, n’uruhare rw’iminsi 1000 mu mikurire y’abana babo. Basobanuriwe ko gukura neza no kugira ubwenge k’umwana biterwa n’uburyo yitaweho agisamwa.

Beretswe ubwoko bubiri bw’amafu burimo ‘Nootri mama’, igenewe ababyeyi batwite n’iya “Nootri Toto” igenewe abana bafite kuva ku mezi atandatu, ikaba yuzuye intungamubiri zituma umwana akura neza kandi n’umubyeyi akagira ubuzima bwiza.

Ayo moko y’amafu yari ari aho ku buryo ushatse yaguraga ndetse hari n’abandi batetse ibiribwa bikungahaye ku ntungamubiri, abana bakenera ndetse n’abakuru. Ababyeyi basobanuriwe ko umwana agomba konswa gusa kuva akivuka kugeza ku mezi atandatu ari nabwo akwiye gutangira kumuha ifu ya ‘Nootri Toto’ nk’ifashabere n’indi ndyo yuzuye kandi agakomeza konswa kugeza nibura agize imyaka ibiri.

Bamwe mu babyeyi bitabiriye uyu munsi mukuru bavuze ko byabashimishije, kuko byatumye basabana, abana babo kandi baridagadura.

Mukundwa Fifi, umubyeyi w’abana babiri yagize ati “Nshimishijwe no kuba naje muri kino gikorwa cyahuje abana n’ababyeyi kuko bituma ababyeyi baha agaciro ko gufata neza abana babo bibuka kubakurikirana mu mirire yabo bakabaha indyo yuzuye.”

Yakomeje avuga ko asanzwe azi ifu ya Nootri kuko imerera neza abana kandi bagakunda igikoma cyayo, ashishikariza ababyeyi kujya bamenyera abana babo indyo yuzuye, aboneraho gushima igikorwa cyabaye cyo guhuza abana na bo bakamenyana.

Mukundwa Fifi ari kumwe n’abana be bishimiye umunsi w’ababyeyi waranzwe n’imyidagaduro no gufata neza umubiri

Uretse ‘Nootri mama’ na ‘Nootri Toto’, AIF ikora ubundi bwoko bw’ifu burimo iyitwa ‘Shisha Kibondo’ itangwa ku bigo nderabuzima igahabwa abari mu kiciro cya mbere n’icya kabiri cy’ubudehe, Nootri Family, Injugu na ‘Super’ ikorerwa Ishami ry’Umuryango w’Abibumbye ryita ku biribwa, PAM.

Izo fu zose zakozwe mu bihingwa birimo ibigori na Soya, zirakangurirwa gukoreshwa kubera ko zuzuje ubuziranenge kandi zikagira uruhare mu kubaka umubiri n’imikurire y’umwana kuva akiri mu nda kuko umubyeyi asabwa kunywa Nootri Mama.

Umwanditsi:

Rutayisire Emile

Tanga Igitekerezo

Email yanyu ntigaragazwa ku rubuga. Amazina na Email ni ngombwa.